မြန်မာ့အရေး ထိရောက်စွာ ကိုင်တွယ်ဖို့ လွှတ်တော်
အမတ် ၄ဝဝ လက်မှတ်ထိုး
အမတ် ၄ဝဝ လက်မှတ်ထိုး
2009-12-07 ( RFA )
မြန်မာနိုင်ငံမှာ သိသာထင်ရှားတဲ့ ဒီမိုကရေစီရေး ပြုပြင်ပြောင်းလဲမှုတွေ ဖြစ်လာအောင် ကုလသမဂ္ဂ လုံခြုံရေးကောင်စီအနေနဲ့ ထိထိရောက်ရောက် ကိုင်တွယ်ဖြေရှင်းပေးဖို့ ပန်ကြားထားတဲ့ အိတ်ဖွင့်ပေးစာ တစောင်ကို ကမ္ဘာတဝန်းက လွှတ်တော်အမတ် စုစုပေါင်း ၄ဝဝ ကျော် လက်မှတ်ရေးထိုး ထောက်ခံထားပြီလို့ သိရပါတယ်။
အမေရိကန် ပြည်ထောင်စု နယူးယောက်မြို့ရှိ ကမ္ဘာ့ ကုလသမဂ္ဂ ဌာနချုပ် အဆောက်အအုံ ဖြစ်ပါသည်။ (Photo: AFP)
ဂျပန်နိုင်ငံ အထက်လွှတ်တော်အမတ်နှစ်ဦးက ဦးဆောင်ပြီး နိုင်ငံတကာမှာ မြန်မာ့အရေး လှုပ်ရှားနေတဲ့ အဖွဲ့အစည်းအားလုံး ပူးပေါင်းဆောင်ရွက်ကြတာဖြစ်တယ်လို့ အမေရိကန်နိုင်ငံအခြေစိုက် US Campaign for Burma အဖွဲ့ရဲ့မူဝါဒရေးရာ ညွှန်ကြားရေးမှူး ဦးအောင်ဒင်က RFA ကို ပြောပါတယ်။
ဦးအောင်ဒင်။ ။ 'မြန်မာနိုင်ငံ စစ်အစိုးရအပေါ်မှာ လုံခြုံရေးကောင်စီက တိကျပြတ်သားစွာ အရေးယူဖို့၊ အဲဒီ အရေးယူတဲ့ ဆုံးဖြတ်ချက်တရပ်ကို အမြန်ဆုံးချဖို့၊ အဲဒီဆုံးဖြတ်ချက်ထဲမှာ တစ်အချက် မြန်မာနိုင်ငံမှာ ဖြစ်ပေါ်နေတဲ့ ရာဇဝတ်မှုတွေအတွက် စုံစမ်းစစ်ဆေးရေး ကော်မရှင် ဖွဲ့ပြီးတော့ စစ်ဆေး၊ ဖော်ထုတ်၊ အရေးယူဖို့၊ ဒုတိယအချက်ကတော့ မြန်မာနိုင်ငံ စစ်အစိုးရအပေါ်မှာ ကမ္ဘာတဝန်းက လက်နက်ရောင်းချမှုတွေ ပိတ်ဆို့ဟန့်တားဖို့၊ အဲဒီစာကို ကမ္ဘာတဝန်းက လွှတ်တော်ကိုယ်စားလှယ်တွေ လက်မှတ်ထိုးဖို့ ကျွန်တော်တို့ စည်းရုံးခဲ့တာ အခုဆိုလို့ရှိရင် လွှတ်တော်ကိုယ်စားလှယ် ၄ဝဝ ကျော် လက်မှတ်ရေးထိုးပြီးပါပြီ။ ဂျပန်နိုင်ငံကပါမယ်၊ အိန္ဒိယ၊ ကိုရီးယား၊ ဥရောပသမဂ္ဂ နိုင်ငံများ၊ နောက် ဘရာဇီးလ်၊ မော်လဒိုက် အစရှိတဲ့ နိုင်ငံတွေ၊ နောက် အမေရိကန် ပြည်ထောင်စုကလည်း ပါပါတယ်။'
ဒါဟာ နိုင်ငံတကာ လွှတ်တော်အမတ်တွေအနေနဲ့ မြန်မာ့ဒီမိုကရေစီရေး လှုပ်ရှားမှုကို အားပေး ထောက်ခံတယ်ဆိုတာ ထင်ထင်ရှားရှား ပြသလိုက်တာ ဖြစ်တယ်လို့ သူကဆိုပါတယ်။ အဲဒီစာကို လာမဲ့ ဒီဇင်ဘာလ ၁ဝ ရက်၊ ၆၁ နှစ်မြောက် နိုင်ငံတကာ လူ့အခွင့်အရေးနေ့မှာ ဂျပန်နိုင်ငံ တိုကျိုမြို့ကနေ ကုလသမဂ္ဂ လုံခြုံရေးကောင်စီကို တိုက်ရိုက်ပေးပို့မှာ ဖြစ်ပါတယ်။
အလားတူပဲ အမေရိကန်သမ္မတ အိုဘားမားအနေနဲ့ ဒီနှစ် နိုဘယ်လ်ငြိမ်းချမ်းရေးဆု ချီးမြှင့်တဲ့ အခမ်းအနားမှာ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်နဲ့ ပတ်သက်ပြီး ထည့်သွင်းပြောဆိုဖို့ တင်ပြထားတယ်လို့ ဦးအောင်ဒင်က ပြောပါတယ်။
ဦးအောင်ဒင်။ ။ 'အမေရိကန်သမ္မတ အိုဘားမားက ဒီနှစ်အတွက် နိုဘယ်လ် ငြိမ်းချမ်းရေးဆုကို ရပါတယ်။ ရတော့ ဒီဇင်ဘာ ၁ဝ ရက်နေ့မှာ နော်ဝေနိုင်ငံ အော်စလိုကို သွားပြီးတော့ ဆုလက်ခံမှာပါ။ အဲလို ဆုလက်ခံတဲ့အခါကျတော့ သူ့ရဲ့ ဆုယူတဲ့အထိမ်းအမှတ် မိန့်ခွန်း ပြောမှာပေါ့နော်။ အဲလို မိန့်ခွန်းပြောတဲ့အခါမှာ မြန်မာပြည်က လက်ရှိ အကျဉ်းကျနေတဲ့ နိုဘယ်လ် ငြိမ်းချမ်းရေးဆုရှင် ဒေါ်အောင်ဆန်းစုကြည်အကြောင်းကိုလည်း ထည့်သွင်းပြောကြားဖို့ ကျွန်တော်တို့ ပန်ကြားထားပါတယ်။ ကျွန်တော်တို့ ယုံကြည်ပါတယ်၊ သူလည်း သူ့ရဲ့ မိန့်ခွန်းထဲမှာ ဒေါ်အောင်ဆန်းစုကြည်ကို ဂုဏ်ပြုတဲ့အကြောင်း သူထည့်သွင်း ပြောကြားလိမ့်မယ်လို့ ကျွန်တော်တို့ ယုံကြည်ပါတယ်။'
စစ်အစိုးရက ကြေညာထားတဲ့ လာမဲ့ ၂ဝ၁ဝ ခုနှစ် ရွေးကောက်ပွဲကို အများ ယုံကြည် လက်ခံနိုင်အောင် ထင်သာမြင်သာရှိတဲ့ ပြုပြင်ပြောင်းလဲမှုတွေ လုပ်ဖို့ မြန်မာစစ်ခေါင်းဆောင်တွေကို ဖိအားပေးဖို့ လိုတယ်လို့ နိုင်ငံတကာက မြန်မာ့အရေး လှုပ်ရှားနေသူတွေက ပြောပါတယ်။
မြန်မာ့အရေးနဲ့ ပတ်သက်ပြီး ကုလသမဂ္ဂရဲ့လုပ်ဆောင်ချက်တွေအပေါ် မြန်မာ့အရေး လှုပ်ရှားနေသူတွေအနေနဲ့ ဘယ်လိုအမြင် ရှိနေသလဲဆိုတာ RFA မှ မအင်ကြင်းနိုင်က မေးမြန်း တင်ပြထားပါတယ်။
ဆက်သွယ်မေးမြန်းချက်အား နားဆင်ရန် >>> ဒီမှာ ကလစ် ပါ ခင်ဗျား။
မှတ်ချက် ။ ။ http://www.rfa.org မှ ကူးယူ မျှဝေပါသည်။
