လူ့အခွင့်အရေးနေ့ အခမ်းအနား
2009-12-10 ( RFA )
မြန်မာနိုင်ငံမှာ လူ့အခွင့်အရေးဆိုင်ရာ ပညာပေးလုပ်ငန်းတွေ မြှင့်တင်ဆောင်ရွက်ဖို့ လိုနေတယ်လို့ အမျိုးသားဒီမိုကရေစီအဖွဲ့ချုပ်က ဒီကနေ့ ဒီဇင်ဘာ ၁ဝ ရက်မှာ ကျရောက်တဲ့ ၆၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့မှာ ပြောလိုက်ပါတယ်။
စစ်တပ်က အဓမ္မ ပေါ်တာဆွဲပြီး အထုပ်အပိုးများ ထမ်းခိုင်းသော ကရင် ရွာသူရွာသားများကို တိတ်တဆိတ် ချောင်းမြောင်း ရိုက်ကူးထားသော ဓာတ်ပုံဖြစ်ပါသည်။ (Photo: Courtesy of Free Burma Rangers)ဒါအပြင်၊ လူ့အခွင့်အရေး ချိုးဖောက်ခံရမှုတွေဟာ ဆိုးရွားနေဆဲဖြစ်တယ်လို့ အဖွဲ့ချုပ်ရဲ့ပြောခွင့်ရပုဂ္ဂိုလ် ပြည်သူ့လွှတ်တော် ကိုယ်စားလှယ် ဦးအုန်းကြိုင်က RFA ကို ပြောပါတယ်။
ဦးအုန်းကြိုင်။ ။ 'မြန်မာနိုင်ငံမှာတော့ လူ့အခွင့်အရေးနဲ့ ပတ်သက်တဲ့ ချိုးဖောက်မှုတွေက ဖြစ်နေဆဲ ဖြစ်တယ်၊ အဲ ဒါတွေဟာ တဖြည်းဖြည်းပေါ့၊ ပြည်သူလူထုရဲ့ လူ့အခွင့်အရေး အသိပညာတွေ တိုးမြင့်အောင် လုပ်ရမယ်။ အဲဒီ အသိပညာတွေ တိုးတက်လာတာနဲ့အမျှ ပြည်သူလူထုကလည်း လူ့အခွင့်အရေး ချိုးဖောက်မှုတွေကို ပြောရဲဆိုရဲ၊ ကိုယ့်အခွင့်အရေး ကိုယ်ရယူရဲတဲ့ အခြေအနေတွေ ဖြစ်အောင်ပေါ့၊ စုစည်းမှုတွေ၊ ညီညွတ်မှုတွေ၊ လေ့လာမှုတွေ၊ ကျင့်သုံးမှုတွေ ရှိလာရမယ်လို့ မြင်ပါတယ်။'
လူ့အခွင့်အရေးနေ့နဲ့ ပတ်သက်ပြီး ရွှေဂုံတိုင်ဌာနချုပ်မှာ ဒီကနေ့မနက်ပိုင်းက အခမ်းအနား ကျင်းပခဲ့ပါတယ်။ ဒီအခမ်းအနားမှာ လူ့အခွင့်အရေး ပညာပေးရေး ဆွေးနွေးပွဲ ပြုလုပ်ခဲ့တယ်လို့ ဦးအုန်းကြိုင်က ပြောပါတယ်။
ဦးအုန်းကြိုင်။ ။ 'လူ့အခွင့်အရေးနဲ့ စည်းကမ်း၊ လူ့အခွင့်အရေးနဲ့ ဥပဒေရေးရာ ကိစ္စတွေကို လွှတ်တော်ကိုယ်စားလှယ် ဦးလှမင်း၊ နောက် ရန်ကုန်တိုင်း စည်းရုံးရေးကော်မတီ အတွင်းရေးမှူး ဦးဝင်းမြင့်၊ လွှတ်တော်ကိုယ်စားလှယ်က လူ့အခွင့်အရေးနဲ့ ဥပဒေရေးရာ ကိစ္စတွေကို ပဏာမ ဆွေးနွေးဟောကြားတယ်၊ အဲဒီတော့ လူငယ်တွေက သူတို့ သိချင်တဲ့ လူ့အခွင့်အရေးဆိုင်ရာ ကြေညာစာတမ်းနဲ့ ပတ်သက်တဲ့ အချက်အလက်တွေ၊ ဖွဲ့စည်းပုံ အခြေခံဥပဒေကိစ္စ၊ နောက် နိုင်ငံသားတဦးစီရဲ့ ဥပဒေရေးရာ ခံစားခွင့် အညီအမျှ ရှိကြဖို့ လိုအပ်တယ်ဆိုတဲ့ ကိစ္စကို မေးမြန်းဆွေးနွေးကြတယ်။'
တက်ရောက်လာသူတွေနဲ့ မေးခွန်းတွေကို ဗဟို အလုပ်အမှုဆောင် အဖွဲ့ဝင် ဦးဝင်းတင်နဲ့အတူ ဒေါက်တာ သန်းငြိမ်း၊ ဒေါ်မေဝင်းမြင့်၊ ဦးစောနိုင်းနိုင်းနဲ့ ဦးအုန်းကြိုင်တို့က ရှင်းလင်း ဖြေကြားခဲ့တယ်လို့ သိရပါတယ်။ အခမ်းအနားကို အဖွဲ့ချုပ်လူငယ်တွေအပါအဝင် ဧည့်ပရိသတ် စုစုပေါင်း ၂ဝဝ နီးပါး တက်ရောက်ခဲ့ကြပါတယ်။
ဒီဇင်ဘာလ ၁ဝရက်နေ့မှာ ကျရောက်တဲ့ ၆၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အခမ်းအနားကို ပြည်မြို့မှာလည်း ကျင်းပဖို့ စီစဉ်ရာမှာ အာဏာပိုင်တွေက လုံးဝ ခွင့်မပြုဘူးဆိုတဲ့အတွက် အခမ်းအနား စီစဉ်ထားတာ ဖျက်လိုက်ရတယ်လို့ RFAက စုံစမ်းသိရှိရပါတယ်။
ပြည်မြို့မှာလုပ်မဲ့ ၆၁ နှစ်မြောက် အပြည်ပြည်ဆိုင်ရာ လူ့အခွင့်အရေးနေ့ အခမ်းအနားကို တက်ဖို့ ရန်ကုန်၊ ပဲခူး၊ ဇီးကုန်း၊ ဘိုကလေး၊ ပုသိမ် စတဲ့ ဒေသအသီးသီးက လူ့အခွင့်အရေး ကာကွယ်မြှင့်တင်သူတွေ ရောက်လာခဲ့ကြတယ်လို့ ဆိုပါတယ်။
ပြည်မြို့ ရဘဲရပ်မှာ ကျင်းပဖို့စီစဉ်ထားတဲ့ အိမ်ရဲ့အိမ်ရှင် ကိုမင်းမင်း ခေါ် ကိုလှမင်းထွန်းကို မြို့နယ် မယကက ဆွေးနွေးစရာရှိလို့ဆိုကာ ဒီဇင်ဘာ ၁ဝ ရက်နေ့ မနက် ၆ နာရီကျော်မှာ စာထုတ် ဆင့်ခေါ်ခဲ့ပြီး မနက် ၁ဝ နာရီ ထိုးတဲ့အထိ ပြန်လွှတ်မပေးတဲ့အတွက် အစီအစဉ်ဖျက်လိုက်ရတယ်လို့ လူ့အခွင့်အရေး ကာကွယ်မြှင့်တင်သူ တဦးဖြစ်တဲ့ ကိုမောင်မောင်လေးက အခုလို ပြောပါတယ်။
ကိုမောင်မောင်လေး။ ။ '၂ဝဝ၉ခုနှစ် ဒီဇင်ဘာ ၁ဝရက်နေ့တွင် ၆၁နှစ်မြောက် အပြည်ပြည်ဆိုင်ရာ လူ့အခွင့်အရေးနေ့အခမ်းအနား ကျင်းပမည့် ကိစ္စနှင့်ပတ်သက်၍ မေးမြန်း ဆွေးနွေးလိုပါ၍ အောက်ပါ အစီအစဉ်အတိုင်း မပျက်မကွက် လာရောက်တွေ့ဆုံရန် အကြောင်းကြားပါတယ်တဲ့။ နေ့ကတော့ ဒီနေ့ရက်စွဲပေါ့။ အချိန် ၆နာရီ ၃ဝပေါ့။ နေရာက မြို့နယ် အေးချမ်းသာယာရေးနှင့် ဖွံ့ဖြိုးရေးကောင်စီပေါ့။ ဥက္ကဋ္ဌ စိုးမြင့် ဒီကိစ္စကိုတဲ့ ကြိုတင် အကြောင်း မကြားတဲ့အတွက် ခွင့်မပြုနိုင်ပါဘူးတဲ့။ အဲဒီတော့ ဒီက ပြန်စရာရှိတဲ့သူတွေ ပြန်ကြဖို့ ပြောတယ်။ ကျနော်တို့ ကလည်း ဒီမှာ လုံးဝခွင့်မပြုနိုင်ဘူးဆိုတဲ့အချိန်မှာ ဇွတ်တိုးလုပ်မှာ မဟုတ်တဲ့အတွက် အားလုံးကို ကျနော်တို့ ပြန်ပို့လိုက်ပြီ။'
နောက်ဆုံးရရှိတဲ့ သတင်းအရတော့ ခေါ်သွားတဲ့ ကိုမင်းမင်း ခေါ် ကိုလှမင်းထွန်းကိုတော့ နေ့လယ် ၂နာရီခွဲ လောက်မှာ နေအိမ်ကို ပြန်ပို့ပေးခဲ့တယ်လို့ ဆိုပါတယ်။
မှတ်ချက် ။ ။ http://www.rfa.org မှ ကူးယူ မျှဝေပါသည်။
