မသိနားမလည်သူကို လှည့်ဖြားပြီး စစ်တပ်ထဲ ခေါ်သွင်း
2009-12-08 ( RFA )
ပဲခူးတိုင်းအနောက်ခြမ်း၊ မင်းလှမြို့နယ် အမှတ် ၂ ရပ်ကွက် ကောင်းကွက်သစ်ပင်လမ်းမှာ နေထိုင်တဲ့ ဦးမြင့်ရွှေ - ဒေါ်ခင်နွဲ့တို့ရဲ့သားဖြစ်သူ အသက် ၁၉ နှစ်အရွယ် မောင်သက်ကိုကိုဟာ မိသားစု ဝမ်းရေး အတွက် ရန်ကုန်မြို့ကို အလုပ်ရှာဖွေလုပ်ကိုင်ဖို့ သွားရောက်ခဲ့ရာက စစ်သားအဖြစ် စုဆောင်းခံခဲ့ရပြီး၊ ဘယ်ကို ပို့ဆောင်ထားမှန်းမသိ ဖြစ်နေတယ်လို့ မိသားစုဝင်တွေက ပြောပါတယ်။
ကလေးစစ်သား ပပျောက်ရေးကိစ္စများကို မြန်မာစစ်အစိုးရနှင့် ဆွေးနွေးရန် ကလေးများနှင့် လက်နက်ကိုင် ပဋိပက္ခများဆိုင်ရာ ကုလသမဂ္ဂ အထူးကိုယ်စားလှယ် မီးစ် ရာချစ်ကာ ကူမားရား ဆွာမိ (ဝဲ) သည် ၂ဝဝ၇ ခုနှစ်၊ ဇွန်လ၊ ၂၇ရက်နေ့က မြန်မာနိုင်ငံ နေပြည်တော်သို့ သွားရောက်၍ ထိုအချိန်က ယာယီဝန်ကြီးချုပ် (ယခုဝန်ကြီးချုပ်) ဒုတိယ ဗိုလ်ချုပ်ကြီး သိန်းစိန် (ယာ)နှင့် တွေ့ဆုံစဉ် မှတ်တမ်းပုံ ဖြစ်ပါသည်။ (Photo: AFP)မောင်သက်ကိုကိုဟာ ပြီးခဲ့တဲ့အောက်တိုဘာလ ၁၆ ရက်နေ့က ရန်ကုန် ကြည်မြင်တိုင်မြို့မှာ ရှိတဲ့ သူ့ရဲ့ အဒေါ်ဖြစ်သူထံမှာ ခေတ္တတည်းခိုပြီး အလုပ်ရှာဖွေ လုပ်ကိုင်ဖို့ သွားရောက်ခဲ့တာပါ။ အောက်တိုဘာလ ၁၉ ရက်နေ့မှာတော့ မီးရထား ရဲဝန်ထမ်းဖြစ်သူ ကိုချမ်းမောင်ကနေ ဝက်ဆီဖတ် စက်ရုံမှာ အလုပ်သွင်းပေးမယ်ဆိုပြီး ခေါ်ဆောင်သွားခဲ့ပေမဲ့၊ စက်ရုံကို ခေါ်ဆောင်မသွားပဲ ကျပ်ငွေတသောင်းရမယ်ဆိုကာ ခလရ-၁၅ က ဗိုလ်ကြီး အောင်ကျော်စိုးထံ ခေါ်သွားပြီးနောက် ၊ ရန်ကုန် ဒညင်းကုန်းစစ်သားစုဆောင်းရေး တပ်စခန်းထဲ ပို့ဆောင်ခံလိုက်တယ်လို့ အစ်မဖြစ်သူ မစမ်းယုခင်က RFA ကို ပြောပါတယ်။
မောင်သက်ကိုကိုဟာ အသက် ၁ဝ နှစ်အရွယ်ကတည်းက သင်္ကန်းစည်းခဲ့ပြီး ကိုရင်ဘဝနဲ့ နေထိုင်လာရာကနေ မိသားစု စားဝတ်နေရေး မပြေလည်တာကြောင့် ရန်ကုန်မှာ အလုပ်သွားမရှာခင် ၂ လ အလိုမှာ ကိုရင်ဘဝက ထွက်ခဲ့သူဖြစ်တယ်။ ဦးနှောက်မကောင်းတဲ့ ရောဂါဝေဒနာ ရှိတာကြောင့် နေအိမ်မှာ ပြန်လည်နေထိုင်ဖို့ အောက်တိုဘာလ ၂၅ ရက်နေ့မှာ ဒညင်းကုန်း စစ်သားစုဆောင်းရေး တပ်စခန်းမှာ သွားရောက် ခေါ်ယူပေမဲ့ ခေါ်ခွင့် မရခဲ့ဘူးလို့ အစ်မဖြစ်သူက ဆက်ပြောပါတယ်။
မစမ်းယုခင်။ ။ 'ဒီ ဒညင်းကုန်းစစ်တပ်ကို ရောက်ခဲ့တဲ့ အချိန်မှာ သင်တန်း ပို့လိုက်ပြီလို့ ပြောပါတယ်။ အမေလည်း အသည်း အသန်ဖြစ်လို့ ဆေးရုံတင်ထားရပါတယ် ပြောတော့မှ မောင်ဖြစ်သူကို တွေ့ရပါတယ်၊ တွေ့ရတော့လည်း ထောင်သားနဲ့ တွေ့ရသလို နောက်ဖက်က စစ်သားတွေက ရပ်နေပြီး ဘာမှ ပြောခွင့် မရပါဘူး၊ ပြန်ခေါ်ဖို့ မိခင်ဖြစ်သူက တခေါက် ထပ်သွားပြီးတော့ ဗိုလ်ကြီးအောင်ကျော်စိုးနဲ့ ပြောပါတယ်၊ ပြန်ထုတ်လို့ မရတော့ဘူးလို့ သူက ပြောလိုက်တာပါ။'
မောင်သက်ကိုကို ကို အောက်တိုဘာလကုန်မှာ စစ်သင်တန်းတက်ဖို့ အတွက် နယ်ကိုပို့မယ်ဆိုတဲ့ သတင်းကြားတာကြောင့် မိသားစုဝင်တွေ ပြန်ခေါ်နိုင်ဖို့ ထပ်မံကြိုးစားခဲ့ပေမဲ့ သက်ဆိုင်ရာ အာဏာပိုင်တွေက မောင်သက်ကိုကို မရှိတော့ကြောင်း စစ်သင်တန်းတက်ဖို့ တခြားတပ်စခန်းကို ပြောင်းသွားပြီးဖြစ်ကြောင်းသာ သိခဲ့ရတယ်လို့ ဆက်ပြောပါတယ်။
ဦးနှောက်မကောင်းတဲ့ ရောဂါဝေဒနာသည် မောင်သက်ကိုကိုဟာ ဘယ်တပ်စခန်းမှာ စစ်သင်တန်းတက်နေတယ်ဆိုတာ စုံစမ်းမေးမြန်းလို့ မရဖြစ်နေသလို နေအိမ်လည်း ပြန်မရောက်လာတာကြောင့် မိသားစုဝင်တွေ အနေနဲ့ စိုးရိမ်သောက ရောက်နေကြရတယ်လို့ မိခင်ဖြစ်သူ ဒေါ်ခင်နွဲ့က ပြောပါတယ်။
မှတ်ချက် ။ ။ http://www.rfa.org မှ ကူးယူ မျှဝေ ပါသည်။
