Wednesday, August 18, 2010

မြန်မာ စစ်ရာဇဝတ်မှု စုံစမ်းရေး အမေရိကန် ထောက်ခံမည်


ဗွီအိုအေ| မြန်မာနိုင်ငံမှာ ဖြစ်ပေါ်နေတယ်ဆိုတဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေနဲ့ စစ်ရာဇဝတ်မှုတွေကို စုံစမ်းစစ်ဆေးဖို့ ကုလသမဂ္ဂ ကော်မရှင်တရပ် ဖွဲ့စည်းရေးအတွက် အမေရိကန် ပြည်ထောင်စုက ထောက်ခံဖို့ အစီအစဉ် ရှိတယ်လို့ သတင်းတွေမှာ ဖော်ပြနေပါတယ်။

အမေရိကန်သမ္မတ ဘရက်ခ် အိုဘားမား (Barack Obama) အစိုးရ အဖွဲ့ဟာ မြန်မာနိုင်ငံရဲ့ အာဏာပိုင်တွေက ချုပ်ကိုင်ထားတဲ့ နိုင်ငံရေးစနစ် ပွင့်လင်းလာအောင်၊ နိုင်ငံရေး အကျဉ်းသား ထောင်ကျော်ကို ပြန်လွှတ်ပေးအောင် ဖိအားပေးတဲ့ အနေနဲ့ မြန်မာစစ်အစိုးရ ခေါင်းဆောင်တွေအပေါ် ချမှတ်ထားတဲ့ ဘဏ္ဍာရေး ပိတ်ဆို့ အရေးယူမှုတွေကို ပိုပြီး တင်းကျပ်ဖို့ စဉ်းစားနေကြောင်း အမေရိကန် အရာရှိတွေရဲ့ အပြောကို ကိုးကားပြီး ဗုဒ္ဓဟူးနေ့ထုတ် The Washington Post သတင်းစာမှာ ဖော်ပြထားပါတယ်။

မြန်မာစစ်အစိုးရ ခေါင်းဆောင် ဗိုလ်ချုပ်မှူးကြီး သန်းရွှေဟာ နိုင်ငံရေး အကျဉ်းသားတွေ၊ တိုင်းရင်းသား လူမျိုးစုတွေကို နှိပ်ကွပ်မှုတွေ ညွှန်ကြား လုပ်ဆောင်နေတယ်လို့ စွပ်စွဲခံနေရတာပါ။

အခုပြုလုပ်ဖို့ ရည်ရွယ်ထားတဲ့ စုံစမ်းစစ်ဆေးမှုတွေ၊ အရေးယူ ပိတ်ဆို့မှုတွေဟာ ဗိုလ်ချုပ်မှူးကြီး သန်းရွှေနဲ့ အပေါင်းအပါတွေကို ရည်ရွယ်ပြုလုပ်မှာ ဖြစ်တယ်၊ မြန်မာလူထုအပေါ် ပြုလုပ်မှာ မဟုတ်ဘူးလို့ အမေရိကန် အရာရှိတဦးက ပြောပါတယ်။

မြန်မာအစိုးရက ရွေးကောက်ပွဲကို နိုဝင်ဘာလမှာ ကျင်းပပေးမယ်လို့ ကြေညာထားပါတယ်။ ဒါပေမဲ့ ဒီရွေးကောက်ပွဲဟာ စစ်အစိုးရ အာဏာကို ဆက်ပြီး ထိန်းချုပ်ထားနိုင်အောင် လုပ်ကိုင်နေတာဆိုတဲ့ ဝေဖန်မှုတွေ ရှိပါတယ်။

source by : VOA

အပြည့်အစုံ ဖတ်ရန် ...

Monday, August 16, 2010

မိုက်တိုင်စန် မြန်မာနိုင်ငံတွင် သာသနာပြုမည်

စိုင်းဇွမ်ဆိုင်း| ကမ္ဘာ့အဆိုးဆုံး ပုဂ္ဂိုလ်ဟု လူသိများခဲ့ ကြသည့် ဟဲဗီးဝိတ် ချန်ပီယံဟောင်း မိုက်တိုင်စန်သည် မြန်မာနိုင်ငံသို့ သာသနာပြုရန် သွားရောက်မည် ဖြစ်ကြောင်း သိရှိရသည်။

“ကျနော့်ရဲ့ လူသားချင်း စာနာ ထောက်ထားမှုကို ပြသဖို့အတွက် အမှန်တကယ် အကူအညီ လိုအပ်နေတဲ့သူတွေကို ကူညီ သွားမှာပါ။ ပြီးတော့ မြန်မာနိုင်ငံမှာ တဲလေး ထိုးပြီးနေချင်ပါတယ်” ဟု မိုက်တိုင်စန်က ပြောကြောင်း Express သတင်းစာတွင် ဖော်ပြထားသည်။


မိုက်တိုင်စန်က မြန်မာပြည်တွင် တဲလေးထိုး၍ နေချင်သည်ဟု ဆိုသည်

“သံမဏိ မိုက်” ဟု ကျော်ကြား ခဲ့သည့် လက်ဝှေ့ ချန်ပီယံ ဟောင်းသည် ၎င်း၏ ဘဝတလျှောက် လုံးတွင် ပြဿနာများဖြင့် ရင်ဆိုင်ခဲ့ရသည်။

၁၉၉၂ ခုနှစ်တွင် အလှဘုရင်မ ဒက်စရီ ဝါရှင်တန်ကို မုဒိမ်းပြုကျင့် ခဲ့မှုဖြင့် တရားစွဲဆို ခံရသည်။ တရားခွင် အတွင်း ဂျူရီ လူကြီးများ၏ ၁၀ နာရီကြာ သုံးသပ်မှု အပြီးတွင် အပြစ်ရှိကြောင်း ထင်ရှား သဖြင့် မိုက်တိုင်စန်သည် ထောင်ဒဏ် ၃ နှစ် အပြစ်ပေး ခံခဲ့ရသည်။

၁၉၉၇ ခုနှစ်၊ အီဗန်ဒါ ဟိုလီဖီးလ်နှင့် ယှဉ်ပြိုင် ထိုးသတ် ခဲ့ရာတွင် ဟိုလီဖီးလ်၏ ညာဘက် နားရွက်ကို ကိုက်ဖြတ်ခဲ့မှု ကြောင့်လည်း ဟိုးလေး တကျော်ကျော် ဖြစ်ခဲ့သည်။

မိုက်တိုင်စန်သည် ၎င်း၏ လက်ဝှေ့သမား ဘဝအတွင်း ဝင်ငွေ ယူရို သန်းပေါင်း ၂၆၀ ကျော်ရရှိ ခဲ့ပြီးနောက် ၂၀၀၃ ခုနှစ်တွင် ဒေဝါလီ ခံလိုက်ရသည်။

အသက် ၄၄ နှစ်အရွယ် ကမ္ဘာ့ဟဲဗီးဝိတ် ချန်ပီယံဟောင်းသည် ၎င်း၏ လုပ်ဆောင်ခဲ့မှုများ အတွက် အရှက်ရနေပြီ ဖြစ်ကြောင်း၊ ကောင်းမွန်သည့် အလုပ်များကိုသာ လုပ်ဆောင် သွားတော့မည် ဖြစ်ကြောင်း ပြောဆိုထား သည်ဟုလည်း သိရှိရသည်။

မိုက်တိုင်စန်က “ဘုရားသခင်ဆီမှာရော၊ တခြားဘာသာတွေမှာရော ကျနော့်နာမည် မပါရင်လည်း ကိစ္စမရှိပါဘူး။ ဒါပေမယ့် လူ့ဂုဏ်သိက္ခာ ဆိုတဲ့ ခေါင်းစဉ်အောက်မှာတော့ ကျနော့်နာမည်ကို ကျန်ခဲ့စေချင်ပါတယ်”ဟု Express သတင်းစာတွင် ပြောဆိုထားသည်။

“ကျနော်ဟာ လူရွှင်တော်လို ဖြစ်နေတယ်။ ဟာသလို ဖြစ်နေတယ်။ ကျနော့်ရဲ့ ကလေးတွေဆီက လေးစားမှုကို ရအောင် ကောင်းရာကောင်းကြောင်းကို လုပ်ချင်ပါတယ်” ဟု မိုက်တိုင်ဆန်က ဆက်လက်ပြောဆိုထားသည်။

မိုက်တိုင်စန်က ၎င်း၏ တတိယဇနီးဖြစ်သူ ကီကီ သည် သူ့ကို လူကောင်းတယောက် ဖြစ်လာအောင် အဓိက ပြုပြင်ခဲ့သူ ဖြစ်ကြောင်း ပြောသည်။

“ကျနော် ကျန်းမာပျော်ရွှင်နေအောင်၊ တခြားသူတွေ ကျနော့်ကို ပိုပြီး ချစ်လာကြအောင် လုပ်ဆောင်တဲ့နေရာမှာ ကီကီ က စိတ်ရောကိုယ်ပါ နှစ်မြှုပ် ထားပါတယ်။ သူ့နေရာမှာသာ အခြားတဦးဆိုရင် သေသွားမှာ အသေအချာပါပဲ” ဟု မိုက်တိုင်စန်က ပြောဆိုထားသည်။

မိုက်တိုင်စန်ကို ၁၉၆၆ ဇွန်လ ၃၀ ရက်နေ့တွင် မွေးဖွားခဲ့ပြီး လက်ဝှေ့သမား ဘဝကို အသက် ၁၅ နှစ်အရွယ်တွင် စတင်ခဲ့သည်။ ကမ္ဘာ့လက်ဝှေ့ကောင်စီ (WBC)၊ ကမ္ဘာ့လက်ဝှေ့အဖွဲ့ချုပ် (WBA) နှင့် အပြည်ပြည်ဆိုင်ရာ လက်ဝှေ့အဖွဲ့ချုပ် (IBF) တို့တွင် မိုက်တိုင်စန်သည် ကမ္ဘာ့အသက်ငယ်ဆုံး ဟဲဗီးဝိတ်ချန်ပီယံ အဖြစ် မှတ်တမ်းတင်ခံခဲ့ရသည်။ ပထမဆုံး ဟဲဗီးဝိတ် ချန်ပီယံဖြစ်ချိန်တွင် မိုက်တိုင်စန်သည် အသက် ၂၀ သာရှိသေးသည်။

source by : ဧရာဝတီ

အပြည့်အစုံ ဖတ်ရန် ...

ဘုန်းကြီးကျောင်းများ မီးရှို့မည်ဟူသော ကလေး ၃ ဦး တရားစွဲခံရမည်

ကျော်ခ | စစ်ကိုင်းတိုင်း မုံရွာမြို့ရှိ အထင်ကရ ဘုန်းကြီးကျောင်းများကို မီးရှို့ရန် ကြံစီမှုဖြင့် ဖမ်းဆီးခံထားရသည့် လူငယ်တဦးနှင့် ကလေး ၂ ဦးကို ယခုတပတ်အတွင်း မြို့နယ်တရားရုံးတွင် တရားစွဲမည်ဟု ရဲက ပြောဆိုသည်။

လယ်တီ၊ စိတ္တသုခ၊ ပေပင်နှင့် အရှေ့လေးထပ် ကျောင်းများကို ဓာတ်ဆီလောင်း မီးရှို့မည်ဟု သံသယဖြင့် ပြီးခဲ့သည့် ဇွန်လနှောင်းပိုင်းတွင် ဖမ်းဆီးခဲ့သော ၂၁ နှစ်အရွယ် ကံကောင်း (ခ) သန့်ဇင်နှင့် ကလေး ၂ ဦးက မိမိတို့ ကြံစီခဲ့ကြောင်း ထွက်ဆိုသောကြောင့် မုံရွာမြို့နယ် တရားရုံးတွင် တရားစွဲဆိုသွားမည်ဟု အမှတ် ၂ မြို့နယ်ရဲစခန်းမှ ရဲအရာရှိတဦးက ပြောဆိုလိုက်ခြင်း ဖြစ်သည်။

သို့သော် တရားခံဘက်မှ ရှေ့နေလိုက်ပေးမည့်သူ ရှိမရှိကိုမူ မသိရသေးကြောင်း သူက ဆိုသည်။

“အမှုစစ်က စစ်တော့ သူတို့ တကယ်မီးရှို့ဖို့ ကြံစီခဲ့တယ်ဆိုတာကို ဝန်ခံထွက်ဆိုလာတယ်။ အခု သူတို့ကို တရားရုံးတင်ဖို့ လုပ်နေပါတယ်။ လောလောဆယ်တော့ ကျနော်တို့ အမှတ် ၂ မှာပဲ ထိန်းထားပါတယ်” ဟု အဆိုပါ ရဲအရာရှိက မဇ္ဈိမကို ပြောသည်။

အဖမ်းဆီးခံ ၃ ဦးကို ပြစ်မှုဆိုင်ရာ ဥပဒေပုဒ်မ ၄၃၆ နှင့် ၅၁၁ တို့ဖြင့် ဇွန်လ ၃ဝ ရက်နေ့မှစ၍ တလကျော်ကြာ အမှုဖွင့် စစ်ဆေးမေးမြန်းမှုများ ပြုလုပ်ခဲ့ပြီးနောက် တရားရုံးတင်ရန် စီစဉ်ခြင်း ဖြစ်သည်။

ပုဒ်မ ၄၃၆ သည် ကိုးကွယ်ဝတ်ပြုသည့် နေရာ၊ အိမ်၊ ကျောင်း၊ ပစ္စည်းသိုလှောင်ရာ အဆောက်အအုံကို မီး သို့မဟုတ် ပေါက်ကွဲစေတတ်သည့် အရာဖြင့် ဖျက်ဆီးရန် ကြံစီမှုဖြစ်ပြီး ပြစ်မှုထင်ရှားပါက ထောင်ဒဏ် ၁ဝ နှစ် သို့မဟုတ် တသက်တကျွန်း ချမှတ်နိုင်သည်။

သို့သော် အစောပိုင်းတွင် ရဲက ဖမ်းဆီးကာ နောက်ပိုင်းတွင် ပြန်လွှတ်ပေးခဲ့သူနှင့်ပတ်သက်၍ ရဲက တစုံတရာ ထုတ်ဖော်ပြောဆိုခြင်း မရှိပါ။ လွတ်မြောက်သွားသူကို မီးရှို့မည့်အဖွဲ့ ခေါင်းဆောင်အဖြစ် သံဃာတော်များဘက်က စွပ်စွဲခဲ့သည်။

အခင်းဖြစ်ပွားခဲ့သည့် ဇွန်လ ၃ဝ ရက်နေ့ နံနက် ၄ နာရီခန့်က ကပ်လျက်တည်ရှိသော လယ်တီကျောင်းနှင့် စိတ္တသုခကျောင်းတို့ကို မီးရှို့ရန် ၁၄ နှစ်အရွယ် ကလေး ၂ ဦးက ဓာတ်ဆီပုလင်း၊ မီးခြစ်များဖြင့် တချိန်ထဲ ဝင်ရောက်သွားချိန်တွင် ထိုကျောင်းများရှိ သံဃာတော်များက ဖမ်းဆီးမိခဲ့သည်။

“အဲဒီတုန်းက မီးလာရှို့တဲ့ ကလေးတွေကနေ တဆင့်ပြီးတဆင့် ဘုန်းကြီးတို့ကိုယ်တိုင် စုံစမ်းပြီး လိုက်ဖမ်းတော့ ခေါင်းဆောင်ဖြစ်တဲ့ မင်းမင်းဆိုတဲ့ ကောင်လေးပါ မိတယ်။ အဲဒီကောင်လေးကို ရဲက လွှတ်ပေးလိုက်တယ်။ သူ့နောက်ကွယ်မှာကို သူတို့ကို ခိုင်းနေတဲ့ အဖွဲ့ရှိသေးတယ်။ အဲဒါတွေမေးနေတုန်း မပေါ်ခင်မှာပဲ အာဏာပိုင်အဖွဲ့တွေ အတင်းလာခေါ်လို့ ထည့်ပေးလိုက်ရတာ” ဟု ကျောင်းတိုက်တတိုက်မှ ဆရာတော်တပါးက မဇ္ဈိမကို မိန့်ကြားသည်။

သံဃာတော်များ ဖမ်းမိစဉ်က ၅ ဦး ဖြစ်သော်လည်း ရဲစခန်းအရောက်တွင် နောက်ကွယ်က အဓိက ကြိုးကိုင်သူနှင့် ခေါင်းဆောင်အစစ်ကို ရဲများက ပြန်လွှတ်ပေးလိုက်သည်ဟု စိတ္တသုခကျောင်း ဆရာတော် ဦးမဏ္ဍလဘိသီရီက မိန့်ကြားသည်။ လွှတ်ပေးလိုက်သည့် အထဲတွင် အသက် ၁၃ နှစ်ခန့် အမျိုးသမီးငယ် တဦး ပါဝင်ကြောင်း သိရသည်။

ကျောင်းများကို မီးရှို့စေရန် ခိုင်းစေသည့် အသက် ၂ဝ ခန့်ရှိသူ မင်းမင်းဆိုသူကို အမှတ် ၂ ရဲများက စခန်းအရောက်တွင် လွှတ်ပေးခဲ့သလို၊ ဖမ်းစီးမိစဉ်က သူ၏ အိတ်ထဲတွင် မုံရွာမြို့ အမှတ် ၁ ရဲစခန်းက ပြုလုပ်ပေးထားသည့် ပြစ်မှုကင်းရှင်းကြောင်း ထောက်ခံစာကိုပါ တွေ့ရှိသဖြင့် စိတ္တသုခကျောင်းက သိမ်းဆည်းထားသည်ဟု သိရသည်။

အခင်းဖြစ်ပွားသည့်နေ့က ကျောင်းတိုက်ကို မီးရှို့ရန် ကြံစီသည်ဟူသော သူများကို သံဃာတော်များက စစ်ဆေးမေးမြန်းနေစဉ်မှာပင် စစ်ကိုင်းတိုင်း သာသနာရေးမှူး ဦးမျိုး အပါအဝင် မြို့နယ်ရဲစခန်းများမှ ရဲအရာရှိများ၊ ခရိုင်အဆင့်အရာရှိများ၊ ရယက၊ မယက ဥက္ကဋ္ဌများ ဦးရေ ၆ဝကျော် ကျောင်းဝန်းထဲဝင်၍ ခေါ်ဆောင်သွားခဲ့သည်ဟု ဆိုသည်။

ကလေးများ၏ နောက်ကွယ်တွင် ကြိုးကိုင်သူများ ရှိနေပြီး ထိုကိစ္စနှင့်ပတ်သက်၍ ကြံ့ဖွံ့အဖွဲ့နှင့် မြို့ခံအာဏာပိုင်အဖွဲ့များကို သံဃာတော်များက အယုံအကြည်မရှိဟု ဦးမဏ္ဍလဘိသီရီက မိန့်သည်။

သို့သော် မုံရွာခရိုင် ရဲအရာရှိတဦးကမူ ယင်းကဲ့သို့ ကျောင်းများကို မီးရှို့ရန် ကြံစီသူများကို သံဃာတော်များထံမှ သက်ဆိုင်ရာ မြို့ခံအာဏာပိုင်များက စိတ္တသုခကျောင်းထဲမှ ခက်ခဲစွာ တောင်းယူခဲ့ရသလို ၃ ဦးသာဖြစ်သည်ဟု ငြင်းဆိုခဲ့ပြီး ထိုကလေးများသည် မိဘမဲ့ကလေးများ ဖြစ်သည်ဟု ဆိုသည်။

မီးရှို့ရန် ကြံစီခံရသော ဘုန်းကြီးကျောင်း ၄ ကျောင်းသည် စစ်အစိုးရ၏ အကြမ်းဖက် ဖြိုခွင်းခံခဲ့ရသော ၂ဝဝ၇ ခုနှစ် သံဃာတော်များ ဦးဆောင်သော ဆန္ဒပြပရိတ်ရွတ် ဆုတောင်းရာတွင် တက်ကြွစွာ ပါဝင်ခဲ့ကြောင်း စုံစမ်းသိရသည်။

source by : မဇ္ဈိမ

အပြည့်အစုံ ဖတ်ရန် ...