ကိုညီညီအောင်အမှု ရုံးတင်၊ နိုင်ငံရေးလှုပ်ရှားသူများ နှစ်ရှည်ထောင်ဒဏ်ချ
Wednesday, 14 October 2009 18:26 အေးလဲ့
အာဏာပိုင်တို့က လေဆိပ်တွင် ဖမ်းဆီးခဲ့သူ ကိုညီညီအောင်ကို လိမ်လည်မှု၊ စာရွက် စာတမ်း အတု ပြုလုပ်မှု တို့ဖြင့် အင်းစိန်ထောင်တွင်း တရားရုံး၌ ယနေ့ စတင် ရုံးထုတ်ခဲ့ကြောင်း သူ၏ ရှေ့နေ ဦးဉာဏ်ဝင်းက ပြောသည်။
ဒီမိုကရေစီအရေး လှုပ်ရှားသူ ကိုကျော်ဇောလွင် (ခေါ်) ကိုညီညီအောင်သည် အမေရိကန်နိုင်ငံသား အဖြစ်လည်း ခံယူထားသောကြောင့် ရန်ကုန်မြို့ အမေရိကန်ကောင်စစ်ဝန် ဌာနမှ တာဝန်ရှိသူ တချို့က ရုံးချိန်း စတင်မည့် နံနက် ၁၀ နာရီတွင် သွားရောက်ခဲ့ကြောင်း အင်းစိန်ထောင် ဝန်ထမ်း တဦးက ပြောသည်။
ကိုညီညီအောင်၏ မိခင်အပါအ၀င် မိသားစုဝင် တချို့သည် နိုင်ငံရေး လှုပ်ရှားမှုများကြောင့် နှစ်ရှည်ထောင်ဒဏ်များ ချမှတ်ခံထားရသည်။
ကိုညီညီအောင် ဖမ်းဆီးခံရပြီး ၃ ပတ် အကြာတွင် သူ၏သတင်းကို အစိုးရ သတင်းစာများတွင် တွေ့ရသည်။
ထိုစဉ်က ရန်ကုန်တွင် ဗုံးပေါက်ကွဲမှုများ ဖြစ်ပေါ်ချိန်နှင့် တိုက်ဆိုင်နေရာ အစိုးရက ကိုညီညီညီအောင်သည် ထိုပေါက်ကွဲမှုများအတွက် တာဝန်ရှိသည်ဟုလည်း စွပ်စွဲခဲ့သည်။
ကိုညီညီအောင်သည် ၂၀၀၅ မှ ၂၀၀၉ အတွင်း လူမှုရေးဗီဇာ (Social Visa) ဖြင့် မြန်မာနိုင်ငံသို့ (၈)ကြိမ် ပြန်ခဲ့ကြောင်း သတင်းစာတွင် ရေးထားသည်။
“ညီညီအောင်သည် ဆူပူလှုပ်ရှားမှုများ စီစဉ်သူ ဖြစ်ရုံမျှမက ဖောက်ခွဲရေး လုပ်ငန်းများ အတွက်ပါ တာဝန်မကင်းသူ တစ်ဦးဖြစ်သည်ဟု ဆိုရမည် ဖြစ်သည်” ဟု သတင်းစာက ဆိုသည်။
အစိုးရက သူ့ကို အကြမ်းဖက်သမား ဖြစ်သယောင် ရေးသားခဲ့သော်လည်း ယနေ့ တရားစွဲသည့်အခါ လိမ်လည်မှု၊ စာရွက် စာတမ်း အတု ပြုလုပ်မှု တို့ဖြင့် စွဲဆိုလိုက်သည်။
အစိုးရက နိုင်ငံရေးလှုပ်ရှားမှုများတွင် ပါဝင်သူတို့ကို ပုဒ်မမျိုးစုံဖြင့် တရားစွဲ၊ ထောင်ချလျက်ရှိသည်။
ယမန်နေ့က သံဃာတချို့ အပါအဝင် နိုင်ငံရေးလှုပ်ရှားသူ ၁၁ ဦးခန့်ကို အင်းစိန်ထောင်အတွင်းရှိ တရားရုံးတွင် ထောင်ဒဏ် ၅ နှစ်မှ ၁၀ နှစ်အထိ ချမှတ်လိုက်ကြောင်း သိရသည်။
“အသင်း အဖွဲ့ ပုဒ်မ (၆) နဲ့ ၁၁ ဦးကို ထောင် ၅ နှစ် ချတယ်။ အဲဒီအထဲက ၄ ဦးက အသင်း အဖွဲ့ ပုဒ်မ အပါအဝင် ဖောက်ခွဲမှုနဲ့ ထပ်ပေါင်းပြီး ထောင်ဒဏ် ၁၀ နှစ် ချလိုက်တယ်” ဟု အင်းစိန်ထောင်နှင့် နီးစပ်သူတဦးက ပြောသည်။
အရှင် စန္တိမာ(ခေါ်) ထွန်းနောင်၊ ကျော်ဇင်မင်း(ခေါ်) ဇော်မိုး၊ ဝဏ္ဏနွယ်၊ ဇင်မင်းရှိန် တို့ ၄ ဦးသည် ထောင်ဒဏ် ၁၀ နှစ်စီ အမိန့်ချခံရခဲ့ကြောင်း သိရသည်။
ထောင်ဒဏ် ၅ နှစ်စီ ချမှတ်ခံရသူများမှာ ကိုစောမောင်၊ ကိုအောင်မိုးလွင်၊ ကိုမိုးထက်နေ၊ ကိုထွန်းလင်းအောင်၊ ကိုဇော်လတ်၊ ကိုနိုင်ဝင်း၊ ကိုထွန်းလင်းဦး တို့ ဖြစ်ကြောင်း သိရသည်။
ထို ၁၁ ဦးသည် သံဃာ့တပ်ပေါင်းစု အဖွဲ့၊ အမှန်တရား ဖော်ထုတ်ရေးအဖွဲ့၊ လူထုတရပ်လုံးအတွက် စတေးခံ အကောင်းဆုံး မြေသြဇာ အဖွဲ့ နှင့် မျိုးဆက်သစ် လူငယ်များ အစည်းအရုံး စသော အဖွဲ့အစည်းများမှ ဖြစ်ကြောင်း သိရသည်။
၎င်းတို့သည် ယခုမှ ထောင်ဒဏ်များ ချမှတ်ခံရခြင်း မဟုတ်ပေ။ ရွှေဝါရောင် တော်လှန်ရေး နှစ်ပတ်လည် လှုပ်ရှားမှုဖြင့် ၂၀၀၈ ခုနှစ် အတွင်း ဖမ်းဆီးခံရပြီး နောက်ပိုင်းတွင် ပုဒ်မ အမျိုးမျိုးဖြင့် ဆက်လက် ရုံးတင် စစ်ဆေးခံနေရခြင်း ဖြစ်သည်။
၎င်းတို့ထဲမှ ကိုဇင်မင်းရှိန်သည် ယခုအခါ ထောင်ဒဏ် စုစုပေါင်း ၂၃ နှစ် ချမှတ်ခံထားရသည်။
၂၀၀၇ ခုနှစ် နောက်ပိုင်း ပြည်ပသို့ တိမ်းရှောင်သွားသော သံဃာတော် နှစ်ပါး ဖြစ်သည့် ဦးပညာဇောတ(ခေါ်) နတ်ဇော၊ ဦးစန္ဒာဓိက(ခေါ်) စိုးမိုးအောင် တို့ကို စစ်အစိုးရက တရားခံပြေးများအဖြစ် သတ်မှတ်ပြီး ထောင်ဒဏ်အသီးသီး ချမှတ်ထားကြောင်း သိရသည်။
ရွှေဝါရောင်တော်လှန်ရေး နှစ်ပတ်လည် လှုပ်ရှားမှုဖြင့် ၂၀၀၉ ခုနှစ် အတွင်း ဖမ်းဆီးစစ်ဆေးခံရနေရသူ ၁၀၀ ခန့် ရှိကြောင်း နိုင်ငံရေး အကျဉ်းသားများ ကူညီ စောင့်ရှောက်ရေး အသင်း (AAPP) ၏ စာရင်းအရ သိရသည်။
မှတ်ချက် ။ ။ http://www.irrawaddy.org မှ ကူးယူ မျှဝေပါသည်။
