Wednesday, October 14, 2009

ဥရောပသံရုံး ကိုယ်စားလှယ် အဖွဲ့နဲ့ အမျိုးသားဒီမိုကရေစီအဖွဲ့ချုပ်တွေ့ဆုံ

ဥရောပသံရုံး ကိုယ်စားလှယ် အဖွဲ့နဲ့ အမျိုးသားဒီမိုကရေစီအဖွဲ့ချုပ်တွေ့ဆုံ

2009-10-14 ( RFA )

ဆွီဒင်နိုင်ငံ သံအမတ်ကြီး ခေါင်းဆောင်တဲ့ ထိုင်းနိုင်ငံအခြေစိုက် အီးယူ ဥရောပသံရုံးတွေက ကိုယ်စားလှယ် အဖွဲ့တဖွဲ့ဟာ အန်အယ်လ်ဒီ အမျိုးသားဒီမိုကရေစီ အဖွဲ့ချုပ် စီအီးစီ ဗဟိုအလုပ်အမှုဆောင် အဖွဲ့နဲ့ အန်အယ်လ်ဒီရုံးချုပ်မှာ ဒီကနေ့ အောက်တိုဘာ ၁၄ ရက်က လာရောက် တွေ့ဆုံခဲ့ပါတယ်။ ဒီတွေ့ဆုံပွဲကို အီးယူအဖွဲ့ကိုယ်စားလှယ် အယောက် ၂ဝ နဲ့ အန်အယ်လ်ဒီ စီအီးစီအဖွဲ့ဝင် ၆ ဦး တက်ရောက်ခဲ့တယ်လို့ ပါတီပြောခွင့်ရပုဂ္ဂိုလ် တဦးဖြစ်သူ ဒေါက်တာ ဝင်းနိုင်က RFA ကို ပြောပါတယ်။

ဒေါ်အောင်ဆန်းစုကြည် လွတ်မြောက်ရေး နှိုးဆော်မှုတခုအဖြစ် ဘယ်လ်ဂျီယမ်နိုင်ငံ၊ ဘရပ်ဆဲလ်မြို့ရှိ ဥရောပ ပါလီမန်အဆောက်အအုံ မျက်နှာစာပေါ်တွင် မီးမောင်းထိုး ပြသထားသည့် ဒေါ်အောင်ဆန်းစုကြည်၏ ရုပ်ပုံကို ဇွန်လ ၁၈ရက်နေ့က တွေ့ရပုံ ဖြစ်ပါသည်။ (Photo: AFP)

ဒေါက်တာ ဝင်းနိုင်။ ။ 'ဒီနေ့ ကျွန်တော်တို့ အဖွဲ့ချုပ်ကို ဥရောပသမဂ္ဂ ကိုယ်စားလှယ် ၂ဝ လာပြီးတော့ ကျွန်တော်တို့ CEC အဖွဲ့နဲ့ တွေ့ဆုံတယ်။ CEC အဖွဲ့မှာ ဦးသန်းထွန်း၊ ဦးလှဖေ၊ ဦးညွန့်ဝေ၊ ဦးစိုးမြင့်၊ ဦးဝင်းတင်နဲ့ ဦးခင်မောင်ဆွေတို့ ပါတယ်။ အဲ သူတို့က လက်ခံ တွေ့ဆုံပြီးတော့ ဆွေးနွေးကြတယ်ပေါ့။'

ဒီကနေ့ တွေ့ဆုံပွဲမှာ အီးယူသံကိုယ်စားလှယ်အဖွဲ့ဘက်က ၂ဝ၁ဝ ရွေးကောက်ပွဲနဲ့ပတ်သက်လို့ အန်အယ်လ်ဒီ ပါတီရဲ့ သဘောထား ရပ်တည်ချက်ကို အဓိကထား မေးမြန်းခဲ့ပြီး၊ အန်အယ်ဒီ စီအီးစီအဖွဲ့ဘက်က ရွှေဂုံတိုင်ကြေညာစာတမ်းပါ တောင်းဆိုချက် ၃ခုကို စစ်အစိုးရဘက်က လိုက်လျောရင် ရွေးကောက်ပွဲဝင်မဲ့ အကြောင်း ပြန်လည်ရှင်းပြခဲ့တယ်လို့ ပါတီ စီအီးစီအဖွဲ့ဝင် ဦးခင်မောင်ဆွေက ပြောပါတယ်။

ဦးခင်မောင်ဆွေ ။ 'Election ကျရင် ဘယ်လို လုပ်မလဲပေါ့ဗျာ။ 2010 ကိုပေါ့။ ဘယ်လို လုပ်ကြမလဲဆိုတော့ ကျွန်တော်တို့က elelection တော့ ရွှေဂုံတိုင် ညီလာခံထဲမှာ ပါတဲ့အတိုင်း ကျွန်တော်တို့ ရပ်တည်နေပါတယ်။ အဲ option သုံးခုကို ကျွန်တော်တို့ တောင်းထားပါတယ်။ တောင်းထားတာကို၊ တောင်းထားတာနဲ့ကျွန်တော်တို့ သက်ဆိုင်ရာ အာဏာပိုင်ဖက်က လိုက်လျောပြီးတော့ ပေးမယ်ဆိုလို့ရှိရင်တော့ ကျွန်တော်တို့ ဝင်ကြဖို့ပဲ ရှိပါတယ်။ '

အန်အယ်ဒီပါတီ ရွေးကောက်ပွဲ ဝင်ရောက်ရေးနဲ့ ပတ်သက်လို့ လောလောဆယ် တိတိကျကျ ဆုံးဖြတ်ထားတာ မရှိသေးကြောင်း၊ ရွေးကောက်ပွဲ ဥပဒေနဲ့ စည်းမျဉ်းစည်းကမ်းတွေ တရားဝင် ထုတ်ပြန်တဲ့ အခါမှသာ ပါတီညီလာခံတရပ် ကျင်းပပြီးနောက် ဆုံးဖြတ်ချက် ချမှတ်မှာဖြစ်ကြောင်း အီးယူအဖွဲ့ကို ရှင်းပြခဲ့တယ်လို့ ဦးခင်မောင်ဆွေက ပြောပါတယ်။

ဒီကနေ့ တွေ့ဆုံပွဲဟာ ၁ နာရီကျော် ကြာမြင့်ခဲ့ပြီး တခြား စီအီးစီအဖွဲ့ဝင်တွေ ဖြစ်တဲ့ ဦးအောင်ရွှေ၊ ဦးလွင်နဲ့ ဦးလွန်းတင်တို့တော့ တက်ရောက်နိုင်ခြင်း မရှိဘူးလို့ သိရပါတယ်။

ရန်ကုန်မြို့မှာ ရှိတဲ့ အမေရိကန်၊ ဗြိတိန်နဲ့ သြစတြေးလျနိုင်ငံ သံရုံးတွေက သံတမန်တွေလည်း ပြီးခဲ့တဲ့ သောကြာနေ့က ဒေါ်အောင်ဆန်းစုကြည်နဲ့ သွားရောက် တွေ့ဆုံပြီးနောက် အန်အယ်လ်ဒီ ဗဟိုအလုပ်အမှုတွေအဖွဲ့နဲ့ ပါတီရုံးချုပ်မှာ တွေ့ဆုံခဲ့ပါသေးတယ်။

အီးယူသံတမန်အဖွဲ့နဲ့ အန်အယ်ဒီ ဗဟိုအလုပ်အမှုဆောင်အဖွဲ့တို့ ဒီကနေ့ တွေ့ဆုံမှုနဲ့ ပတ်သက်လို့ စီအီးစီအဖွဲ့ဝင် ဦးခင်မောင်ဆွေနဲ့ RFAအဖွဲ့သား ကိုကျော်ကျော်အောင် ဆက်သွယ် မေးမြန်းထားပါတယ်။

ဆက်သွယ်မေးမြန်းချက် နားဆင်ရန် >>> ဒီမှာ ကလစ်ပါ ခင်ဗျား ...။


မှတ်ချက် ။ ။ http://www.rfa.org မှ ကူးယူ မျှဝေပါသည်။