မြန်မာစစ်တပ်မှ ကလေးစစ်သားတယောက် သေဒဏ်ချမှတ်ခံရ
2009-10-15 ( RFA )
ရှမ်းပြည်မြောက်ပိုင်း လောက်ကိုင်မြို့ ခမရ ၃၂၂ က အသက် ၁၆ နှစ်အရွယ် တပ်သား မောင်အောင်ကိုထွေးဟာ ဒီကေဘီအေ စစ်သားတယောက်ကို ပစ်ခတ်မှုနဲ့ လားရှိုးထောင်မှာ သေဒဏ် စီရင်ချက် ချမှတ်ခံထားရတယ်လို့ သိရပါတယ်။
ပြီးခဲ့တဲ့ ၂ဝဝ၆ ခုနှစ်က ရန်ကုန်တိုင်း တောင်ဒဂုံမြို့နယ်နေ ဦးလှဝင်း၊ ဒေါ်သိန်းဌေး တို့ရဲ့ သား၊ ၈ တန်း ကျောင်းသား မောင်အောင်ကိုထွေးဟာ ကျောင်းသွားရင်း ပျောက်ဆုံးသွားခဲ့ပါတယ်။ ပျောက်ဆုံးပြီး တလအကြာမှာ လောက်ကိုင်မြို့ ခမရ ၃၂၂ က မိသားစုကို ဆက်သွယ်လာခဲ့ တာကြောင့် မောင်အောင်ကိုထွေး စစ်တပ်ထဲ ရောက်နေတာ သိရတယ်လို့ အစ်မဖြစ်သူက ပြောပါတယ်။ အဲဒီနောက် ၅ လအကြာမှာ မောင်အောင်ကိုထွေးက အစ်မဖြစ်သူတွေဆီကို ဆက်သွယ်ပြီး သူ စစ်တပ်မှာ မပျော်တော့ကြောင်း၊ အိမ်ပြန်ချင်ကြောင်း ပြောခဲ့ပါတယ်။ ဒါပေမဲ့ အဲဒီနောက်ပိုင်းကတည်းက မောင်အောင်ကိုထွေးနဲ့ အဆက်အသွယ် ပြတ်သွားခဲ့တယ်လို့ သိရပါတယ်။
ပြီးခဲ့တဲ့ ၆ လလောက်ကတော့ အစ်မဖြစ်သူက လောက်ကိုင်မြို့က ခမရ ၃၂၂ ကို ဆက်သွယ်ပြီး မောင်အောင်ကိုထွေးရဲ့အခြေအနေကို မေးမြန်းကြည့်တဲ့ အခါ မောင်အောင်ကိုထွေး သေဒဏ် ချမှတ်ခံထားရကြောင်း သိခဲ့ရတယ်လို့ RFA ကို ပြောပါတယ်။
အစ်မ။ ။ 'မကြီးက အိပ်မက်တွေ မကောင်းလို့ ဆက်ရော။ ကျွန်မ မောင်လေးတယောက် ဘယ်လို ဖြစ်နေလဲ အိပ်မက်တွေ မကောင်းလို့ပေါ့နော်။ အဲဒါ သူ့တပ်ရင်းက ဖုန်းကိုင်ရော။ ကိုင်တော့ မသိဘူးလားတဲ့၊ အောင်ကိုထွေးအကြောင်းတဲ့။ အောင်ကိုထွေးကတဲ့ ဒီကေဘီအေကို သတ်လို့တဲ့ ထောင်ကျနေတယ်၊ သေဒဏ်ချထားတယ် သူ့ကိုတဲ့။ အဲဒါ ညီမတို့ စလိုက်တော့ သူ့ကို သေဒဏ်ချနေပြီ၊ သူ့ကို။'
အခုလို သေဒဏ် ချမှတ်ခံထားရတဲ့အကြောင်းကတော့ မောင်အောင်ကိုထွေးအပါအဝင် မြန်မာ စစ်သား ၄ ယောက်နဲ့ ဗုဒ္ဓဘာသာ ကရင်တပ်မတော် ဒီကေဘီအေ တပ်သားတယောက် အချင်းများကြရာက ပစ်ခတ်မှု ဖြစ်ပွားခဲ့ရာမှာ ဒီကေဘီအေတပ်သား သေဆုံးသွားခဲ့ပါတယ်။ မြန်မာစစ်သား နှစ်ယောက် ထွက်ပြေးသွားခဲ့ပြီး မောင်အောင်ကိုထွေးနဲ့ ကျန်တယောက် အဖမ်းခံခဲ့ကြရပါတယ်။ အခု သူတို့အပေါ် သေဒဏ်ချမှတ်ခဲ့တာကို ဘယ်သူ့ကိုမှ အသိမပေးဖို့ တပ်တွင်း အရာရှိတယောက်က ပြောဆိုခဲ့တဲ့အတွက် မိသားစုဝင်တွေ အနေနဲ့ မပြောရဲပဲ နေခဲ့ကြရတယ်လို့ အစ်မဖြစ်သူက ဆိုပါတယ်။
အစ်မ။ ။ 'သေဒဏ်ချထားတာ အဲဒီက အကုန်လုံး သိတယ်။ ညီမတို့က မသိဘူး ထင်လို့ပေါ့နော်၊ ပထမက သူ့ရဲ့အရာရှိက ဖုန်းဆက်တာ။ ဒီအမိန့်က အိတ်ပိတ်လာတာပါတဲ့၊ ဘယ်သူမှ မပြောပါနဲ့ပေါ့နော်။ သေဒဏ်တဲ့၊ အိတ်ပိတ်တဲ့။ ဒီအမှုက သေဒဏ်ချထားတာ ဘယ်သူ့ကိုမှ မပေါက်ကြားစေပါနဲ့တဲ့။ ညီမတို့ကို နားလည်တဲ့ လူတွေက ပြောတယ်၊ စစ်တပ်က သူ့သားကိုသူ သေအောင် မသတ်ဖူးပေါ့နော်။ ညီမတို့ကလည်း အဲဒါနဲ့ ဘာမှ မပြောပဲ၊ ဘာမှ ဟိုဥစ္စာ အကြောင်း ဘယ်သူ့ကိုမှ မဖွင့်ပြောပဲနဲ့ ဒီအတိုင်း နေနေတာ၊ သူတို့က မပေါက်ကြားစေနဲ့ ဆိုလို့။'
ပြီးခဲ့တဲ့ အင်္ဂါနေ့က အစ်မဖြစ်သူက မောင်အောင်ကိုထွေး အကျဉ်းကျနေရာ လားရှိုးထောင်ကို သွားရောက်တွေ့ဆုံခဲ့ပါတယ်။ မောင်အောင်ကိုထွေးဟာ အသက် ၁၆ နှစ်ကျော်ကျော်သာ ရှိသေးတဲ့ ကလေးတဦး ဖြစ်နေတာကြောင့် အခုလို သေဒဏ် အပြစ်ချမှတ်တာဟာ တရားနည်းလမ်း မကျကြောင်း၊ မောင်အောင်ကိုထွေးရဲ့ ပြစ်ဒဏ် လျော့ပေါ့ သက်သာစေဖို့အတွက် တတ်ကျွမ်းနားလည်သူတွေနဲ့ လုပ်ဆောင်သွားမှာ ဖြစ်တဲ့အကြောင်း အစ်မဖြစ်သူက RFA ကို ပြောခဲ့ပါတယ်။
မှတ်ချက် ။ ။ http://www.rfa.org မှ ကူးယူ မျှဝေပါသည်။
