2010-01-15 ( RFA )
မြန်မာနိုင်ငံကနေ တရုတ်နိုင်ငံကို လူပွဲစားတွေကတဆင့် ရောင်းစားခံထားရပြီး ကျန်းဖုန်းဒေသမှာ ဖမ်းဆီးခံခဲ့ရတဲ့ မြန်မာအမျိုးသမီး ၃၃ ယောက်ကို ဇန်နဝါရီလ ၁၂ ရက်နေ့ အင်္ဂါနေ့က တရုတ်မြန်မာ နယ်စပ်မြို့ဖြစ်တဲ့ လွယ်ကျယ်မြို့ရဲ့ နှစ်နိုင်ငံနယ်စပ်ဂိတ်ကနေတဆင့် တရုတ်အာဏာပိုင်တွေက လွှဲပြောင်းပေးခဲ့တယ်လို့ သိရပါတယ်။
တရုတ်-မြန်မာနယ်စပ်၊ ကျယ်ဂေါင်-မူဆယ် နယ်စပ် ဂိတ်တံခါးကို တရုတ်မြို့ ကျယ်ဂေါင် ဖက်မှနေ၍ မြင်ရပုံ ဖြစ်ပါသည်။ (Photo: AFP)
အဲဒီလို လွှဲပြောင်းတဲ့အချိန်မှာ တရုတ်အာဏာပိုင်တွေက လူကုန်ကူးခံရသူ အမျိုးသမီးတွေကို ကိုယ်ထိလက်ရောက် ရိုက်နှက်တာတွေ လုပ်ခဲ့တာ ရှိတယ်လို့ တရုတ်မြန်မာနယ်စပ်မှာ ရှိတဲ့ ဦးအောင်ကျော်ဇောက RFA ကို ပြောပါတယ်။
ဦးအောင်ကျော်ဇော။ ။ လွယ်ကျယ် ဂိတ်ပေါက်ကနေပြီးတော့ သူက မောင်းထုတ် လိုက်တာ၊ တရားဝင် လဝက အဖွဲ့ကို အပ်တာလည်း မဟုတ်ဘူး သူက ရိုက်နှက်ပြီး မောင်းပို့လွှတ်တာ၊ သူတို့ ကယ်တင်ပြီးတော့ ပြန်လွှတ်တာကိုပဲ ကျေးဇူး တင်ရမယ် ဒါပေမဲ့ သူတို့ လုပ်နည်းလုပ်ပုံက နည်းလမ်းတကျ ပေါ့ဗျာ မူလရှိတဲ့ လူမှောင်ခို ကုန်ကူးသန်း ရောင်းဝယ်မှုရဲ့ အခြေခံ အပြန်အလှန် မူတွေပေါ်က လုပ်တာ မဟုတ်ပဲ နဲ့ ကျနော်တို့ဖက်ကပဲ လွန်လွန်ကျူးကျူး သွားပြီးတော့ ဝင်နေသလိုလို ဘာလိုလိုမျိုးတွေ ဆောင်တယ်။
တရုတ်အာဏာပိုင်တွေက တရုတ်နှစ်သစ်ကူးကာလ နီးကပ်လာတိုင်း ဒါမျိုး လုပ်လေ့ရှိတယ်လို့ဆိုပါတယ်။ အလားတူ ပြီးခဲ့တဲ့ တပတ်လောက်ကလည်း တခြား မြန်မာအမျိုးသမီး ၁၁ ဦးကို တရားဝင်မဟုတ်ပဲ တရုတ် အာဏာပိုင်တွေက ပြန်ပို့ခဲ့သေးတယ်လို့လည်း ဦးအောင်ကျော်ဇော်ကပဲ ဆက်ပြောပါတယ်။
မြန်မာနိုင်ငံတွင်းကနေ လူပွဲစားတွေကတဆင့် တရုတ်နိုင်ငံကို ရောင်းစားခံနေရတဲ့ အမျိုးသမီးတွေဟာ အခုနှစ်ပိုင်းအတွင်း ပိုမိုများပြားလာသလို ဒါဟာမြန်မာပြည်မှာ စီးပွားရေးကျပ်တည်းမှုတွေကြောင့် ဖြစ်တယ်လို့ ဦးအောင်ကျော်ဇော ကသုံးသပ်ပြောဆိုပါတယ်။
ဦးအောင်ကျော်ဇော။ ။ကျနော်တို့ သိသလောက်ပေါ့၊ ကွမ်တုံက ခရိုင်တခုထဲမှာကိုး အနီးအနားက မြို့နယ်တဝိုက်မှာ ဆိုလို့ရှိရင် ကျေးလက်တွေမှာ စုစုပေါင်း မြန်မာပြည်က အမျိုးသမီး ရှစ်ရာကျော်လောက် ရှိတယ်၊ ဒါက ကွမ်တုံ ပြည်နယ် တခုထဲမှာ ခရိုင်တခုထဲမှာတွေ့တာ၊ အထူးသဖြင့် နယ်စပ်ဒေသမှာရှိတဲ့ ကချင်တို့ ရှမ်းတို့ ဝ တို့ကတော့ အများကြီးပဲဗျ။ အဲ့ဒါ ပြောမယ်ဆိုရင် ဟိုတုန်းကထက်စာရင် နည်းနည်း များလာတာပေါ့ဗျား၊ ဟိုတုန်းကတော့ ဒီလောက်မများဘူး၊ အဓိကတော့ ကျနော်တို့ ပြည်တွင်းမှာ လူတွေ စီးပွားရေး ကျပ်တည်း ကြတယ်ဆိုတာ နေထိုင်မှုဘဝ အင်မတန် ဆင်းရဲကြတော့ ပိုပိုပြီး ဆင်းရဲလာကြတယ်၊ တရုတ်ပြည်မှာက နေထိုင်မှုဘဝက နည်းနည်း ပိုပိုပြီးမြင့်လာကြတာ အဲ့ဒါလည်း ပါတယ်။
၂ဝဝ၉ ခုနှစ်အတွင်း လူကုန်ကူးမှုတိုက်ဖျက်ရေး စီမံချက်အရ ပြည်ပနိုင်ငံတွေကနေ မြန်မာနိုင်ငံကို လွှဲပြောင်းပေးခဲ့သူပေါင်း ၄၃၁ ဦးအနက် တရုတ်နိုင်ငံက လွှဲပြောင်းပေးခဲ့သူ ၂၉၃ ဦးရှိခဲ့ပြီး ၆၂ ဦးဟာ အသက် ၁၈ နှစ်အောက် အမျိုးသမီးငယ်တွေ ဖြစ်ကြတယ်လို့ မြန်မာနိုင်ငံရဲတပ်ဖွဲ့က အဆင့်မြင့်အရာရှိတဦးကို ကိုးကားပြီး ပြည်တွင်းထုတ် Weekly Eleven ဂျာနယ်က ဖော်ပြထားပါတယ်။
source by : http://www.rfa.org
