မနက်ဖြန် မြန်မာနိုင်ငံကို လာရောက်မယ့် ဩစတြေးလျနိုင်ငံခြားရေးဝန်ကြီး ကယ်ဗင်ရတ် (Kevin Rudd) ရဲ့ခရီးစဉ်နဲ့ ပတ်သက်လို့ ဆစ်ဒနီ အခြေစိုက် ဘားမားကမ်ပိန်း ဩစတြေးလျ (Burma Campaign Australia) ရဲ့ ညွှန်ကြားရေးမှူး ဒေါက်တာမြင့်ချိုကို ဆက်သွယ်မေးမြန်းထားပါတယ်။
ဩစ တြေးလျက အရင်တုန်းကလည်း အမျိုးသားပြန်လည်သင့်မြတ်ရေးဆိုပြီးတော့မှ ပြောတဲ့အတိုင်းပဲ ဒီ ခရီးစဉ်မှာလည်းပဲ အမျိုးသားပြန်လည်သင့်မြတ်ရေးအတွက် ပြောမယ်ဆိုပြီးတော့မှ ကြေညာချက်မှာတော့ ကျနော်တို့ တွေ့တာပေါ့ဆရာ။ Burma Campaign Australia အနေနဲ့ ကျတော့ ထိရောက်မှုက ဘယ်လောက် ရှိနိုင်တယ်လို့ ဆရာတို့ ယူဆလဲ။
“နံပါတ် ၁ အချက်က သွားတဲ့ ဩစတြေးလျဝန်ကြီး ကိုယ်၌ကိုက မြန်မာပြည် ဒီမိုကရေစီအပြောင်းအလဲ ဖြစ်ပေါ်ရေးမှာ တကယ့်ကို အင်တိုက်အားတိုက် ဆောင်ရွက်ချင်တဲ့ ဆန္ဒရှိတယ်။ အရင်တုန်းကလည်း အတိုက်အခံ ဘဝမှာကော၊ ဝန်ကြီးချုပ်ဘဝမှာကော၊ လက်ရှိ နိုင်ငံခြားရေးဝန်ကြီး ဘဝမှာကော တက်တက်ကြွကြွ လုပ်ဆောင်ပေးနေတဲ့အတွက်ကြောင့် သူ့ရဲ့ အင်တိုက်အားတိုက် လုပ်ဆောင်မှုကတော့ တစုံတရာ အကျိုးသက်ရောက်မှု ရှိမယ်လို့ ကျနော် ယူဆတယ်။ နောက်တချက်ကလည်း သွားတဲ့အခါမှာ ဖိအားပဲ ပေးမှာမဟုတ်ဘဲနဲ့ ကူညီနိုင်မယ့် ကိစ္စတွေကိုလည်း အများကြီး ချပြပြီးတော့ ကူညီလက်စနဲ့ တဖက်က အပြောင်းအလဲ လုပ်ပေးမယ့် ကိစ္စတွေကို အပေးအယူ လုပ်ပြီးတော့ ဆွေးနွေးလိမ့်မယ်လို့ ကျနော် ထင်ပါတယ်ခင်ဗျ။”
ဟုတ်ကဲ့ ဘယ်လိုမျိုး ကိစ္စမျိုးတွေလဲ ဆရာ။
“ဥပမာ ဩစတြေးလျကနေ မြန်မာနိုင်ငံမှာရှိတဲ့ ဒီ ဗိုလ်ချုပ်ကြီးတွေနဲ့ သူတို့ရဲ့ မိသားစုတွေနဲ့ စီးပွားရေးလုပ်ဖော်ကိုင်ဖက် အပေါင်းအပါ ၄၆၃ ဦးကို ဘဏ္ဍာရေးအရ ပစ်မှတ်ထားပြီးတော့ ပိတ်ဆို့ထားတဲ့ ကိစ္စတွေ၊ ဩစတြေးလျကို လာလို့ မရအောင် ဗီဇာပိတ်ပင်တဲ့ ကိစ္စတွေ၊ မြန်မာနိုင်ငံကို တင်သွင်းနေတဲ့ ကာကွယ်ရေးပစ္စည်းတွေ မရောင်းချရအောင် ပိတ်ပင်ထားတဲ့ ကိစ္စတွေ ဒီ ဆန်ရှင်ကိစ္စတွေဟာ လက်ရှိ နအဖ စစ်အုပ်စုကော၊ လက်ရှိ ကြံ့ဖွံ့အစိုးရကော မလိုချင်ဆုံးအရာပဲ။ အဲဒီအပေါ်မှာ ဩစတြေးလျအစိုးရကို ဆန်ရှင်ပိတ်ဆို့ဒဏ်ခတ်မှု ရုပ်သ်ိမ်းဖို့ ပြောမှာပဲ။ အဲဒီတော့ ဩစတြေးလျအစိုးရ အနေနဲ့ကလည်း ဒါတွေ ချမှတ်ထားတာက ဗမာနိုင်ငံမှာ နိုင်ငံရေးအကျဉ်းသားတွေ လွတ်မြောက်ဖို့အတွက်၊ နောက်ပြီးတော့ အမျိုးသား ပြန်လည်သင့်မြတ်ရေးအတွက် တွေ့ဆုံဆွေးနွေးရေးတွေ ဖြစ်ပေါ်လာအောင်၊ တိ်ုင်းရင်းသားလူမျိုးစုတွေကို လူ့အခွင့်အရေးချိုးဖောက်နေတဲ့ ကိစ္စတွေ ရပ်သွားအောင် ဆိုပြီးတော့ သူတို့ ဆန်ရှင်ပိတ်ဆို့မှုကို တောင်းဆိုထားတာဖြစ်တယ်။ အဲဒီတော့ ဒါတွေကို သူတို့က ပြန်ပြီးတော့ ပြောမယ်ဆိုရင်တော့ ဒီပိတ်ဆို့ဒဏ်ခတ်တဲ့ ကိစ္စတွေနဲ့ပဲ အပေးအယူအဖြစ်နဲ့ အများကြီးလျှော့ပေါ့ စဉ်းစားပေးနိုင်တယ်လို့ ကျနော်ယူဆပါတယ်။”
နောက်တချက်က နိုင်ငံခြားရေးဝန်ကြီး တယောက် ကိုယ်တိုင်က မသွားတာ ကြာပြီပေါ့လေ။ အခုသွားတယ်ဆိုတဲ့ဟာက ဒါက ဘယ်လောက်ထူးခြားတဲ့ ခရီးစဉ်လို့ ပြောလို့ရလဲ။ ဆိုလိုတာက နိုင်ငံခြားရေးပေါ်လစီက ဗမာပြည်နဲ့ ပတ်သက်ပြီးတော့မှ အကြီးအကျယ် ပြောင်းလဲသွားတဲ့ဟာမျိုး ဖြစ်သွားပြီလား ဒီနှစ်တွေထဲမှာ။
“ဒီ လေဘာအစိုးရ တက်လာပြီး နောက်ပိ်ုင်းမှာတော့ အရင်အစိုးရထက် စာရင်တော့ အပြောင်းအလဲတွေ ရှိပါတယ်။ သို့သော်လည်း ဩစတြေးလျ နိုင်ငံရေးမှာ ဘယ်ပါတီပဲ အစိုးရဖြစ်ဖြစ် သူတို့ရဲ့ နိုင်ငံခြားရေးမှုဝါဒက မြန်မာပြည်အပေါ်မှာ ထားရှိတာ အတူတူပါပဲ။ တစ်အချက်ကတော့ မြန်မာနိုင်ငံမှာ လူ့အခွင့်အရေးနဲ့ ဒီမိုကရေစီ ထွန်းကားလာအောင်၊ တွေ့ဆုံဆွေးနွေးရေးနဲ့ အမျိုးသားပြန်လည်သင့်မြတ်ရေး ဖြစ်ပေါ်လာအောင်ဆိုတဲ့ ရည်ရွယ်ချက်က ဘယ်အစိုးရတက်တက် တူတူပါပဲ။ နောက်တချက်က ဩစတြေးလျမှာရှိတဲ့ မြန်မာနိုင်ငံသား နှစ်သောင်းလောက်ရဲ့ တိုက်တွန်းနှိုးဆော်ချက်တွေကလည်း ဩစတြေးလျအစိုးရကနေ ဂရုစိုက်ရမယ့် အချက်တွေ ဖြစ်တယ်။ ဒီ နှစ်ချက်အပေါ်မှာ အခြေခံပြီးတော့ ဩစတြေးလျအစိုးရတိုင်း အစိုးရတိုင်းဟာ မြန်မာနိုင်ငံနဲ့ ပတ်သက်ပြီးတော့ နိုင်ငံခြားရေးမူဝါဒ ချမှတ်တဲ့အခါမှာ အမြဲတမ်းလိုလိုပဲ ဆင်တူယိုးမှား ရှိပတယ်။ တခုပဲ ရှိတာက စီးပွားရေးနဲ့ ပတ်သက်လာရင်တော့ အရင်အစိုးရကတော့ မြန်မာနိုင်ငံမှာ စီးပွားရေးလုပ်ဖို့အတွက် ပိုဆန္ဒများတယ်။ ဒါပေမယ့် လက်ရှိအစိုးရကတော့ မြန်မာနိုင်ငံမှာ စီးပွားရေးလုပ်ပါလို့လည်း မတိုက်တွန်းဘူး၊ မလုပ်ပါနဲ့လို့လည်း မပိတ်ပင်ဘူး။ တဖက်ကနေ စီးပွားရေးလုပ်ရင်တော့ ဥပဒေတွေက စီးပွားရေးလုပ်ငန်းတွေ အာမခံချက် မရှိဘူး၊ စီးပွားရေးလုပ်ငန်းတွေက အန္တရာယ်ရှိတယ်။ ဒါကြောင့်မို့လို့ သွားချင်တဲ့ ကုမ္ပဏီ၊ လုပ်ချင်တဲ့ ကုမ္ပဏီတွေက ကိုယ့်ဟာကိုယ် ဆုံးဖြတ်ပါဆိုပြီး အန္တရာယ်တွေကိုတော့ ကြိုတင်ပြောပြတဲ့အဆင့်ကိုတော့ သူတို့ သတိပေးပါတယ်။ ဆိုတော့ အခု သွားတဲ့ ကိစ္စကတော့ မြန်မာနိုင်ငံရေးကို တကယ်ပဲ နိုင်ငံခြားရေးဝန်းကြီးကိုယ်တိုင် ကိုယ်ကျ သွားရောက် စကားပြောပြီး တိုက်တွန်းနှိုးဆော်မယ်ဆိုတော့ ဒါက ထူးခြားလေးနက်တဲ့ ခရီးစဉ်လို့ ကျနော်တို့ မြင်ပါတယ်။ နောက်တချက်က ဒေါ်အောင်ဆန်းစုကြည်ကိုလည်း တွေ့ပြီးတော့ စကားပြောမယ့် ကိစ္စတွေ ရှိလာတဲ့အခါကျတော့ ဘာပြောပြော ကနေ့ မြန်မာနိုင်ငံမှာ ဖြစ်နေတဲ့ လွှတ်တော်နိုင်ငံရေး ပြင်ပမှာရှိတဲ့ အထင်ကရ နိုင်ငံရေးအင်အားစုတွေ အကုန်လုံးကို အသိအမှတ်ပြုတဲ့ ပုံစံမျိုးနဲ့ တလေး တစား ဆက်ဆံတဲ့ ကိစ္စမို့လို့ ဒါကလည်း အရေးကြီးတဲ့ ခရီးစဉ်လို့ ကျနော်တို့ သုံးသပ်ပါတယ်။”
Burma Campaign Australia ကကော ဒီခရီးစဉ်မတိုင်ခင်မှာ သူ့ကို သတင်းစကား ပါးလိုက်တာမျိုး၊ တိုက်တွန်းလိုက်တာမျိုး လုပ်ခွင့်ရခဲ့ပါသလား။
“ဟုတ်ကဲ့ ကျနော်တို့ မေလ ၁၂ ရက်နေ့တုန်းက နိုင်ငံခြားရေးဝန်ကြီး ကင်ဗင်ရတ်နဲ့ ကျနော်တို့ ဖယ်ဒရယ်ပါလီမန်ထဲမှာ တိုက်ရိုက် မျက်နှာချင်းဆိုင် တွေ့ဆုံ ဆွေးနွေးခဲ့ပါတယ်။ အဲဒီတုန်းကတော့ ကျနော်တို့ နယ်စပ်ဖြတ်ကျော်ပြီးတော့ မြန်မာပြည်က တိုင်းရင်းသားလူမျိုးစုတွေကို အကူအညီပေးဖို့ ဆိုတဲ့ ကိစ္စတွေကို အဓိက ထားပြီးတော့ ကျနော်တို့ ဆွေးနွေးခဲ့ပါတယ်။ တဖက်မှာလည်းပဲ မြန်မာနိုင်ငံမှာ ဒီမိုကရေစီရရှိရေး၊ တွေ့ဆုံဆွေးနွေးပြီးတော့ အမျိုးသားပြန်လည်သင့်မြတ်ရေး၊ လူ့အခွင့်အရေးတွေကို လေးစားလိုက်နာရေး၊ နိုင်ငံရေးအကျဉ်းသား လွတ်မြောက်ရေးတွေ အကုန်လုံးကို ကျနော်တို့ သေချာဆွေးနွေးပြီးတော့ ဒါတွေကို ရအောင် ဆက်ပြီးတော့ ကြိုးစားပေးပါလို့ ကျနော်တို့ သူ့ကို တိုက်တွန်းခဲ့ပါတယ်။”
source by : http://burmese.dvb.no
