“ ပြည်သူ လူထုသို့ ပန်ကြားလွှာ ” (Generation Wave)

ပြည်သူလူထု အပေါင်း တို့ -

မြန်မာနိုင်ငံသည် ၁၉၆၂ ခုနှစ် အာဏာသိမ်း စစ်ကောင်စီ အစိုးရ လက်ထက်မှ ယနေ့အချိန်ထိ စစ်အာဏာရှင် အဆက်ဆက် အုပ်ချုပ်မှု အောက်တွင် ဒုက္ခ အမျိုးမျိုးဖြင့် ရင်ဆိုင် ကြုံတွေ့ ခဲ့ကြရပြီး ဖြစ်ပါသည်။

၂၀၁၀ ခုနှစ် နိုဝင်ဘာလ (၇)ရက် နေ့တွင် ကျင်းပမည့် ရွေးကောက်ပွဲသည် စစ်အာဏာရှင် စနစ် သက်ဆိုး ရှည်စေရန် ရည်ရွယ်၍ ပြုလုပ်သော ဒီမိုကရေစီ ဟန်ပြ ရွေးကောက်ပွဲသာ ဖြစ်သည်ကို ပြည်သူ အပေါင်းတို့မှ သိရှိ နားလည် ကြမည် ဖြစ်ပါသည်။

ဆန္ဒမဲ ပေးခြင်း ဆိုသည်မှာ မိမိသဘော ဆန္ဒ အလျောက် လွတ်လပ်စွာ ဆုံးဖြတ် ရွေးချယ်ခြင်း၊ မိမိဆန္ဒကို လွတ်လပ်စွာ ထုတ်ဖော်ခြင်း ဖြစ်သည်။ ကြိုက်ခြင်း၊ မကြိုက်ခြင်း ၊သဘောတူခြင်း၊ ကန့်ကွက်ခြင်း တို့ကို ဖော်ထုတ် ပြသနိုင်ရန် မည်သည့် အရာနှင့်မျှ ပိတ်ပင် တားဆီး၍ မရသော မွေးရာပါ အခွင့်အရေး ဖြစ်ပါသည်။

အပြည်ပြည်ဆိုင်ရာ လူ့အခွင့်အရေး ကြေညာချက် အပိုဒ် (၂၁)အရ သော်လည်းကောင်း၊ စစ်အစိုးရမှ ရေးဆွဲ ပြဌာန်းထားသော ဖွဲ့စည်းပုံ အခြေခံ ဥပဒေပါ အခန်း (၉) ရွေးချယ် တင်မြှောက်ခြင်း ဆိုင်ရာ ဥပဒေ ပုဒ်မ -(၃၉၁)၊ ပုဒ်မခွဲ (က) အရ သော်လည်းကောင်း၊ “အရွယ် ရောက်ပြီး သူတိုင်း ဆန္ဒမဲ ပေးပိုင်ခွင့် ရှိသည်” ဟု တိကျစွာ ဖော်ပြထား ပါသည်။ စစ်အစိုးရ ကိုယ်တိုင် ထုတ်ပြန် ထားသော ပြည်သူ့ လွှတ်တော် ရွေးကောက်ပွဲ ဥပဒေ အခန်း (၁) ၊ပုဒ်မ(၂) ၊အပိုဒ် (ဎ)ရွေးကောက်မူ ဆိုင်ရာ အခွင့်အရေးတွင် “ရွေးကောက်ပွဲတွင် ကိုယ်စားလှယ် လောင်းများ အဖြစ် ပါဝင် ယှဉ်ပြိုင်နိုင်သော အခွင့်အရေး၊ ပါဝင် ယှဉ်ပြိုင်ခြင်း မပြုသော အခွင့်အရေး၊ လွှတ်တော် ကိုယ်စားလှယ်လောင်းများ အဖြစ်မှ နုတ်ထွက် နိုင်သော အခွင့်အရေး၊ ရွေးကောက်ပွဲတွင် မဲပေးနိုင်သော အခွင့်အရေး (သို့မဟုတ်) မဲပေးခြင်းမပြုဘဲ နေနိုင်သော အခွင့်အရေး” ဟု ဖော်ပြ ထားပြီး ဖြစ်ပါသည်။

ပြည်သူ့ လွှတ်တော် ရွေးကောက်ပွဲ ဥပဒေ အခန်း(၁၃) ၊ရွေးကောက်ပွဲ ဆိုင်ရာ ပြစ်မှုများနှင့် ပြစ်ဒဏ်များ ခေါင်းစဉ် ပါ ပုဒ်မ(၅၇)၌” မည်သူ မဆို ရွေးကောက်ပွဲများတွင် ပုဂ္ဂိုလ် တစ်ဦး၏ ဆန္ဒမဲ ပေးပိုင်ခွင့်နှင့် တင်မြှောက် ပိုင်ခွင့် တို့ကို ကျင့်သုံးခြင်း မပြုနိုင်စေရန် အကြမ်းဖက်ခြင်း၊ ခြိမ်းခြောက်ခြင်း၊ မလျော် သြဇာ သုံးခြင်း ၊ လိမ်လည် လှည့်ဖျားခြင်း၊ လာဘ်ပေးခြင်း (သို့မဟုတ်) လာဘ်ယူခြင်း တို့ကို ပြုလုပ်ကြောင်း ပြစ်မှု ထင်ရှား စီရင်ခံရလျှင် ၊ ထိုသူအား တစ်နှစ်ထက် မပိုသော ထောင်ဒဏ် ဖြစ်စေ၊ ကျပ်တစ်သိန်းထက် မပိုသော ငွေဒဏ်ဖြစ်စေ၊ ဒဏ်နှစ်ရပ်လုံး ဖြစ်စေ ချမှတ်ရမည် “ဟု ဖော်ပြထားပြီး ဖြစ်ပါသည်။

ပြည်သူ လူထု အပေါင်းတို့ -

၁၉၉၀ ပြည့်နှစ် အထွေထွေ ရွေးကောက်ပွဲကြီးတွင် အနိုင်ရရှိခဲ့သော အမျိုးသား ဒီမိုကရေစီ အဖွဲ့ချုပ် (NLD) မှ ရွေးကောက်ပွဲအား သပိတ် မှောက်ကြောင်း ၂၀၁၀ ခုနှစ် သြဂုတ်လ(၁၉)ရက်နေ့တွင် တရားဝင် ထုတ်ဖော် ပြောကြားခဲ့ပြီး ပြည်သူ လူထုအား ရွေးကောက်ပွဲအား သပိတ် မှောက်ကြရန် ရှင်းလင်း ပြောဆို ပန်ကြား ထားပြီး ဖြစ်ပါသည်။ တရားဝင် ပါတီအဖြစ် ဖွဲ့စည်း တည်ထောင်ခွင့် ရထားသော နိုင်ငံရေး ပါတီ အချို့မှ ကိုယ်စားလှယ်လောင်းများ သည်ပင်လျင် တရားမျှတမှု မရှိသည့် ဥပဒေများကြောင့် ၀င်ရောက် ရွေးချယ် ခံတော့မည် မဟုတ်ကြောင်း တရားဝင် ထုတ်ပြန် ကြေညာခဲ့ပြီး ဖြစ်ပါသည်။

ပြည်သူ လူထုများ အနေဖြင့်လည်း တိုင်းပြည်၏ ကံကြမ္မာနှင့် မိမိတို့ အနာဂတ် အတွက် မိမိတို့ လိုချင်သော အရာများကို ရွေးချယ်ပိုင်ခွင့် မရရှိပဲ၊ မိမိတို့ ဘေးအန္တရာယ် ကျရောက်စေမည့် ရွေးချယ်မှုများအား လက်မခံ ၊ ပူးပေါင်း ပါဝင်မှု မလုပ်ကြောင်း ကန့်ကွက် ဆန္ဒပြမှုဖြင့် ပြည်သူ လူထု တစ်ရပ်လုံး၏ သဘောထားကို ထုတ်ဖော် ပြသ ရပါမည်။

• မဲရုံသို့ ဆန္ဒမဲ သွားရောက်မပေးခြင်း။
• ဆန္ဒမဲ ပေးပိုင်ခွင့်အား နည်းအမျိုးမျိုးဖြင့် ဟန့်တား နှောက်ယှက် ဖျက်ဆီးခြင်း၊ လိမ်လည်မှု ပြုခြင်း၊ ဖိအားပေးခြင်း၊ ခြိမ်းခြောက် အကြပ်ကိုင်ခြင်း ပြုလုပ်သူများကို စောင့်ကြည့် ဖော်ထုတ် တိုင်ကြားမှုများ ပြုလုပ်ခြင်း။
• စစ်အာဏာရှင် သြဇာအောက်၌ တိုက်ရိုက် ရောက်ရှိနေသူ ပြည်သူများ အနေဖြင့် အတင်းအကျပ် ဖိအား ပေးမှုများကြောင့် မဲထည့် ရလျှင် မိမိ ဆန္ဒမဲပြားများအား ပယ်မဲဖြစ်အောင် ပြုလုပ်ခြင်း။
  
• ၂၀၁၀ စာလုံးပေါ်တွင် ကြက်ခြေခတ် အမှတ်အသား (2010 ) အား မိမိ သွားလာလှုပ်ရှားရာ နေရာများတွင် နည်းလမ်းမျိုးစုံ သုံးပြီး ပေါ်လွင်အောင် ရေးခြယ် ပြုလုပ်ခြင်း ဖြင့် ကြိုတင် ဆန္ဒပြ ကန့်ကွက်ကြောင်းကို ထုတ်ဖော် ပြသ၍ စစ်ကျွန်ဘ၀မှ လွတ်မြောက်ပြီး မိမိတို့နှင့် ထိုက်တန်သော အစိုးရအား လွတ်လပ်စွာ ရွေးချယ် တင်မြှောက်နိုင်ရေး အတွက် သွေးစည်း ညီညွတ်စွာ လုပ်ဆောင် ကြရန် တိုက်တွန်း နှိုးဆော် အပ်ပါသည်။

Generation wave

“ဤပန်ကြားလွှာအား လက်ဆင့်ကမ်း ဖြန့်ဝေခြင်းဖြင့်

လက်တွဲ တိုက်ပွဲ ၀င်ကြပါစို့”