ဒေါ်စု အမှုနှင့် သူတို့အသံများ
ကိုဝိုင်း
ကြာသပတေးနေ့၊ မေလ 14 2009 17:43 - မြန်မာစံတော်ချိန်
ချင်းမိုင် (မဇ္ဈိမ)။ ။ မြန်မာ့ဒီမိုကရေစီ ခေါင်းဆောင်နှင့် အမျိုးသား ဒီမိုကရေစီအဖွဲ့ချုပ် အထွေထွေ အတွင်းရေးမှူး ဒေါ်အောင်ဆန်းစုကြည်အား နအဖ စစ်အစိုးရက နိုင်ငံတော်အား နှောင့်ယှက် ဖျက်ဆီးလိုသူများအား ကာကွယ် စောင့်ရှောက်သည့် ဥပဒေ ပုဒ်မ ၂၂ ဖြင့် ယနေ့ တရားစွဲဆိုလိုက်ခြင်းနှင့် ပတ်သက်၍ နိုင်ငံရေး ခေါင်းဆောင်အချို့၏ အမြင်သဘောထားများကို မဇ္ဈိမသတင်းထောက် ကိုဝိုင်းက မေးမြန်းတင်ပြထားပါသည်။
ဦးအေးသာအောင်
(အတွင်းရေးမှူး၊ လွှတ်တော် ကိုယ်စားပြု ကော်မတီ - စီအာပီပီ)
ကန့်သတ်ချက်ကို ချိုးဖောက်တယ် ဆိုတာက ကျနော့်အမြင် ပြောမယ်ဆိုရင် ဒေါ်အောင်ဆန်းစုကြည်ဟာ အထိန်းသိမ်း ခံထားရတဲ့ ပုဂ္ဂိုလ်ဖြစ်တယ်။ ထိန်းသိမ်းထားတဲ့ အာဏာပိုင်တွေမှာ သူတို့ ထိန်းသိမ်းထားတဲ့ ပုဂ္ဂိုလ်ရဲ့ လုံခြုံရေးအတွက် တာဝန်ရှိတယ်။ အဲဒီတော့ အမေရိကန် နိုင်ငံသားဆိုတဲ့ ပုဂ္ဂိုလ်က ခိုးပြီး ဝင်ရောက်လာနိုင်တယ်ဆိုတာ လုံခြုံရေး တာဝန်ရှိတဲ့ လူတွေမှာပဲ တာဝန်ရှိတယ်။ အကယ်၍ပေါ့၊ လူတယောက်က ဝင်ပြီးတော့ အမျိုးသမီးတွေပဲ ရှိနေတဲ့နေရာဆိုတော့ ဘာမှ ထိထိရောက်ရောက် ခုခံနိုင်မယ့် အနေအထားက မရှိဘူးလေ။
ဦးခွန်မြင့်ထွန်း
(နိုင်ငံရေးအကျဉ်းသမားဟောင်း)
(ပြည်သူ့လွှတ်တော် ကိုယ်စားလှယ်၊ အန်အယ်ဒီ သထုံမြို့နယ် မဲဆန္ဒနယ် အမှတ် - ၁)
ဒေါ်အောင်ဆန်းစုကြည်နဲ့ အဖွဲ့ချုပ်အဖွဲ့ဝင်တွေ၊ ဒီမိုကရေစီအရေး လှုပ်ရှားတဲ့သူတွေကို ဒီပဲယင်းမှာ တကယ်ကို အသေသတ်ဖို့ ကြံခဲ့တာပဲ။ ဒေါ်အောင်ဆန်းစုကြည်က ကံကြီးလွန်းလို့ အသက်ရှင်ခဲ့တာကိုး။ ဒီပဲယင်း လုပ်ကြံမှုဖြစ်ကတည်းက ကျနော်တို့ ဗမာပြည်မှာ တွေ့ဆုံဆွေးနွေးရေးကို နအဖ က လက်မခံဘူးဆိုတာကို ပြတ်ပြတ်သားသား ပြလိုက်တာ။ နောက်တခါ ဒေါ်အောင်ဆန်းစုကြည်ကို မတရားဖမ်းဆီးထားတာကနေ ထပ်ပြီးတော့မှ အမှုဆင်ပြီးတော့ ဒီလို ထပ်ပြီးတော့ လုပ်ကြံ စွပ်စွဲပြီးတော့ ထောင်ဒဏ်အပြစ်ပေးမယ် ဆိုတာကတော့ နအဖ က ၁၉၉ဝ ပြည့်နှစ် ရွေးကောက်ပွဲ ရလဒ်ကို အတိအလင်း ချိုးဖောက်ဖျက်ဆီးလိုက်တာ ဖြစ်တယ်။
ပြီးတော့ တွေ့ဆုံဆွေးနွေးရေးလုပ်ဖို့ သူ့မှာ ဘယ်လိုမှ သဘောထားမရှိဘူးဆိုတာ အားလုံးသိအောင် ရှင်းရှင်းလင်းလင်း ပြောတာဖြစ်ပါတယ်။ နောက် ဒီတိုင်းပြည်မှာ ကိုမင်းကိုနိုင်တို့၊ ဦးဂမ္ဘီရတို့၊ ဦးခွန်ထွန်းဦးတို့ အပါအဝင်ပေါ့၊ ပုဂ္ဂိုလ်တွေက တကယ့်တကယ် အပြစ်ရှိလို့ ထောင်ကျနေတာ မဟုတ်ဘူး။ အားလုံးက ဒီလို အမှုဆင်ပြီး ထောင်ချတာဖြစ်တယ်။ နအဖ အနေနဲ့ကတော့ ဒီဥစ္စာ Crime against Humanity ဥပဒေကို ချိုးဖောက်တာပါပဲ။ အပြစ်မရှိတဲ့သူကို အပြစ်ရှာပြီး ထောင်ချတာကိုက ရာဇဝတ်မှု ကျူးလွန်တာဖြစ်ပါတယ်။ ဒေါ်အောင်ဆန်းစုကြည်ကို ရုံးထုတ်ပြီ ဆိုကတည်းကိုက ထောင်ချဖို့ကတော့ သေချာပါပြီ။ သူတို့ ထောင်ချမှာပဲ။
ရဲဘော်ဖိုးသံချောင်း
(ပြောခွင့်ရ ပုဂ္ဂိုလ်၊ ဗမာပြည်ကွန်မြူနစ်ပါတီ)
ပြောချင်တာကတော့ အချက်အလက် ကျနော်တို့ သိရတာ သိပ်နည်းသေးတယ်။ နအဖ ကလည်း သေချာကို ဖုံးထားတဲ့ သဘောမျိုး ရှိတယ်။ နအဖ ဖုံးထားတယ်ဆိုတဲ့အထဲမှာ ဒီလူအကြောင်းကို ဒေါက်တာတင်မျိုးဝင်း report လုပ်ပြီးသားဆိုတဲ့ဟာနဲ့ ပတ်သက်ပြီး နအဖ က အဲဒါကို အပြည့်အစုံ ဖော်ထုတ်ရမယ်။ ဘာတွေ report လုပ်ခဲ့တယ်ဆိုတဲ့ဟာ။ ဒေါက်တာတင်မျိုးဝင်း report လုပ်ပြီးသားဆိုရင် သူတို့ ဘာလို့ ဗီဇာထုတ်ပေးသလဲ။ တကယ်လို့ ဒီလူအကြောင်း နအဖ သိထားလို့ရှိရင် ဘာလို့ ဗီဇာပေးပြီး အဝင်ခံလဲ။ ဒီလူကို ဗီဇာငြင်းပယ်လိုက်ရင် ရတဲ့ဟာကို။ တိုင်းပြည်ထဲကို ခိုးဝင်လာတာမှ မဟုတ်ဘဲ။ သံသယ ရှိစရာတွေ အများကြီး ရှိနေတယ်။
ကျနော်တို့ ကတော့ ဒီကိစ္စကို ကိုယ့်ပြည်တွင်း ပြည်သူလူထုနဲ့ ဘယ်လို စည်းရုံးရမလဲ။ ပြည်တွင်း ပြည်သူလူထုရဲ့ အင်အားနဲ့ ဒီကိစ္စကို အောင်မြင်အောင် ဆောင်ရွက်နိုင်မယ်လို့ ယူဆတယ်။ ပြည်ပက မတတ်နိုင်ဘူး။ နအဖ အကွက်ထဲကို ကွက်တိပဲ ဝင်နေတာ။ ဆန္ဒပြရမယ်ဆိုပြီး ကျနော် အတိအကျကြီး ပြောနေတာမဟုတ်ဘူး။ ပြည်သူလူထုက သူတို့ရဲ့ နိုးကြားမှုကို ဖော်ပြတဲ့၊ သူတို့ရဲ့ စိတ်ဝင်စားမှုကို ဖော်ပြတဲ့၊ သူတို့ရဲ့ ဆန့်ကျင်မှုကို ဖော်ပြတဲ့ နည်းနာပေါင်းစုံသုံးပြီး ဒီကိစ္စ လုပ်မှရမယ်လို့ ထင်တယ်။
ဦးမဟော်ခွန်ဆာ
(အထွေထွေအတွင်းရေးမှူး၊ တိုင်းရင်းသားလူမျိုးများ ကောင်စီ - အီးအန်စီ)
ကျနော်တို့မြင်တာက ဒေါ်စုက တနိုင်ငံလုံး အတိုင်းအတာအနေနဲ့ နိုင်ငံရေးအရလည်း ယုံကြည်မှုရှိကြတယ်။ ဒေါ်စုရဲ့ သြဇာလည်း လွှမ်းမိုးနိုင်တယ်။ စစ်အစိုးရက သူတို့ရဲ့ အာဏာတည်မြဲရေးအတွက် ၂ဝဝ၈ အခြေခံဥပဒေကို လုပ်လိုက်တယ်။ အဲဒီ ဥပဒေအရ ၂ဝ၁ဝ ခု ရွေးကောက်ပွဲကို လုပ်မှာဖြစ်တယ်။ ဒေါ်စုအပိုင်းနဲ့ ပတ်သက်လို့ ကျနော်တို့ သိထားတာက သူ့ကို ချုပ်ထားတဲ့ ဥပဒေဟာ၊ ချုပ်ထားမှုဟာ အခု မေလအတွင်းမှာ ဒီကိစ္စက ပြည့်သွားမယ်။ ပြည့်သွားမယ်ဆိုရင် ဘာပဲပြောပြော ဒေါ်စုကို ပြန်လွှတ်ပေးရမယ်။ ပြန်လွှတ်ပေးရမယ်ဆိုတော့ သူ့ရဲ့ သြဇာအရှိန်အဝါကို သိတဲ့အတွက်ကြောင့်မို့လို့ သူတို့အနေနဲ့ ဒေါ်စုကို ၂ဝ၁ဝ ရွေးကောက်ပွဲမှာ အနှောင့်အယှက် အဟန့်အတားမဖြစ်ဖို့အတွက် အကြောင်းအမျိုးမျိုးပြပြီးတော့မှ ဖမ်းဆီးလိမ့်မယ်လို့ ကျနော်တို့ နဂိုကတည်းက တွက်ထားတယ်။ အဲဒါကြောင့် အခု ဒီဖမ်းဆီးမှုဟာလည်း ၂ဝ၁ဝ ရွေးကောက်ပွဲမှာ စိတ်ကြိုက် လုပ်ချင်သလို လုပ်နိုင်ဖို့အတွက် ဒေါ်စုကို ထိန်းသိမ်းနိုင်ဖို့၊ ဖမ်းဆီးထားနိုင်ဖို့အတွက် ဒါအကြောင်းပြုပြီးမှ လုပ်တာပဲလို့ ကျနော်တို့က ယူဆတယ်လေ။
မှတ်ချက် ။ ။ http://www.mizzimaburmese.com မှ ကူးယူ မျှဝေပါသည်။
