ပြည်တွင်း ပြည်ပရှိ နိုင်ငံရေး အင်အားစုများ အဖွဲ့များ အပါအ၀င် ပြည်သူ လူထု ရဟန်း သံယာတော်များ ကျောင်းသား လူငယ်များ သိသာစေရန် ယခု အိတ်ဖွင့် ပေးစာအား ပေးပို့ပါသည်။ ကျွန်တော်သည် စစ်အာဏာရှင် တိုက်ဖျက်ရေး လူထု လှုပ်ရှားမှု ကော်မတီတွင် ပါဝင်သော ၂၀၁၀ လှုပ်ရှားမှု ကော်မတီ (ပြည်တွင်း)၏ တာဝန်ခံ ဖြစ်ပါသည်။
၁၀.၁၀.၂၀၁၀ ရက်နေ့တွင် ထုတ်ပြန် ခဲ့သော သုံးရောင်ခြယ် ကျောင်းသားများ အဖွဲ့၏ ထုတ်ပြန် ကြော်ငြာချက်အား ဖတ်ရှုရသောအခါ ကြော်ငြာချက်တွင် ပါဝင်သော တောင်းဆိုမှု သုံးချက်သည် လက်ရှိ ပြည်တွင်း နိုင်ငံရေးအတွက် အဓိကကျသော တောင်းဆိုမှုများ ဖြစ်သည့်အတွက် ထိုတောင်းဆိုမှုများအား လေးနက်စွာ ယုံကြည်ထောက်ခံပါသည်။ သုံးရောင်ခြယ် ကျောင်းသားများအဖွဲ့တွင် ပါဝင်သော လုပ်ဖော်ကိုင်ဖက်များကိုလည်း လေးစားပါသည်။ သို့သော် လည်း ၁၃.၁၀.၂၀၁၀ ရက်စွဲဖြင့် သုံးရောင်ခြယ် ကျောင်းသားများ အဖွဲ့ဟု ဒုတိယမြောက် ထုတ်ပြန် ကြော်ငြာချက်ကို ထပ်မံ ဖတ်ရှု ရပါသည်။
ဒုတိယမြောက် ကြော်ငြာချက်တွင် ပြည်သူ့ ကိုယ်စားလှယ်များ ဒီမိုကရေစီ ခေါင်းဆောင်များကို စော်ကား ထားသည့်အပြင် မတရားသည့် ဥပဒေဖြင့် ကျင်းပပြုလုပ်မည့် ၂၀၁၀ ရွေးကောက်ပွဲအား ထောက်ခံ ရန်လည်း ရေးသားထားပါသည်။ ထို့ကြောင့် ကြောငြာချက် နှစ်ခုတွင် ဒုတိယမြောက် ကြော်ငြာချက်သည် ပထမ ကြော်ငြာချက်ကို ထုတ်ပြန်ခဲ့သော သုံးရောင်ခြယ် ကျောင်းသားများ အဖွဲ့အား စော်ကား ပုတ်ခက် နိုင်ငံရေး သိက္ခာ ချရန် လူပုဂ္ဂိုလ်တစ်ဦး တစ်ယောက်၊ အဖွဲ့အစည်း တစ်ခုခုမှ လုပ်ကြံ ရေးသားထားသော ထုတ်ပြန်ချက် ဖြစ်ကြောင်းတွေ့ရှိ ရသည်။
ထို ဒုတိယမြောက် ကြော်ငြာချက်အား လုပ်ကြံရေးသားခဲ့သူ နိုင်ငံရေး သစ္စာဖောက် အားမိမိတို့ ၂၀၁၀ လှုပ်ရှားမှု ကော်မတီမှ ပြင်းထန်စွာ ရှုတ်ချ ကန့်ကွက်ကြောင်း၊ ပထမ ကြော်ငြာချက် ထုတ်ပြန် ခဲ့သော သုံးရောင်ခြယ် ကျောင်းသားများ အဖွဲ့အား လေးနက်စွာ ယုံကြည် ထောက်ခံကြောင်း ရေးသားပေးပို့ လိုက်ပါသည်။ ယခုကိစ္စနှင့် ပတ်သက်ပြီး ၁၀.၁၀.၂၀၁၀တွင် ထုတ်ပြန်ခဲ့သော သုံးရောင်ခြယ် ကျောင်းသားများ အဖွဲ့မှလည်း နိုင်ငံရေးသစ္စာဖောက်တရားခံအား ရှာဖွေဖော်ထုတ် ပေးပါရန် တောင်းဆိုပါသည်။ (ကြော်ငြာချက် နှစ်ခုအား ပူးတွဲ ဖတ်ရှုနိုင် ပါသည်။)
