ဒေါ်အောင်ဆန်းစုကြည်၏ အရေးကြီးသည့် ကြေညာချက် NLD ထုတ်ပြန်မည်
Wednesday, 11 November 2009 19:47 ကိုထွေး
အမျိုးသား ဒီမိုကရေစီ အဖွဲ့ချုပ် (NLD) ဗဟို အလုပ်အမှုဆောင် (CEC) များကို မြန်မာ နိုင်ငံအတွက် အကျိုးကျေးဇူးရှိမည့် အပြုသဘော ဆောင်သော ဆောင်ရွက်ချက် တခုကို ဆွေးနွေးရန် ဒေါ်အောင်ဆန်း စုကြည်က တင်ပြလိုက်ကြောင်း သိရသည်။
ယင်း CEC များနှင့် ဆွေးနွေးရန် ဆောင်ရွက်ချက်ကို ယနေ့ နံနက် ၁၀နာရီက သွားရောက်တွေ့ဆုံရာတွင် ဒေါ်အောင်ဆန်းစုကြည်က ပြောဆိုကြောင်း ဦးဉာဏ်ဝင်းက ဧရာဝတီသို့ ပြောသည်။
“ကျနော်တို့ ဒေါ်အောင်ဆန်းစုကြည်ရဲ့ ဆောင်ရွက်ချက်တခုရှိတယ်၊ အဲဒီဆောင်ရွက်ချက်ကို CEC ကို တင်ပြ ထားတယ်၊ CEC က တနင်္လာနေ့မှာ ဆွေးနွေးမှာပါ၊ သဘောတူရင် အဲဒီထုတ်ပြန်ချက်ကို နိုဝင်ဘာ ၁၇ ရက်နေ့မှာ သတင်း ထုတ်ပြန်မှာပါ၊ အခုတင်ပြထားတဲ့ဟာ မြန်မာနိုင်ငံ အတွက် အကျိုးကျေးဇူးရှိပြီးတော့ အပြုသဘော ဆောင်တဲ့ အတွက် ဒါဟာ အရေးကြီးတယ်လို့ ဆိုရင်မှန်ပါတယ်” ဟု ဦးဉာဏ်ဝင်းက ဆိုသည်။
ယနေ့ နေ့လယ် ၁၂း၃၀ နာရီတွင် ရန်ကုန် ရွှေဂုံတိုင်ရှိ NLD ရုံးချုပ်၌ ၈၉ ကြိမ်မြောက် အမျိုးသားနေ့ အခမ်း အနားကို ကျင်းပခဲ့သည်။
အဆိုပါအခမ်းအနားသို့ တက်ရောက်လာကြသူ အားလုံး အထူးသဖြင့် နိုင်ငံရေး တာဝန်များကို ထမ်းဆောင် နေသည့်ကြားမှ တက်ရောက်လာသည့် ပြည်နယ်နှင့် တိုင်းအသီးသီးမှ အဖွဲ့ဝင်များကို ကျေးဇူးတင်သည်ဟု ဒေါ်အောင်ဆန်းစုကြည်က သ၀ဏ်လွှာပါးလိုက်ကြောင်း ပြန်ကြားရေး အဖွဲဝင် ဦးအုန်းကြိုင်က ဆိုသည်။
“အဲဒါပြီးတော့ အမျိုးသားနေ့ အထိမ်းအမှတ် စာပေဟောပြောပွဲလုပ်ပါတယ်၊ ကဗျာဆရာ ကိုလေး (အင်းဝဂုဏ်ရည်)နဲ့ မကြာသေးမီက ထောင်ကလွတ်လာတဲ့ ကဗျာဆရာ စာရေး ဆရာ မုံရွာ အောင်ရှင်တို့က ဟောပြောပါတယ်” ဟု ဦးအုန်းကြိုင်က ပြောသည်။
ယင်းအခမ်းအနားသို့ NLD အဖွဲ့မှ နာမကျန်းသည့် ခေါင်းဆောင် တချို့မှလွဲ၍ ပြည်နယ်၊ တိုင်း၊ မြိုနယ် အသီးသီးမှ NLD ခေါင်းဆောင်များနှင့် အဖွဲ့ဝင်များ၊ တိုင်းရင်းသားခေါင်းဆောင်များ၊ ပြည်သူ့လွှတ်တော်ပါတီ အဖွဲ့ဝင်များ၊ ၀ါရင့် နိုင်ငံရေးသမားများ အဖွဲ့မှ ခေါင်းဆောင်များ စုစုပေါင်း ၁၀၀၀ ခန့် တက်ရောက်ခဲ့ကြကြောင်း သိရသည်။
အမျိုးသားနေ့အထိမ်းအမှတ် NLD က ထုတ်ပြန်သည့်ကြေညာချက်အမှတ်၂၈/၂၀၀၉တွင် ဒေါ်အောင်ဆန်းစုကြည်၊ ဦးတင်ဦး၊ တိုင်းရင်းသားခေါင်းဆောင်များ အပါအ၀င် ဖမ်းဆီးထားသော နိုင်ငံရေး အကျဉ်းသား အားလုံးလွှတ် ပေးရန် နိုင်ငံတော်အေးချမ်းသာယာရေးနှင့် ဖွံဖြိုးရေးကောင်စီကို တောင်းဆိုလိုက်သည်။
ထို့အပြင် နိုင်ငံရေးပါတီများ မှတ်ပုံတင်ခြင်း ဥပဒေနှင့်အညီ တရားဝင်ရပ်တည်ထားသည့် NLD ၏ အဆင့်ဆင့် သော ရုံးများကို ဥပဒေနှင့် ညီညွှတ်ခြင်းမရှိဘဲ ခေတ္တဆို၍ ယနေ့ထိ ကာလကြာရှည်စွာ ပိတ်ထားခြင်းမှ အမြန်ဆုံး ပြန်လည်ဖွင့်ပေးရန်၊ လွတ်လပ်စွာ စည်းရုံးခွင့်ပေးရန် ၊ တိုင်းရင်းသား နိုင်ငံရေးပါတီများ အပါအ၀င် ဖျက်သိမ်းခံ ထားရသည့် ပါတီများကို မှတ်ပုံတင်ခွင့်ပေး၍ လွတ်လပ်စွာ လှုပ်ရှားခွင့်ပေးရန်လည်း တောင်းဆိုထားသည်။
မှတ်ချက် ။ ။ http://www.irrawaddy.org မှ ကူးယူ မျှဝေပါသည်။
