တုပ်ကွေးလို့ ယူဆရတဲ့ ရောဂါဆန်းတမျိုး ဖာပွန်ခရိုင်မှာ
ကူးစက် ဖြစ်ပွားနေ
ကူးစက် ဖြစ်ပွားနေ
2009-10-08 ( RFA )
ကရင်ပြည်နယ် ဖာပွန်ခရိုင်ထဲက ကျေးရွာတချို့မှာ ကူးစက်နှုန်းအထူး မြန်ဆန်တဲ့ တုပ်ကွေးလို့ ယူဆရတဲ့ ရောဂါဆန်းတမျိုး ဖြစ်ပွားနေတယ်လို့ ဒေသခံ ကျန်းမာရေးအဖွဲ့တွေက ပြောပါတယ်။
အစိုးရ စစ်တပ်၏ လိုက်လံ တိုက်ခိုက် သတ်ဖြတ်မှုများကြောင့် တောတောင်များထဲတွင် ထွက်ပြေး ပုန်းအောင်းနေရသော ကရင်ရွာသူရွာသားများ။(Photo: Free Burma Rangers)
အဲဒီတုပ်ကွေးရောဂါဟာ ဖာပွန်ခရိုင် လူတော မြို့နယ် ယွန်းစလင်းမြစ်ရဲ့ အနောက်ဖက်ခြမ်းမှာ စတင်ဖြစ်ပွားနေတာဖြစ်ပြီး၊ အခုဆိုရင် မြစ်ရဲ့အရှေ့ဖက်ခြမ်းကိုပါ ကူးစက်ဖြစ်ပွားနေပြီလို့ သိရပါတယ်။ လောလောဆယ်အထိ ကျေးရွာ ၁ဝ ရွာလောက်မှာ ရောဂါဖြစ်ပွားသူ ၇ဝဝ လောက်နဲ့ သေဆုံးသူတဦး ရှိသွားပြီလို့ နယ်လှည့်ကျောပိုးအိတ် ကျန်းမာရေးလုပ်သားအဖွဲ့ ညွှန်ကြားရေးမှူး ဆရာမန်းမန်းက RFA ကို ဒီကနေ့ ပြောပါတယ်။
ဆရာမန်းမန်း။ ။ 'ဒီ ယွန်းစလင်းချောင်းရဲ့ ဒီဖက် အနောက်ဖက်ခြမ်းပေါ့နော်၊ အဲဒီမှာ ၇ ရွာ ၈ ရွာလောက် ကျွန်တော်တို့ အရင်တုန်းက ဖြစ်နေတယ်။ လူဦးရေ လူနာဦးရေ ၅ဝဝ ကျော်ကျော်လောက် ရှိတာပေါ့။ အဲဒါတွေကတော့ တစုံတရာ က္ဆွန်တော်တို့ အရေးယူ ဆောင်ရွက်ပေးလို့တော့ သက်သာမှုတော့ ရပြီ၊ သို့သော်လည်းပဲ နောက်ထပ် ယွန်းစလင်းချောင်းရဲ့ အရှေ့ဖက်ခြမ်းမှာပေါ့နော်၊ အဲဒီမှာ ၃၊ ၄ ရွာ တခါထပ် ဖြစ်လာတာကျွန်တော်တို့ ကြားသိရတယ်။ အဲဒါလည်း ကျွန်တော်တို့ အရေးယူ ဆောင်ရွက်ပေးဖို့လို့ ကျွန် တော်တို့ ကျန်းမာရေးဝန်ထမ်းတွေ စေလွှတ်ပြီးပြီပေါ့နော်။ ဒီကြားထဲမှာပဲ အဲဒီမှာပဲ အပြစ်ဖြစ်တဲ့ ရွာတွေမှာပဲ ၁၅ဝ- ၂ဝဝ လောက် ဖြစ်ရှိနေပြီ။ ဒီထဲမှာ ၇ နှစ် ရွာက ကလေးတယောက်ကလည်း ဆုံးသွားတယ်ပေါ့နော်။'
ရောဂါလက္ခဏာအရ တုပ်ကွေးလို့ လတ်တလော ယူဆရပေမဲ့ ရောဂါဇာစ်မြစ်ကို အတိအကျ သိရှိနိုင်ဖို့ ရောဂါပိုးနမူနာကို မဲဆောက်ဆေးရုံကတဆင့် ထိုင်းဆေးရုံတခုကို ပေးပို့ထားတယ်လို့ ဆရာမန်းမန်းက ပြောပါတယ်။
ဆရာမန်းမန်း။ ။ 'အဲဒီ လက္ခဏာအရကတော့ တုပ်ကွေးလို့တော့ ကျွန်တော်တို့ ပြောနိုင်ပါတယ်။ သို့သော်လည်းပဲ ပိုသေချာအောင် ဘယ်အမျိုးအစားလဲ ပေါ့နော်၊ H1N1 လား၊ H5N1 လား၊ H2N1 လား၊ အဲဒါတွေကို ကျွန်တော်တို့ ခွဲခြားရဦးမယ် ဆိုတဲ့အတွက် မဲဆောက်ဆေးရုံကတဆင့် သူတို့ ပို့လိုက်တယ်ပေါ့နော်။ အဲဒါလည်းပဲ ဒီ သူတို့ ဆောင်ရွက်ဖို့ကလည်း တပတ် ၁ဝ ရက်လောက် ကြာဦးမယ်တဲ့။ အဲဒီတော့ ကျွန်တော်တို့လည်း ဒါကို အချိန်စောင့် နေတယ်ပေါ့နော်။'
ရောဂါဖြစ်ပွားနေတဲ့ ကျေးရွာတွေဟာ ကေအန်ယူ တပ်မဟာ ၅ လက်အောက်ခံနယ်မြေထဲမှာ ဖြစ်ပြီး၊ စစ်အစိုးရရဲ့ ထိုးစစ်တွေကြောင့် ရွာသူရွာသားတွေ တောတောင်တွေထဲမှာ စုဝေးပုန်းအောင်းနေကြရာက ရောဂါဖြစ်ပွားမှု ဆိုးဝါးလာခဲ့ရတာ ဖြစ်တယ်လို့ ဒေသခံ ကျန်းမာရေးလုပ်သားတွေက ပြောပါတယ်။
လောလောဆယ်မှာ နယ်လှည့်ကျောပိုးအိတ် ကျန်းမာရေးလုပ်သားအဖွဲ့အပါအဝင် ဒေသခံ ကျန်းမာရေး အဖွဲ့အစည်းတွေက အဲဒီဒေသတွေဆီ သွားရောက်ပြီး ရောဂါထိန်းချုပ်ရေးနဲ့ ကာကွယ်ရေးလုပ်ငန်းတွေ သွားရောက် ကူညီဆောင်ရွက် ပေးနေကြတယ်လို့ သိရပါတယ်။
ဒီရောဂါဖြစ်ပွားမှုနဲ့ ပတ်သက်လို့ နယ်လှည့်ကျောပိုးအိတ် လုပ်သားအဖွဲ့ ညွန်ကြားရေးမှူး ဆရာမန်းမန်းနဲ့ ဆက်သွယ်မေးမြန်းထားပါတယ်။
ဆက်သွယ်မေးမြန်းချက် နားဆင်ရန် >>> ဒီမှာ ကလစ်ပါ ခင်ဗျား ...။
မှတ်ချက် ။ ။ http://www.rfa.org မှ ကူးယူ မျှဝေပါသည်။
