Wednesday, December 3, 2008

ပြည်တွင်းမှာ အလုပ်အကိုင် အလုံအလောက်ရှိဟုဆို

မြန်မာအလုပ်သမား နှစ်သန်းကျော် ပြည်ပနိုင်ငံများတွင် တရားမဝင် ရောက်ရှိ အလုပ်လုပ်နေကြကြောင်း မြန်မာ့အလင်း သတင်းစာက ထုတ်ပြန်ကြေညာသည်။ တရားဝင် စေလွှတ်ခဲ့သည့် အလုပ်သမားမှာ ၄၇၀၅၇ ဦးသာ ရှိပြီး သက်ဆိုင်ရာ နိုင်ငံများမှ ထုတ်ပြန်သည့် စာရင်းဇယားအရ ပြည်ပနိုင်ငံများတွင် အလုပ်လုပ်နေသော မြန်မာအလုပ်သမား နှစ်သန်းကျော် ရှိကြောင်း အစိုးရ သတင်းစာက ဖော်ပြထားသည်။

၁၀ တန်းအောင်နှင့် ဘွဲ့ရ မြန်မာလူငယ်များမှာ နိုင်ငံခြားထွက်ရန် ကြိုစားနေကြပြီး မိဘများ တတ်နိုင်မှုအပေါ် မူတည်ပြီး သွားလိုသည့် နိုင်ငံများ ကွဲပြားသည်ကို တွေ့ရသည်။ ကမ္ဘာ့စီးပွားရေးပြဿနာကြောင့် စင်ကာပူ နိုင်ငံတွင် အလုပ်လုပ်ခွင့်ပါမစ်၊ နေထိုင်ခွင့်များ ရရန် မလွယ်ကူတော့ခြင်း၊ အလည်အပတ် ဗီဇာဖြင့် သွားရောက်ကာ အလုပ်အကိုင် ရှာဖွေသူများ ဗီဇာသက်တမ်းအတွင်း အလုပ်မရဘဲ ပြန်လာရခြင်းများ ရှိနေသော်လည်း စင်ကာပူ သွားရောက်လိုသူ များပြားနေဆဲ ဖြစ်သည်။

“ယူအေအီးတို့ ကာတာတို့ဆို အရင်က လူသိပ်မသိဘူး။ အခု အဲဒီ သွားချင်တဲ့လူတွေ များလာပြီ။ ၁၀ တန်းအောင်တဲ့ ကျောင်းသားတွေက မိဘတတ်နိုင်ရင် စလုံးမှာ ပိုလီ သွားတက်ချင်တယ်။ ပိုလီပြီးရင် အလုပ်ရဖို့ သေချာတာကိုး။ လယ်လုပ် ယာလုပ်နေတဲ့ လူတွေတောင် ရှိတဲ့ယာ ပေါင်ပြီး မလေးရှား ထွက်တယ်။ တချို့ရွာတွေဆို လူငယ်တွေ တော်တော်များများ မလေးရှားရောက်ကုန်လို့ ရွာမှာ လူငယ်ရှားသွားတာ အရမ်းသိသာတယ်”ဟု နိုင်ငံခြားတွင် ကျောင်းလျှောက်ထားရန် ကြိုးစားနေသော လူငယ်တစ်ဦးက ပြောကြားသည်။ “ကုမ္ပဏီတွေမှာ အလုပ်လုပ်ရင် လေးငါးသောင်းပဲ ရမယ်။ မိဘလဲ လုပ်မကျွေးနိုင်ဘူး။ မိန်းမလဲ မယူနိုင်ဘူး။ နိုင်ငံခြားထွက်ရင် ဘာဖြစ်ဖြစ် ဒီထက်တော့ ရမှာပဲ”ဟု ဆက်လက် ပြောပြသည်။ ဆီအုန်းခြံ၊ ရော်ဘာခြံ၊ ကျွန်းနှင့် သစ်ထုတ်လုပ်ရေး၊ ငါးဖမ်းလုပ်ငန်း၊ ဆားလုပ်ငန်းများတွင်လည်း လုပ်သားလိုအပ်နေကြောင်း သတင်းစာပါ ကြေညာချက်နှင့် ပတ်သက်၍လည်း “ငါးဖမ်းတဲ့အလုပ်တော့ ငတ်သေပေ့စေ။ မလုပ်နိုင်ဘူး။ ဆီအုန်းနဲ့ ရော်ဘာခြံမှာတော့ သူတို့သားသမီးတွေ အရင်လုပ်ခိုင်းပေါ့”ဟု သိရသည်။

ရာဘာလုပ်ငန်းတွင် အလုပ်သမား နှစ်သိန်းခန့်သာ ရှိသေးပြီး သန်းချီ လိုအပ်ကြောင်းလည်း သတင်းစာတွင် ဖော်ပြထားသည်။ သို့သော် တနင်္သာရီတိုင်းမှ ဆီအုန်းနှင့် ရာဘာခြံ ပိုင်ရှင်များ၊ ဆားလုပ်ငန်းရှင်များမှာ အလုပ်သမားများ တစ်ဘက်နိုင်ငံ ရနောင်းမြို့သို့ သွားရောက် အလုပ်လုပ်ကိုင်ကြခြင်းကြောင့် ရေရှည် အလုပ်သမား မမြဲသည့် ပြဿနာ တွေ့ကြုံနေရသည်။ တစ်ဖက်နိုင်ငံတွင် ရရှိသော ဝင်ငွေမှာ နေ့စား ဘတ် ၈၀ မှ ၁၂၀၊ ၁၅၀ ထိ ရှိပြီး ရာဘာနှင့် ဆီအုန်းခြံ လုပ်သားအဖြစ် ရရှိသော ဝင်ငွေထက် များစွာ သာလွန်ကြောင်း သိရသည်။

ရန်ကုန်မြို့ ကွန်ပျူတာ ကုမ္ပဏီများတွင် ကွန်ပျူတာပညာရှင် ဝန်ထမ်းများ စင်ကာပူသို့ အစုလိုက်အပြုံလိုက် ထွက်ခွာမှုကြောင့် ဝန်ထမ်းပြဿနာ ပေါ်ပေါက်လျက် ရှိသည်။ အချို့ ကုမ္ပဏီများက နှစ်နှစ်၊ သုံးနှစ် စာချုပ်များချုပ်ပြီး အနည်းဆုံး လုပ်ရမည့်နှစ်ကို ကန့်သတ်သော်လည်း နှစ်ကန့်သတ်မှုကြောင့် အလုပ်မလုပ်လိုသူများ ရှိနေသည်။

“စာချုပ်နဲ့ လုပ်ခိုင်းပေမယ့် လခကျတော့ အရမ်းနည်းတယ်။ တချို့ဆို အလုပ်လာလျှောက်တဲ့လူငယ်တွေထဲမှာတောင် အိမ်ထောင်ရှိတယ်၊ သားသမီး ရှိတယ်ဆို သိပ်မခန့်ချင်ဘူး။ ရှာကျွေးရမယ့် မိသားစုရှိရင် ပိုက်ဆံပိုလိုတော့ လခနည်းတဲ့ အလုပ်မှာ ကြာကြာမလုပ်ဘူး။ ခုန်တယ်ပေါ့။ ၁၀ တန်းအောင်ကာစ မိဘကျွေးတာစားပြီး မုန်းဖိုးလောက် လခနဲ့ လုပ်ချင်တဲ့လူဆို ပိုခန့်တယ်”ဟု သိရသည်။


ဒီဇင်ဘာ ၃ ။ ရဲအောင်သော်

မျှဝေသူ ။ ။ နော်မန်
မှတ်ချက် ။ ။ http://www.hittaing.org မှ ကူးယူ မျှဝေပါ၏ ။