မလေးရှား ခရီးသွား ကားမှောက်၊ ၃၀ နီးပါး သေဆုံး

ထိုင်းနိုင်ငံက ခရီးသွားတွေကို သယ်ဆောင်လာတဲ့ ဘတ်စ်ကားတစီးဟာ မလေးရှားနိုင်ငံ အဝေးပြေးလမ်းမ တခုပေါ်မှာ တိမ်းမှောက်ပြီး စုစုပေါင်း ခရီးသွား ၂၆ ဦး သေဆုံးခဲ့တယ်လို့ မလေးရှားအစိုးရ အရာရှိတွေက ပြောလိုက်ပါတယ်။

မလေးရှားနိုင်ငံရဲ့ လူသိများ ထင်ရှားတဲ့ အပန်းဖြေ ဒေသတွေထဲက တခုဖြစ်တဲ့ ကမ်မရွန်း ဟိုက်လန်းခေါ် ကုန်းမြင့်ဒေသကို သွားရောက်လည်ပတ်ပြီး ကွာလာလမ်ပူမြို့တော်ကနေ လေယာဉ်စီးပြန်ဖို့ အပြန်လမ်းမှာ ဘတ်စ်ကား တိမ်းမှောက်ပြီး ခရီးသွားတချို့ သေဆုံးခဲ့ရတာ ဖြစ်ပါတယ်။

ယာဉ်မောင်းသူက အဝေးပြေးလမ်းလယ်မှာ ကာရံထားတဲ့ အကာအရံကို ၀င်တိုက်ပြီး အရှိန် မထိန်းနိုင်တဲ့အတွက် အဲဒီ နှစ်ထပ်ဘတ်စ်ကား တိမ်းချော်ပြီး မှောက်သွားခဲ့တယ်လို့ သိရပါတယ်။

ယာဉ်တိမ်းမှောက်တဲ့အတွက် ခရီးသည် ၂၂ ယောက် ပွဲချင်းပြီး သေဆုံးပြီး ၄ ယောက်ကတော့ ဆေးရုံကို ပို့တဲ့ လမ်းမှာ အသက်ဆုံးရှုံးခဲ့ရတယ်လို့ ဆိုပါတယ်။

သေဆုံးသူတွေထဲမှာ ယာဉ်မောင်းသူနဲ့ ခရီးသွား ကုမ္ပဏီဝန်ထမ်း မလေးရှားလူမျိုး ၂ယောက် လည်း ပါဝင်တယ်လို့ သိရပြီး နောက်ထပ် ခရီးသည် ၁၂ ယောက် ဒဏ်ရာရခဲ့တယ်လို့လည်း ဆိုပါတယ်။

ကမ္ဘာ့ကျန်းမာရေးအဖွဲ့ WHO ရဲ့ လေ့လာချက်အရ အရှေ့တောင်အာရှမှာ ယာဉ်သွားလာရေး အထောက်အကူ အမြင့်ဆုံးပေးထားတဲ့ မလေးရှားနိုင်ငံမှာ ဘတ်စ်ကား တိမ်းမှောက်မှုတွေဟာ ဖြစ်ရိုးဖြစ်စဉ် တရပ်လို ဖြစ်နေတယ်လို့ သိရပါတယ်။

နားဆင်ရန်

source by : http://www.voanews.com