Friday, March 4, 2011

ပြည်သူ့ တော်လှန်ရေး

တော်လှန်ရေးတရပ် အောင်မြင်မှုရှိရန်အတွက် တော်လှန်ရေးအလားအလာ၊ တော်လှန်ရေး အခြေအနေ၊ ဦးဆောင်မှုနှင့် အဖွဲ့အစည်း၊ လူထုထောက်ခံအားပေးမှု စသည်တို့အပြင် စစ်မျက်နှာအားလုံးကို ပေါင်းစပ်တိုက်ပွဲဝင်မှုမှာလည်း အလွန်အရေးကြီးလှသည်။ ပြည်သူ့တော်လှန်ရေး ဆင်နွှဲရာတွင် စစ်မျက်နှာ တခုတည်းကိုသာ အာရုံစိုက်၍ မရပါ။ နိုင်ငံရေး၊ စီးပွားရေး၊ လူမှုရေး၊ စစ်ရေးနှင့် နိုင်ငံတကာရေးရာ စစ်မျက်နှာအားလုံးတွင် ဘက်ပေါင်းစုံမှ ပြင်ဆင်တည်ဆောက် တိုက်ပွဲဝင်နိုင်မှသာ အောင်မြင်နိုင်သည့် ရာခိုင်နှုန်း မြင့်မားပါသည်။


တော်လှန်ရေး အလားအလာ

လူ့အဖွဲ့အစည်း၏ စီးပွားရေးအခြေအနေ ယိုယွင်းလာသည့် အချိန်အခါ (သို့မဟုတ်) အစိုးရအုပ်ချုပ်ရေး ယန္တရားများ လျော့ရဲနေသည့် အချိန်အခါ (သို့မဟုတ်) အစိုးရအပြောင်းအလဲများ ဖြစ်ပွားနေသည့် အချိန်အခါများတွင် တော်လှန်ရေးတရပ် ပေါ်ထွက်လာနိုင်သည့် အခွင့်အခါကောင်းနှင့် အလားအလာများ ရှိလာတတ်သည်။

မြန်မာနိုင်ငံတွင် အဆိုပါ တော်လှန်ရေးအလားအလာများ တည်ရှိနေပါသည်။ စီးပွားရေးအခြေအနေ ပျက်စီးမှု၊ ငွေကြေးဖောင်းပွမှု၊ လာဘ်ပေးလာဘ်ယူမှု၊ လူလတ်တန်းစား အရေအတွက် လျော့နည်းမှု၊ ရာဇ၀တ်မှုများ ထူပြောမှု၊ တိုင်းရင်းသား ပြည်သူများအား နှိပ်စက်ညှဉ်းပမ်းမှု စသည်တို့အပြင် အာဏာရှင် ရွေးကောက်ပွဲမှ ပေါ်ထွက်လာသော အတုအယောင်လွှတ်တော်ဖြင့် ရွှေရည်စိမ်ဒီမိုကရေစီ အသွင်ကူးပြောင်းမှုကို ပြုလုပ်နေချိန် ဖြစ်ရာ အာဏာရှင်အစိုးရအတွင်း အာဏာလုပွဲ အခင်းအကျင်းများဖြင့် ဒေါက်တိုင်ယန္တရားများ လျော့ရဲနေသည့် အချိန်အခါ ဖြစ်ပါသည်။

ယင်းသို့ တော်လှန်ရေး အလားအလာများ တည်ရှိပါက တော်လှန်ရေးအခြေအနေများ ပေါ်ထွက်လာရန် လိုအပ်ပါသည်။


တော်လှန်ရေး အခြေအနေ


တော်လှန်ရေးတရပ် ပေါ်ထွက်လာနိုင်သည့် အခြေအနေများမှာ

လူမှုအသင်းအပင်း အဖွဲ့အစည်းများ ပေါ်ထွက်လာခြင်း

မိမိတို့ ဘ၀ရပ်တည်ရေးနှင့် တိုးတက်ရေးကို အုပ်ချုပ်ရေးစနစ်က ဟန့်တားနေကြောင်း သိမြင်သူ များပြား လာခြင်း၊
စနစ်ကို ပြောင်းလဲရမည်ဟူသော အသိတရားများ ပြန့်ပွားလာခြင်း၊
အစိုးရအုပ်ချုပ်ရေး ယန္တရားများ ဖရိုဖရဲ ဖြစ်ခြင်း
အစိုးရဒေါက်တိုက် အဖွဲ့အစည်းများအတွင်း ပြောင်းလဲမှုလိုလားသူနှင့် မလိုလားသူများ အုပ်စုကွဲနေခြင်း
ရဲ၊ စစ်တပ်၊ ထောက်လှမ်းရေး စသည်တို့တွင် တာဝန်ထမ်းဆောင်သူများမှ တော်လှန်ရေး အင်အားစုများနှင့် ချိတ်ဆက် ပေါင်းစည်းလာခြင်း
စသည်တို့ ဖြစ်သည်။

မြန်မာပြည်သူလူထုသည် မိမိတို့၏ ဘ၀ ရပ်တည်ရေးနှင့် ဘ၀တိုးတက်ရေးကို စစ်အာဏာရှင်စနစ်က ချုပ်ချယ်ကန့်သတ်ထားကြောင်း သိမြင်ပြီး၊ အာဏာရှင်စနစ်ကို တိုက်ဖျက်နိုင်မှသာ ပြည်သူတရပ်လုံး၏ ဘ၀တိုးတက်သာယာ အေးချမ်းလာမည် ဖြစ်ကြောင်းကိုလဲ နားလည်ယုံကြည်ထားကြပါသည်။ စစ်အုပ်စုဘက်တွက်လည်း အုပ်ချုပ်ရေးယန္တရားများ ဖရိုဖရဲဖြစ်ခြင်း၊ အာဏာရှင်အသိုင်းအ၀ိုင်းအတွင်း အုပ်စုများ ကွဲနေခြင်း၊ မကျေမနပ်ဖြစ်မှုများ တိုးပွားနေခြင်း စသည်များ ဖြစ်ပွားနေပြီး တော်လှန်ရေးတရပ် ပေါ်ထွက်လာရန် အခြေအနေများက တောင်းဆိုလျက်ရှိပါသည်။


ဦးဆောင်မှုနှင့် တော်လှန်ရေးအဖွဲ့အစည်း


တော်လှန်ရေးတရပ်ကို အခြေအနေက တောင်းဆိုလာချိန်တွင် တော်လှန်ရေးဦးဆောင်မှုနှင့် တော်လှန်ရေး အဖွဲ့အစည်းများ၏ အခန်းကဏ္ဍမှာ အရေးကြီးလာပါသည်။ တော်လှန်ရေးဦးဆောင်မှု ဆိုရာတွင် ဦးဆောင်မှု သဘောသဘာဝကို သိရှိနားလည်ရန် လိုအပ်ပါသည်။ တော်လှန်ရေးတိုင်းတွင် တိုက်ပွဲများစွာ ပါဝင်လေ့ရှိပြီး၊ တိုက်ပွဲများစွာတွင်းမှ ခေါင်းဆောင်များစွာ ပေါ်ထွက်လာလေ့ ရှိပါသည်။ ယင်းသို့ ခေါင်းဆောင်များ အမြောက်အမြား ပေါ်ထွက်လာခြင်းမှာ ယေဘုယျအားဖြင့် ကောင်းမွန်သော်လည်း ရှေ့ပိုင်းတိုက်ပွဲ ခေါင်းဆောင်များကို နောက်ပိုင်းမျိုးဆက်များက အလွန်အကျွံ မှီခိုအားထားခြင်း၊ ပုဂ္ဂိုလ်ရေး ကိုးကွယ်ခြင်း ၊ ခေါင်းဆောင်များ ကွဲပြားမှုပေါ်မူတည်၍ ဂိုဏ်းဂဏ ကွဲပြားခြင်း စသည့် ဆိုးကျိုးများလည်း ဖြစ်ပွားစေတတ်ပါသည်။ ပို၍ ဆိုးသည်မှာ ရှေ့ပိုင်းတွင် ပေါ်ထွက်ခဲ့သော တိုက်ပွဲအစဉ်အဆက်မှ ခေါင်းဆောင်များကသာ တိုက်ပွဲများကို ဆက်လက်ဦးဆောင်ဖော်ထုတ်ရန် နောက်ပိုင်းမျိုးဆက်များမှ အားကိုးတကြီး မျှော်လင့်ချက် ထားရှိခြင်း ဖြစ်ပြီး၊ တိုက်ပွဲများ ဆက်လက် ပေါ်ထွက်ရေးသည် လက်ရှိတိုက်ပွဲ ခေါင်းဆောင်များ၏ တာဝန်ဟုသာ မှတ်ယူသွားခြင်း ဖြစ်လေသည်။ အဆိုပါအခြေအနေတွင် တော်လှန်ရေး မျိုးဆက်ပေါင်းကူးတံတား ကျိုးပျက်သွားသည်ဖြစ်ရာ အာဏာရှင်စနစ် ရေရှည်တည်တံ့ခိုင်မြဲရေးကို ထောက်ကူပေး လိုက်သကဲ့သို့ ဖြစ်သွားတတ်ပါသည်။

သို့ဖြစ်ရာ တိုက်ပွဲများကသာ ခေါင်းဆောင်များကို မွေးဖွားလေ့ရှိသည် ဟူသော တော်လှန်ရေးဦးဆောင်မှု သဘောသဘာဝ နှင့်အညီ တိုက်ပွဲများ စဉ်ဆက်မပြတ် ပေါ်ထွက်လာစေရေးကိုသာ ဦးတည်ကြိုးပမ်းကြရန် လိုအပ်ပါသည်။ အဆိုပါ သဘောသဘာဝကို လက်တွေ့မကျင့်သုံးနိုင်ပါက ရှိပြီးသား ခေါင်းဆောင်များအပေါ်တွင် ပုဂ္ဂိုလ်ရေး ကိုးကွယ်ခြင်း၊ ဂိုဏ်းဂဏ ခွဲခြားခြင်း၊ ခေါင်းဆောင်ရှာခြင်း၊ ခေါင်းဆောင်မျှော်ခြင်း၊ မျှော်လင့်ထားသလို ခေါင်းဆောင်က မပြုလုပ်နိုင်သည့်အခါ အပြစ်ဖို့ ဝေဖန်ခြင်း၊ စိတ်ဓာတ်ကျခြင်း၊ ရှေ့ပိုင်းမျိုးဆက် ခေါင်းဆောင်များကလဲ မိမိတို့က တိုက်ပွဲများကို ဦးဆောင်ဖန်တီးရမည်ဟု ထင်မြင်နေခြင်း စသည့် စိတ်ကြွ၊ စိတ်ကျ သံသရာတွင် လည်နေပြီး၊ တော်လှန်ရေးမှာလဲ ကျည်ဆန်ရှိလျက်နှင့် ပစ်၍မရသော သေနတ်စုတ်ကြီးကဲ့သို့ ဖြစ်နေတတ်ပါသည်။ သို့ဖြစ်ရာ တိုက်ပွဲများ စဉ်ဆက်မပြတ်ပေါ်ထွက်ရေးသည်သာ တော်လှန်ရေး၏ ပကတိ လိုအပ်ချက်ဖြစ်ကြောင်း သိရှိနားလည်ရန် လိုအပ်ပါသည်။

မြန်မာ့လွတ်လပ်ရေးကြိုးပမ်းမှု သမိုင်းတွင်လဲ ဤအချက်မှာ ထင်ရှားနေပါသည်။ တောင်သူလယ်သမား အရေးတော်ပုံကို ဆရာစံက ဦးဆောင်ခဲ့ခြင်း ဖြစ်ပါသည်။ ယင်းအချိန်က နိုင်ငံရေးခေါင်းဆောင်များမှာ ခွဲရေး၊ တွဲရေး အငြင်းပွား၍ တကွဲတပြား ဖြစ်နေကြပါသည်။ ဆရာစံကလဲ အဆိုပါ နိုင်ငံရေးခေါင်းဆောင်များ၏ တိုက်ပွဲခေါ်သံကို မစောင့်ခဲ့ပါ။ ဒုတိယကျောင်းသား သပိတ်ကိုလဲ ကျောင်းသားခေါင်းဆောင်များက ဦးဆောင်ခဲ့ခြင်း ဖြစ်ပါသည်။ အခြားနိုင်ငံရေး အဖွဲ့အစည်းများနှင့် ဆက်စပ်မှုများ၊ ပူးပေါင်းဆောင်ရွက်မှုများ ရှိသော်လည်း ကျောင်းသားခေါင်းဆောင်များကသာ တိုက်ပွဲခေါ်ခဲ့ခြင်း ဖြစ်ပါသည်။

ထောင့်သုံးရာပြည့် အရေးတော်ပုံကိုလဲ အလုပ်သမားခေါင်းဆောင်များက ဦးဆောင်ခဲ့ခြင်း ဖြစ်ပါသည်။ နယ်ချဲ့တော်လှန်ရေးတွင် ခေါင်းဆောင်များမရှိ၍၊ ခေါင်းဆောင်များ ကွဲပြားနေ၍၊ ခေါင်းဆောင်များက တိုက်ပွဲခေါ်သံ မပေး၍ စသော အကြောင်းပြချက်များဖြင့် သခင်အောင်ဆန်းတို့ လက်မှိုင်ချ ထိုင်နေခဲ့ခြင်း မရှိပါ။ ရှေ့မှ နိုင်ငံရေးခေါင်းဆောင်ကြီးများက တမတ်သားအာဏာရရ၊ တပဲသားအာဏာရရ၊ ရရင်ပြီးရော သဘောဖြင့် လက်ဝါးလေးတွေ ကိုယ်စီဖြန့်ကာ နယ်ချဲ့တို့ထံ တောင်းရမ်းနေကြချိန်တွင် လွတ်လပ်ရေးကို တောင်းယူ၍ မရ၊ တိုက်ယူမှ ရမည်ကို သိနားလည်သော မျိုးဆက်သစ်များက နယ်ချဲ့တော်လှန်ရေးကို ဦးဆောင်သွားခဲ့ကြပါသည်။

တော်လှန်ရေးအဖွဲ့အစည်း၏ သဘောသဘာဝမှာလည်း တော်လှန်ရေးဦးဆောင်မှု သဘောသဘာဝ ကဲ့သို့ပင် ဖြစ်ပါသည်။ တော်လှန်ရေးတရပ်ကို တော်လှန်ရေးလမ်းစဉ်ကို ကိုင်စွဲသော အဖွဲ့အစည်းများက ဦးဆောင်မှသာ တော်လှန်ရေးအရှိန် မြင့်မားလာမည် ဖြစ်ပါသည်။ နိုင်ငံရေးလုပ်ရာတွင် နည်းပရိယာယ်မျိုးစုံ အသုံးပြုရန် လိုအပ်ကြောင်း အချို့က ဆိုတတ်ကြပါသည်။ သို့ရာတွင် ပြတ်သားသော လမ်းစဉ်တခုတည်းကိုသာ တောင်းဆိုလာသည့် အခြေအနေ၊ အချိန်အခါများလဲ ရှိနေတတ်ပါသည်။

မိမိဝယ်ယူလိုက်သော ခြံထဲတွင် ယိုယွင်းနေသော အိမ်တလုံး ရှိနေပါက ယင်းအိမ်ကို ဖြိုချပြီး အသစ်ဆောက်မည် (သို့မဟုတ်) ပြုပြင်မွမ်းမံမည် ဆိုသည့် ဆုံးဖြတ်ချက်တခုတည်းကိုသာ မဖြစ်မနေ ချမှတ်ရပါသည်။ ဖြိုချရာတွင် အသုံးပြုရမည့် ကိရိယာတန်ဆာပလာများနှင့် ပြုပြင်မွမ်းမံရာတွင် အသုံးပြုရမည့် ကိရိယာတန်ဆာပလာများ တူညီခြင်း မရှိပါ။ နံရံဖြိုလိုက်၊ ပြတင်းပေါက် ဆေးသုတ်လိုက် လုပ်နေလို့ မရပါ။ ယင်းသို့ လုပ်နေပါက အချိန်၊ လုပ်အား နှင့် ပေးဆပ်ရင်းနှီးမှုများ အလဟဿ ဖြစ်ရုံသာ ရှိပါလိမ့်မည်။ အိမ်အသစ်လဲ မရ၊ အိမ်အဟောင်းလဲ မပြိုပဲ အိမ်ရာစီမံကိန်းများမှာလဲ နှစ်ပေါင်းများစွာ ကြာနေပေလိမ့်မည်။ နိုင်ငံတခုတွင် တည်ရှိနေသော နိုင်ငံရေးအဆောက်အအုံသည် ဖြိုချပြီးမှ အသစ်ပြန်လည်တည်ဆောက်ရန် လိုအပ်ပါက တော်လှန်ရေးလမ်းစဉ်ကို ကိုင်စွဲပြီး တော်လှန်ရေးတရပ် မလွဲမသွေ ဆင်နွှဲကြရမည်ပင်ဖြစ်သည်။

မြန်မာနိုင်ငံကို နှစ်ပေါင်းများစွာ ကြီးစိုးလာခဲ့သော နိုင်ငံရေးအဆောက်အအုံမှာ စစ်အာဏာရှင်စနစ်ကို ဘီလူးအသွင်ဖန်တီးလိုက်၊ မင်းသားအသွင်ဖန်ဆင်းလိုက်ဖြင့် ဆေးရောင်မျိုးစုံခြယ်သကာ အသက်သွင်းထားသော နိုင်ငံရေး အဆောက်အအုံဖြစ်ပါသည်။ ဤအဆောက်အအုံ၏ အခြေခံအုတ်မြစ်တွင် စေ့စပ်ညှိနှိုင်းဆွေးနွေးရေး အုတ်မြစ်မရှိ၊ ဗိုလ်ကျအနိုင်ယူရေးသာ ရှိပါသည်။ တောင်းဆိုမှုများကို လိုက်လျောပေးရေး ဟူသော အုတ်မြစ်မရှိ၊ အာဏာတည်မြဲရေး အုတ်မြစ် သာရှိပါသည်။ သင့်မြတ်ရေးဟူသော အုတ်မြစ်မရှိ၊ ဖယ်ရှားရေး ဟူသော အုတ်မြစ် သာရှိပါသည်။ ညီညွတ်ရေး ဟူသော အုတ်မြစ်မရှိ၊ အဆုံးသတ်ချေမှုန်းရေး ဟူသော အုတ်မြစ်သာ ရှိပါသည်။

ယင်းသို့ စေ့စပ်ဆွေးနွေးရေး၊ သင့်မြတ်ရေး၊ ညီညွတ်ရေးတို့အပေါ်တွင် အခြေခံထားခြင်းမရှိသော နိုင်ငံရေးအဆောက်အအုံကို ဆေးသုတ်ပြီး မွမ်းမံပြင်ဆင်၍ မရပါ။ ဖြိုချပြီး အုတ်မြစ်အသစ် ပြန်ချမှသာ ရနိုင်ပါသည်။ သို့ဖြစ်ရာ စေ့စပ်ဆွေးနွေးရေး၊ အမျိုးသားပြန်လည်သင့်မြတ်ရေး၊ အမျိုးသားသွေးစည်းညီညွတ်ရေး ဟူသော အုတ်မြစ်များ ချနိုင်ရန် အာဏာရှင်နိုင်ငံရေးအဆောက်အအုံကို ကနဦးဖြိုချကြရမည် ဖြစ်ပါသည်။ တနည်းဆိုသော အမျိုးသားပြန်လည်သင့်မြတ်ရေး ပန်းတိုင်ကို ဦးတည်သော တော်လှန်ရေးလမ်းစဉ်ကို ပြတ်ပြတ်သားသား ကိုင်စွဲရန် တော်လှန်ရေးအလားအလာနှင့် အခြေအနေက ပြဌာန်းတောင်းဆိုထားပြီး ဖြစ်ပါသည်။

ယင်းတော်လှန်ရေးလမ်းစဉ်ကို ကိုင်စွဲသော တော်လှန်ရေးအဖွဲ့အစည်းများက ဦးဆောင်မှသာ တော်လှန်ရေး အောင်မြင်နိုင်သည့် ရာခိုင်နှုန်း များပြားသည် ဖြစ်ရာ အဆိုပါ တော်လှန်ရေးအဖွဲ့အစည်းများ အသွင်သဏ္ဍာန် အမျိုးမျိုးဖြင့် ပေါ်ထွက်လာရန် လိုအပ်လှပါသည်။ တော်လှန်ရေးအဖွဲ့အစည်းများ ဖွဲ့စည်းရာတွင် လူထု၊ လူတန်းစား အလွှာအသီးသီးအကြားတွင် စိမ့်ဝင်ပျံ့နှံ့နေသော Grass – root infrastructure လိုအပ်ပါသည်။ တော်လှန်ရေးဟူသည် ပိုစတာကပ်ခြင်း၊ စာရွက်စာတမ်း ဖြန့်ဝေခြင်း၊ အခမ်းအနားများ ကျင်းပခြင်း စသည်တို့ကိုပင် ဆိုလိုခြင်း မဟုတ်ပါ။ ဤသည်တို့မှာ တော်လှန်ရေးတရပ် စတင်ရန် စည်းရုံးလှုံ့ဆော်မှု၏ အစိတ်အပိုင်းတရပ်သာ ဖြစ်ပါသည်။

လူထုလူတန်းစား အလွှာအသီးသီးကြားတွင် စိမ့်ဝင်ပျံ့နှံ့နေသော Grass- root infrastructure မရှိပါက အာဏာရှင်တို့ဘက်က တော်လှန်ရေးတိုက်ပွဲများကို အချိန်အနည်းငယ်အတွင်း ထိန်းချုပ်သွားနိုင်သည်ဖြစ်ရာ လှုပ်ရှားမှုတခုကိုပင် ဦးစားပေးဖော်ဆောင်၍ မရ၊ ရေရှည်မြှုပ်နှံ- ပြင်ဆင်တည်ဆောက်မှုကို မလွဲမသွေ ပြုလုပ်ရန် လိုအပ်သည်။ လူ့အဖွဲ့အစည်း၏ အလွှာစုံ၊ ကဏ္ဍစုံတွင် တော်လှန်ရေး၏ ခြေတံ၊ လက်တံများ စိမ့်ဝင် ပျံ့နှံ့နေစေရန် လှုပ်ရှားအဖွဲ့ငယ်များအား မြေအောက်ယူဂျီ သဏ္ဍာန်၊ နိုင်ငံရေးဦးဆောင်မှု ကော်မတီများအား ဒေါင်လိုက်သဏ္ဍာန်၊ မဟာမိတ်ဆက်ဆံရေးနှင့် ပူးတွဲလှုပ်ရှားမှုများတွင် အလျားလိုက် ကွန်ယက် ချိတ်ဆက်မှုသဏ္ဍာန်များနှင့် သတင်းအချက်များ ရှာဖွေစုဆောင်းရေးအတွက် circuit သဏ္ဍာန်တို့ကို အသုံးပြုရန် လိုအပ်သည်။

တော်လှန်ရေးအဖွဲ့အစည်းများ ချိတ်ဆက်တည်ဆောက်မှုတွင် centralization စနစ်ကို အသုံးပြုခြင်းမှာ ကွဲပြားခြားနားမှု နည်းသော နိုင်ငံရေး အခြေအနေများအတွက် သင့်လျော်သော်လည်း၊ နိုင်ငံရေး အဖွဲ့အစည်းများ အများအပြားရှိနေသော နိုင်ငံရေးအခြေအနေများတွင်မူ အခက်အခဲများစွာ ပေါ်လာ တတ်ပါသည်။ လေး-ငါးဖွဲ့ ပေါင်းလိုက်၊ တဖွဲ့ တည်ထောင်လိုက်၊ ဆယ်ဖွဲ့ ကွဲလိုက်၊ ပြန်စုစည်းလိုက် သံသရာတွင် ညီညွတ်ရေး တည်ဆောက်မှုဟူသော ခေါင်းစဉ်ဖြင့် တလည်လည် ဖြစ်နေတတ်ပါသည်။ ယင်းသို့ မဖြစ်စေရန် Decentralization စနစ်ကို တိုက်ပွဲကြားတွင် အသုံးပြု၍ ညီညွတ်ရေး တည်ဆောက်ရမည်ဖြစ်သည်။

ရည်မှန်းချက်နှင့် လမ်းစဉ်တူညီသော အဖွဲ့အစည်းများအကြားတွင် ညီညွတ်ရေးတည်ဆောက်ပြီးမှ တော်လှန်ရေး ဆင်နွှဲရန် ကြိုးပမ်းခြင်းထက် ဘုံရန်သူကို ၀ိုင်းဝန်းချေမှုန်းသည့် တိုက်ပွဲကြားတွင် ညီညွတ်ရေး တည်ဆောက်ရန် ကြိုးပမ်းခြင်းက ပိုမိုထိရောက်မည်ဖြစ်သည်။ မိတ်ဆွေစစ်ကို အခက်အခဲကြားတွင်သာ တွေ့နိုင်ပါသည်။ တိုက်ပွဲမရှိပဲ တည်ဆောက်ထားသော ညီညွတ်ရေးသည် တိုက်ပွဲကြားတွင် ခိုင်ခံ့နေမည်ဟု မည်သူတပ်အပ် ပြောနိုင်ပါအံ့နည်း။

တော်လှန်ရေးအဖွဲ့အစည်းများအတွက် အခြားလိုအပ်ချက်တရပ်မှာ တော်လှန်ရေးမီဒီယာ ဖြစ်သည်။ အဆိုပါ တော်လှန်ရေးမီဒီယာသည် ရှင်းလင်းပြတ်သားသော တော်လှန်ရေးအမြင်နှင့် သဘောတရားများကို လူထုအကြားသို့ ပို့ဆောင်ပေးနိုင်မည့် မီဒီယာဖြစ်ရမည်။ လူထုနှင့် တော်လှန်ရေးအင်အားစုများအကြား ပေါင်းကူးပေးနိုင်မည့် မီဒီယာ ဖြစ်ရန် လိုအပ်သည်။ အချို့က မီဒီယာသည် ဘက်မလိုက်ရ ဟု ဆိုကြသည်။ တော်လှန်ရေးအလားအလာ၊ အခြေအနေများ မရှိပဲ လူထုနှင့် အစိုးရ တသားတည်းကျနေသော နိုင်ငံများအတွက်တော့ ဤအဆိုမှာ လုပ်ထုံးလုပ်နည်း၊ ကျင့်ဝတ်၊ သဘောတရားအရ မှန်ကန်လှပါသည်။ သို့ရာတွင် လူထုက အဖိနှိပ်ခံ၊ အစိုးရက ဖိနှိပ်သူ ဖြစ်နေရသည့် နိုင်ငံများအတွက်တော့ ဤအဆိုမှာ ရေနစ်သူ၊ ၀ါးကူထိုးသကဲ့သို့ပင်ဖြစ်သည်။ တိုင်းပြည်၏ မီဒီယာကို ဖိနှိပ်သူ အစိုးရက ထိန်းချုပ်ထားချိန်တွင် အဖိနှိပ်ခံပြည်သူတို့ဘက်မှ ဘက်လိုက်ရပ်တည်သော၊ တော်လှန်ရေးအင်အားစုများဘက်မှ ဘက်လိုက် ရပ်တည်သော တော်လှန်ရေးမီဒီယာများ မရှိပါက ပြည်သူ့အသံကို မည်သူက ကိုယ်စားပြုမည်နည်း။

အထက်ပါ လိုအပ်ချက်များအပြင် အရေးကြီးသော လိုအပ်ချက်တရပ်မှာ လက်နက်ကိုင်တော်လှန်ရေး အဖွဲ့အစည်းများ ဖြစ်ပါသည်။ လူထုလှုပ်ရှားမှုများ အရှိန်မြင့်နေချိန်တွင် လက်နက်ကိုင်တော်လှန်ရေးနှင့် ပေါင်းစပ်တိုက်ပွဲဝင်ခြင်း မရှိပါက လူထုလှုပ်ရှားမှုများသည် အာဏာရှင်တို့၏ ပစ်မှတ်အလယ်ဗဟို တည့်တည့်သို့ ရောက်သွားတတ်သည်။ ထိုပစ်မှတ်များ ပျံ့ကျဲလာစေရန် လက်နက်ကိုင်တော်လှန်ရေးနှင့် ပေါင်းစပ်ဖြည့်ဆည်း ပေးရမည်ဖြစ်သည်။ အာဏာရှင်တို့က လာတိုက်မှသာ ခုခံကာကွယ်ရေးကို ဆိုလိုခြင်း မဟုတ်။ လူထုတိုက်ပွဲ အရှိန်တက်နေချိန်တွင် ထိုးစစ်များဆင်နွှဲ၍ အားဖြည့်ခြင်းကို ဆိုလိုခြင်းဖြစ်သည်။ အဓိကရည်မှန်းချက်မှာ စစ်ရေးအရ အောင်ပွဲမဟုတ်။ တော်လှန်ရေး အရှိန်မြှင့်တင်ရေး ဖြစ်သည်။


လူထုထောက်ခံအားပေးမှု


တော်လှန်ရေးတရပ်တွင် လိုအပ်ချက် အများအပြားရှိသည် မှန်သော်လည်း၊ အရှုံးအနိုင်ကို အဆုံးအဖြတ် ပေးသည်မှာ လူထုပင် ဖြစ်သည်။ လူထုထောက်ခံအားပေးမှု မရှိသော၊ လူထုနှင့် ကွင်းဆက်ပြတ်နေသော မည်သည့်တော်လှန်ရေးမဆို ကျဆုံးရေးသို့ ဦးတည်ပေလိမ့်မည်။ ခေါင်းဆောင်များနှင့် စည်းရုံး လှုံ့ဆော်သူ များသည် လူထု၏ ယဉ်ကျေးမှုဆိုင်ရာ၊ လူမှုရေးရာ၊ စီးပွားရေးရာ လိုအပ်ချက်များကို အာရုံစိုက်ရန် လိုအပ်သည်။ပြည်တွင်း၊ ပြည်ပ တော်လှန်ရေးအင်အားစုများနှင့် လူထုက တသားတည်း ဟန်ချက်ညီမှသာ တော်လှန်ရေး အောင်မြင်ပေလိမ့်မည်။

တော်လှန်ရေးအင်အားစုများနှင့် ပြည်သူလူထု တရပ်လုံးတွင် clear vision of revolution မရှိလာသည့် ကာလတလျှောက်လုံး မည်သို့သော တော်လှန်ရေးမှ အောင်မြင်မည်မဟုတ်။ ဤ အချက်ကို အင်အားစုများ သတိပြုရန်လိုသည်။ တော်လှန်ရမည် ပြောလိုက်၊ တောင်းဆိုရမည် ပြောလိုက်၊ တိုက်ရမည် ပြောလိုက်၊ ခေါင်းငုံ့ခံ၍ အာဏာရှင်တို့နှင့် ပူးပေါင်းဆောင်ရွက်ရမည် ပြောလိုက်နှင့် အတွေးအခေါ်များ ရှုပ်ထွေးနေသော တော်လှန်ရေးတရပ်တွင် မည်သို့သော လူထုက အပြည့်အ၀ ထောက်ခံအားပေးမှုနှင့် အပြည့်အ၀ ပူးပေါင်း ဆောင်ရွက်မှု (Full support and collaboration) ကို ပေးမည်နည်း။


တော်လှန်ရေးစစ်မျက်နှာများ


ဆဲလ်ဖွံ့ဖြိုးမှု ဖြစ်စဉ်တွင် central core မှာ nucleus ဖြစ်ပြီး၊ cytoplasm region တွင် nucleus ကို ၀န်းရံထားသော segments များ ရှိပါသည်။ တော်လှန်ရေး စစ်မျက်နှာများတွင် nucleus မှာ နိုင်ငံရေးစစ်မျက်နှာ (political battlefront) ဖြစ်ပြီး၊ ပြင်ပ segments များတွင် အတွေးအခေါ်စစ်မျက်နှာ၊ လူမှု-စီးပွား စစ်မျက်နှာ၊ စစ်ရေး စစ်မျက်နှာနှင့် နိုင်ငံတကာ စစ်မျက်နှာများ ပါဝင်ပါသည်။ အဆိုပါ စစ်မျက်နှာများတွင် လူ၏ စိတ်ပိုင်းဆိုင်ရာ တန်ဖိုးထားမှုများ၊ ယုံကြည်ချက်များ၊ ခံယူချက်များနှင့် သက်ဆိုင်သော အတွေးအခေါ် စစ်မျက်နှာသည် တော်လှန်ရေး၏ အခြေခံအုတ်မြစ် ဖြစ်ပါသည်။

လူမှု-စီးပွား စစ်မျက်နှာမှာ လူ၏ နှလုံးသားနှင့် သက်ဆိုင်သည်ဖြစ်ရာ နိုင်ငံရေးစစ်မျက်နှာမှတဆင့် အတွေးအခေါ်စစ်မျက်နှာနှင့် လူမှု-စီးပွားစစ်မျက်နှာများကို အသုံးပြု၍ တော်လှန်ရေး လှုပ်ရှားမှုများသို့ ဦးတည်ရမည် ဖြစ်သည်။ စစ်ရေး စစ်မျက်နှာမှာ အဆုံးသတ်စစ်ရေးအောင်ပွဲကို ဦးတည်နိုင်ခြင်း မရှိစေကာမူ အခြားသော စစ်မျက်နှာများကို ပံ့ပိုးရန်အတွက် မဖြစ်မနေ ရှိသင့်သည့် စစ်မျက်နှာဖြစ်သည်။ နိုင်ငံတကာ စစ်မျက်နှာမှာ အာဏာရှင်အစိုးရနှင့် အာဏာရှင်ရုတ်သေးအစိုးရများကို ပြင်ပမှ ဖိအားပေးရန် ဖြစ်သည်။ အဆိုပါ စစ်မျက်နှာအားလုံးတွင် ဘက်ပေါင်းစုံမှ ပြင်ဆင်တည်ဆောက် တိုက်ပွဲဝင်နိုင်မှသာ အောင်မြင်နိုင်သည့် ရာခိုင်နှုန်း မြင့်မားပါမည်။


နိဂုံး


တော်လှန်ရေး အလားအလာများ တည်ရှိပါက တော်လှန်ရေး အခြေအနေများ ပေါ်ထွက်လာရန် လိုအပ်ပါသည်။ တော်လှန်ရေးတရပ်ကို တော်လှန်ရေး အခြေအနေများက တောင်းဆိုနေချိန်တွင်လည်း တော်လှန်ရေး ဦးဆောင်မှုနှင့် တော်လှန်ရေး အဖွဲ့အစည်းများ၏ အခန်းကဏ္ဍမှာ အရေးကြီးလှပါသည်။

တော်လှန်ရေးနှင့် လူထုတသားတည်း ဖြစ်စေရန်လည်း လိုအပ်သကဲ့သို့ စစ်မျက်နှာ အားလုံးတွင် ဘက်ပေါင်းစုံမှ ပြင်ဆင်တည်ဆောက် တိုက်ပွဲဝင်နိုင်မှုမှာလဲ ပြည်သူ့တော်လှန်ရေးအတွက် အရေးပါလှပါကြောင်း တင်ပြအပ်ပါသည်။


ခင်မမမျိုး (၃၊ ၃၊ ၂၀၁၁)

အပြည့်အစုံ ဖတ်ရန် ...

Thursday, March 3, 2011

ဂူဂဲလ် ဂြိုလ်တု မြန်မာနိုင်ငံ ၏ ဝေဟင် ပိုင်နက် အထက်တွင် ရောက်ရှိ

ဂျက်ဖရီ၊ ၊မြန်မာ နိုင်ငံ တွင် ပြည်သူ လူထု ၏ ဒီမိုကရေစီ နှင့် လွတ်လပ်မှု အတွက် လူထု အုံကြွ မှုများဖြစ်လာပါက အင်တာနက် ဆက်သွယ်မှု များ ပြတ်လပ် မှု မရှိရန် အတွက် အမေရိကန် အခြေစိုက်ဂူဂဲလ် အင်တာနက် ၀န်ဆောင်မှု ကုမ္ပဏီ မှာ ဂြိုလ် တု တစ်လုံးသည် အင်ဒိုနီးရှား နိုင်ငံ၏ကောင်းကင်ယံ မှာ မြန်မာ နိုင်ငံ တောင်ဘက် သို့ ရွှေ့ ထားပြီး ဖြစ်သည် ဟု FNG မှ သတင်း ရရှိသည်။မြန်မာ စစ်အစိုးရ က ၂၀၀၇ ခုနှစ် စက်တာဘာလ ရွှေဝါရောက် တော်လှန်ရေး ကာလအတွင်းကလို အင်တာနက် ဆက်သွယ်မှုများ ဖြတ်တောက်ခဲ့ပါက တွစ်တာ လူမှု မီဒီယာသို့ တယ်လီဖုန်းဖြင့် ဆက်သွယ် နိုင်သည့် နည်းလမ်း တစ်ခု နှင့် IP Proxies များဖြင့် မြန်နှုန်း သိပ်မမြင့် သော အင်တာနက် ကို ကြည့် ရှု နိုင်ရန် စီစဉ် ထားသည် ဟု သိရ သည်။

ဂူဂဲလ် အင်တာနက် ကုမ္ပဏီ သည် လတ်တလောတွင် လူထု အုံကြွမှု ဖြစ်ရာဉ် အင်တာနက် ဖြတ်တောက် ခံထားရသည့် လစ်ဗျား နိုင်ငံ ကို ကူညီထားသည်။

အီဂျစ် နိုင်ငံတွင် လူထု အုံကြွမှု များ အတွင်း ဆန္ဒပြသူများ ကို ကူညီပေး ခဲ့သည့် ကိုင်ရိုမြို့ ကောင်းကင်ယံ မှ ဂြိုလ်တုကို ထရီပိုလီ မြို့ပေါ်သို့ ရွှေ့ယူထားခြင်း ဖြစ်သည်။

လစ်ဗျား နိုင်ငံ အရှေ့ဘက်ခြမ်းရှိ ဘန်ဂါဇီ မြို့မှာ တွင် ကဒါဖီ က အင်တာနက် ဖြတ်တောက်လိုက်သော် လည်း ဂူဂဲလ် ဂြိုလ်တုက အလျှင် အမြန် ကူညီနိုင်၍ ကဒါဖီ လက်အောက်မှာ ဘန်ဂါဇီ မြို့မှာ စောစီးစွာ လွတ်မြောက် ခဲ့သည်။

မြန်မာနိုင်ငံတွင် အင်တာနက် ဆက်သွယ်မှုများ ပြတ်တောက်သွားပါက ဂူဂဲလ်က မည်ကဲ့သို့ အသုံးပြု ရမည်ကို သတင်းထုတ်ပြန်မည် ဖြစ်သည်။

ယခင် က မြန်မာ နိုင်ငံ ၏ အကာသ တွင် ဂူဂဲလ် ဓာတ်ပုံ ရိုက်ကူးရေး ဂြိုလ်တုများရောက်ရှိ ခဲ့ဖူးပြီး ၊ ယခု ဂြိုလ်တု သည် ဂူဂဲလ် ၏ ဆက်သွယ်ရေး နည်းပညာ ဂြိုလ်တု ဖြစ်သည်။

Related Articles

http://longwalktofreedom.files.wordpress.com/2011/02/burma21.jpg?w=269&h=193

နေပြည်တော် ရှိ ကာကွယ်ရေး ၀န်ကြီးဌာ န ကို ဂူဂဲလ် ဂြိုလ် တု မှ ရိုက်ကူးထားသည် ကို ဤသို့တွေ့ ရသည်။

Ip Locator: Find Any Information for a Specific IP Address (crenk.com)

source by : http://freedomnewsgroup.com

အပြည့်အစုံ ဖတ်ရန် ...

နအဖ စစ်တပ်မှ လူ့အခွင့်အရေး ချိုးဖောက်မှုနှင့် တိုက်ပွဲသတင်းများ


ကေအန်ယူ တပ်မဟာ(၂) နယ်မြေ

ဖေဖော်ဝါရီလ ၂၄ ရက် ၂၀၁၁ ခုနှစ် နံက် (၁၀)နာရီအချိန်တွင် ကရင်အမျိုးသား အစည်းအရုံး(KNU)သည် ကော်သေးဒဲရွာ၏ ကားလမ်းမပေါ်ကို သွားရောက် တိုက်ခိုက်ခဲ့သော တိုက်ပွဲတွင် ရန်သူဘက်မှ ထိခိုက် ဒဏ်ရာရရှိမှုကို မသိရသေးပါ။ KNU ဘက်မှ ထိခိုက်ဒဏ်ရာရရှိမှု မရှိချေ။

ဖေဖော်ဝါရီလ ၂၅ ရက် ၂၀၁၁ ခုနှစ် နေ့တွင် ထန်းတပင်မြို့နယ်၊ (ကလောမီးဒဲ) စခန်းအခြေစိုက် ရန်သူ ခလရ(၁၀၂)မှ တပ်ရင်းမှူး မြင့်သန်းဝင်း ဦးဆောင်သောအဖွဲ့သည် ရွာသား(၁၀) ယောက်ကို အတင်းအဓမ္မ ချောဆွဲပြီး ကလောမီးဒဲစခန်းမှ ကွယ်ဒေးစခန်းအထိ လမ်းတလျှောက် မိုင်းရှင်းခိုင်းခဲ့သည်။

ကေအန်ယူ တပ်မဟာ (၄) နယ်မြေ

ဖေဖော်ဝါရီလ ၂၃ ရက် ၂၀၁၁ ခုနှစ်၊ မွန်းလွဲပိုင်း (၃)နာရီခန့် အချိန်တွင် KNU ပြောက်ကျား(၂) အဖွဲ့က ရန်သူ နအဖ တပ်ဖွဲ့နှင့် ယိုပယောတာ့ရွယ် ဒေသမှာ ရင်ဆိုင်တိုက်ပွဲ ဖြစ်ပွားခဲ့ရာ ရန်သူဘက်မှ (၁)ဦး ဒဏ်ရာ ရရှိခဲ့သည်။

အလားတူ ဖေဖော်ဝါရီလ ၂၅ ရက် ၂၀၁၁ ခုနှစ် ၊ နံနက် ၁၀ နာရီအချိန်တွင် KNU က ရန်သူ ခလရ (၅၅၈)ကို ထီးဟေထ နေရာတွင် (၁၀)မိနစ်ကြာ သွားရောက်တိုက်ခိုက်ခဲ့ရာမှာ ရန်သူ နအဖ ဘက်မှ (၂)ယောက်သေပြီး (၃)ယောက် ဒဏ်ရာ အပြင်းအထန်ရရှိခဲ့ပါသည်။ KNU ဘက်မှ ထိခိုက်ဒဏ်ရာရရှိမှု မရှိကြောင်း သိရပါသည်။

ကေအန်ယူ တပ်မဟာ(၅) နယ်မြေ

ဖေဖော်ဝါရီလ ၂၄ ရက် ၂၀၁၁ ခုနှစ် နေ့တွင် ရန်သူ၏ တပ်မ (၁၀)လက်အောက်ခံတပ်များက နော်ပလားခို ဒေသမှာသွားရောက်စခန်းချရာတွင် တစ်ချို့တပ်ရင်းသည် သေးဒေရွာတွင် ခရီးတစ်ထောက်နားပြီး ညအချိန်တွင် တယ်ဘိုးဂွင်မှာရှိသော စော်ကဲ့ဒဲ၊ လယ်ကလားပယ်ဟို၊ ထီးမူးထ၊ ဟော့လယ်ထ၊ ပလာ လော့တယ်၊ တယ်နဲ၊ ထီးမီးတော် ရွာများကို လက်နက်ကြီးများဖြင့် ပစ်ခတ်သောကြောင့် ရွာသူ ရွာသားများ ကြောက်လန့်ကာ အသက်အန္တရာယ်အတွက် ညအချိန်မှာပင် တောထဲသို့ ထွက်ပြေး တိမ်းရှောင်ကြရပါသည်။ ရွာသူ ရွာသားများသည် ဘာတစ်ခုမှ ယူဆောင်ရန် အချိန်မရလိုက်သဖြင့် တောထဲတွင် ကလေးသူငယ်များ ဒုက္ခအတိ ရောက်ခဲ့ရကြောင်းလည်း သိရပါသည်။

နောက်တစ်နေ့ဖြစ်သော ဖေဖော်ဝါရီလ ၂၅ ရက် ၂၀၁၁ ခုနှစ်၊ နံနက် ၇ နာရီခန့် အချိန်တွင် ရန်သူ နအဖ တပ်များသည် ရွာထဲသို့ ၀င်ရောက်ပြီး အိမ်မွေးတိရိစ္ဆာန် ကြက်၊ ၀က်၊ ဘဲနှင့် ရှိသမျှကို ယူဆောင် စားသောက်ကြပြီး ရွာထဲရှိ စပါး ကျီများနှင့် အိမ်များကို မီးရှို့ဖျက်ဆီးခဲ့ကြသည်။ ရန်သူ နအဖ တပ်များသည် ထိုရွာများတွင် ခုချိန်ထိ စခန်းချ ထားကြောင်းလည်း သိရပါသည်။

ထိုနေ့မှာပင် ၁၂ နာရီ ၁၂ မိနစ်အချိန်တွင် KNU တပ်ရင်း (၁၀၂)၊ တပ်ခွဲ(၃)တပ်ဖွဲ့နှင့် ရန်သူ နအဖ တပ်ဖွဲ့တို့သည် လေးဖိုးထရွာ၏ အနောက်ဘက်ခြမ်းရှိ ချောင်းကလေး ကမ်းစပ်တွင် ရင်ဆိုင်တိုက်ပွဲဖြစ်ပွားရာ ရန်သူဘက်မှ (၁)ယောက်သေပြီး (၁)ယောက် ဒဏ်ရာရရှိကြောင်း သတင်းရရှိပါသည်။

ဆက်လက်ပြီး ထိုနေ့မှာပင် KNU မှ တပ်ရင်း(၁၀၂)၊ တပ်ခွဲ(၅)အဖွဲ့နှင့် ၀င်းမောင်း ရွာမှ ကာကွယ်ရေး တပ်ဖွဲ့တို့ ပူးပေါင်းပြီး သရက်ပင်ဆိပ်နှင့် သရက်ပင်ဂွကြားရှိ မီးလေးချောင်းကမ်းနားတွင် ရန်သူနအဖတပ်ဖွဲ့ကို ဆွဲမိုင်းဖြင့် တိုက်ခိုက်ခဲ့ရာ ရန်သူဘက်မှ (၁)ယောက်သေ၊ (၂)ယောက်ဒဏ်ရာ ရရှိခဲ့သည်။

အလားတူ KNU တပ်ရင်း(၁၀၂)၊ တပ်ခွဲ (၁)မှ တပ်ဖွဲ့ဝင်များသည် မလေးချောင့်ရွာ၏ ကားလမ်းမပေါ်တွင် ရန်သူ နအဖ တပ်ကို ပြောက်ကျားနည်းဖြင့် တိုက်ခိုက်ခဲ့ရာတွင် ရန်သူဘက်မှ ထိခိုက်သေဆုံးမှုကို မသိရှိရသေးပါ။ ၄င်းတိုက်ပွဲ (၃)ကြိမ်ဖြစ်ပွားရာတွင် KNUဘက်မှ ထိခိုက်သေကြေမှု မရှိကြောင်းလည်း သိရပါသည်။

ဖေဖော်ဝါရီလ ၁၈ ရက် ၂၀၁၁ ခုနှစ်တွင် ရန်သူ နအဖ တပ်မ (၁၁)အဖွဲ့နှင့် BGF တပ်ရင်း(၁၀၁၄)တို့ ပူးပေါင်းပြီး စခန်းအမိုး မိုးရန်အတွက် ဒေးမူရွာမှ အင်ဖက် အပြစ်(၄၀၀၀၀)၊ ကွီးနက်ရွာမှ အင်ဖက် အပြစ် (၄၀၀၀၀)၊ ထီးဂေးလိုရွာမှ (၄၀၀၀၀)၊ မယ်ညောရွာမှ ဖက် အပြစ်(၄၀၀၀၀)နှင့် လေးဖိုးဟောရွာမှ ဖက်အပြစ်(၂၀၀၀၀) တို့ကို အတင်းအဓမ္မ ကောက်ခံခဲ့ကြောင်း သတင်းရရှိပါသည်။ ထို့ပြင် မယ်မွဲကျေးရွာမှ ၀ါးပိုးအလုံး(၃၅၀)၊ ညတေလိုရွာမှ ငွေ (၄၆၀၀၀၀)ကျပ်နှင့် ၀ါးခလုကို့ရွာမှ (၂၆၀၀၀၀)ကျပ်ကို တောင်းခံ ခဲ့သည်။

နအဖ တပ်မ(၁၁) နှင့် နယ်ခြားစောင့်တပ်ဖွဲ့ဝင်များသည် ဖာပွန်ခရိုင်၊ မဲပါရွာအနီး တ၀ိုက်တွင် မိုင်းများစွာ ထောင်ထားသောကြောင့် ရွာသူရွာသားများသည် တခြားဒေသများသို့ မသွားရောက်နိုင်ကြပဲ မိသားစု (၁၄)စုနှင့် ရွာသူ/သားပေါင်း (၈၄)ယောက်က ပိတ်မိနေကြောင်း သတင်းရရှိပါသည်။

ကေအန်ယူ တပ်မဟာ(၇) နယ်မြေ

ဖေဖော်ဝါရီလ ၂၃ ရက် ၂၀၁၁ ခုနှစ် နေ့တွင် ရန်သူနအဖ ခလရ(၆၂)တပ်ဖွဲနှင့် KNU မှ ပြောက်ကျားတပ်ဖွဲ့တို့ ကလို့ရွာကလိုးနီတွင် တိုက်ပွဲဖြစ်ပွားခဲ့ရာ နအဖမှ (၃)ယောက်သေပြီး (၂)ယောက် ဒဏ်ရာရရှိခဲ့သည်။

ဖေဖော်ဝါရီလ ၂၅ ရက် ၂၀၁၁ ခုနှစ်တွင်မူ နအဖ မှ ခလရ(၆၂)အဖွဲ့နှင့် KNU ပြောက်ကျားတပ်ဖွဲ့တို့ ကလို့ရွာ တရောတွင် ဒုတိယအကြိမ် တိုက်ပွဲဖြစ်ပွားခဲ့ရာ ရန်သူ နအဖ ဘက်မှ (၁)ယောက် ကျဆုံးသွားပါသည်။

ဖေဖော်ဝါရီလ ၂၆ ရက် ၂၀၁၁ ခုနှစ်တွင် ရန်သူ၏ ထို ခလရ (၆၂)အဖွဲ့နှင့် KNU တပ်ဖွဲ့ဝင်တို့ တိုက်ပွဲ ဖြစ်ပွားပြန်ရာ နအဖ မှ (၂)ယောက် ဒဏ်ရာရရှိခဲ့ကြောင်း သတင်းရရှိပါသည်။


source by : http://soneseayar.blogspot.com

အပြည့်အစုံ ဖတ်ရန် ...

လူထု နိုင်ငံရေး ခံစားချက် လေ့လာဖို့ ဒေါ်အောင်ဆန်းစုကြည် တိုက်တွန်း

မြန်မာပြည်သူလူထု လက်ရှိ ခံစားနေရတဲ့ နိုင်ငံရေး ခံစားချက်တွေကို NLD အမျိုးသား ဒီမိုကရေစီ အဖွဲ့ချုပ် အနေနဲ့ ပိုပြီးသိအောင် တိုးမြှင့် လုပ်ဆောင်ကြဖို့ NLD ပါတီခေါင်းဆောင် ဒေါ်အောင်ဆန်းစုကြည်က တိုက်တွန်းလိုက်ပါတယ်။ ဒီကနေ့ NLD ဗဟိုအလုပ်အမှုဆောင်တွေနဲ့ ရန်ကုန်တိုင်းထဲက မြို့နယ်နဲ့ တိုင်း စည်းရုံးရေးမှူးတွေ NLD ရုံးချုပ်မှာ တွေ့ဆုံ ဆွေးနွေးခဲ့ကြတဲ့ပွဲမှာ အခုလို ဒေါ်အောင်ဆန်းစုကြည်က တိုက်တွန်းခဲ့တာလည်း ဖြစ်ပါတယ်။ အပြည့်အစုံကို မသင်းသီရိက တင်ပြပေးထားပါတယ်။

လက်ရှိ မြန်မာ့နိုင်ငံရေး အခြေအနေတွေပေါ်မှာ ပြည်သူလူထုတွေရဲ့ ခံစားနေရမှုတွေကို NLD ပါတီက ပိုပြီး သိရအောင် လူထုဆီက အသံတွေ နားထောင်ဖို့၊ တုံ့ပြန်ချက်တွေ ပေးနေတဲ့ လူထုဆီကို NLD ပါတီဝင်တွေ အရောက်သွားဖို့ ကိစ္စတွေကို ဒီကနေ့ အဓိက ဆွေးနွေးခဲ့ကြတယ်လို့ NLD ပါတီ ဗဟိုအလုပ်အမှုဆောင် အဖွဲ့ဝင် ဦးဉာဏ်ဝင်းက ပြောပါတယ်။

“အဓိက ရည်ရွယ်ချက်ကတော့ ပါတီတရပ်မှာ အထက် အောက် အမြဲတမ်း ထိတွေ့ဆက်ဆံဖို့ရယ်၊ ပြီးတော့ လက်ရှိ နိုင်ငံရေး အခြေအနေပေါ်မှာ ပြည်သူလူထုဆီက တုံ့ပြန်မှု၊ ခံစားမှု ဒါတွေကို သိချင်တယ်။ နောက် ဒီအပေါ်မှာ ဆွေးနွေးတာပေါ့။ နိုင်ငံရေးဆိုတာ ပြည်သူလူထုအတွက် လုပ်တာ။ အဲတော့ ပြည်သူလူထုဆီက ခံစားမှုကို သိနေရမယ်။ သူတို့က လာမပြောတောင် ကိုယ်က ဒီဟာကို သွားရောက် နားထောင်ဖို့၊ လေ့လာဖို့ တာဝန်ရှိတယ်။ ဒီတာဝန်တွေကို ကျေကျေပွန်ပွန် ဆောင်ရွက်ကြဖို့၊ ဒါကို ဆွေးနွေးကြတာ။”

NLD ပါတီဟာ လူထုကြား အရောက်သွားဖို့နဲ့ ပြည်သူတွေ အကျိုးအတွက် တောင်းဆိုနေတဲ့ အမျိုးသား ရင်ကြားစေ့ရေး ကိစ္စကိုလည်း ယုံကြည်ချက် အပြည့်နဲ့ ရှေ့ဆက်ဖို့ NLD ပါတီခေါင်းဆောင်၊ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်က တိုက်တွန်းခဲ့တယ်လို့လည်း ပြောပါတယ်။

“ပြည်သူတွေဆီက သတင်းမရရင်တောင် ကိုယ်က သတင်းကို၊ ပြည်သူတွေ ခံစားမှုကို သိအောင် လုပ်ရမယ်ဆိုတာ ဒေါ်အောင်ဆန်းစုကြည် ကိုယ်တိုင် တက်ရောက်လာတဲ့ ပုဂ္ဂိုလ်တွေကို ပြောကြားတဲ့ စကားပါ။ အမျိုးသား ရင်ကြားစေ့ရေးဆိုတာ ပြည်သူတွေရဲ့ အကျိုးအတွက် တောင်းဆိုတာ၊ ပြည်သူတွေ ထိခိုက်မှု အနည်းဆုံး နည်းလမ်းနဲ့ အကောင်းဆုံး နည်းလမ်းကို ရွေးချယ်တာ။ ဒီဥစ္စာက မဖြစ်သေးဘူးလို့ အပြစ်ပြောနေမယ့်အစား ယုံယုံကြည်ကြည်နဲ့ ဆောင်ရွက်ဖို့ လိုအပ်တယ်လို့ ပြောပါတယ်။”

NLD ရုံးချုပ်မှာ ဗဟိုကော်မတီ အဖွဲ့ဝင်တွေနဲ့ NLD တိုင်းနဲ့ပြည်နယ် ၁၃ ခုက စည်းရုံးရေး အဖွဲ့ဝင်တွေဟာ ဒီကနေ့ မတ်လ ၃ ရက်နေ့ကစလို့ မတ်လ ၁၈ ရက်နေ့ထိ အလှည့်ကျ တွေ့ဆုံဆွေးနွေးပွဲတွေ ပြုလုပ်မှာဖြစ်ပြီး ဒီကနေ့ ပထမဆုံးနေ့မှာ ရန်ကုန်တိုင်း တာဝန်ခံ စည်းရုံးရေးမှူးတွေ၊ ရန်ကုန်တိုင်း အတွင်းက မြို့နယ်တာဝန်ခံ စည်းရုံးရေးမှူးတွေနဲ့ ဆွေးနွေးပွဲ စခဲ့ပါတယ်။ အထူးသဖြင့် ကိုယ်ယူထားတဲ့ တာဝန်ကို ကျေပွန်ကြဖို့ ဒေါ်အောင်ဆန်းစုကြည်က တိုက်တွန်းပါတယ်။

ရန်ကုန်တိုင်းဟာ ဗဟိုအဖွဲ့ချုပ်နဲ့ အနီးဆုံးဖြစ်တာမို့ တခြားမြို့နယ်နဲ့ တိုင်း၊ ပြည်နယ်တွေထက်စာရင် စံပြအဖွဲ့အစည်းတခု ဖြစ်သင့်တယ်လို့ ဒေါ်အောင်ဆန်းစုကြည်က တိုက်တွန်းသွားသလို ကိုယ်ယူထားတဲ့ တာဝန်ကို မကျေဘူးဆိုရင်လည်း လူထုကို အားနာစရာ ကောင်းတယ်လို့လည်း ဒေါ်အောင်ဆန်းစုကြည်က ပြောသွားပါတယ်။ တခါ NLD ပါတီဟာ လှုပ်ရှားသင့်သလောက် မလှုပ်ရှား၊ လုပ်သင့်သလောက် မလုပ်သလို တက်ကြွသင့်သလောက်လည်း တက်ကြွတာ မတွေ့ရဘူးလို့ ဒေါ်အောင်ဆန်းစုကြည်က ဝေဖန်သွားပါတယ်။

ကိုယ့်ကို ထောက်ခံတယ်ဆိုပြီး ထိုင်မနေကြဖို့နဲ့ ကိုယ့်ကို ထောက်ခံစေချင်ရင် ကိုယ့်ဘက်ကလည်း လူထုအတွက် ကြိုးစား အလုပ်လုပ်ကြရမှာ ဖြစ်တယ်လို့ ဒေါ်အောင်ဆန်းစုကြည်က ပြောပါတယ်။ နိုင်ငံမှာ အကြောက်တရား ကင်းဖို့အတွက် ကြောက်တဲ့သူဘက်ကလည်း အဲဒီခံစားမှု ပျောက်အောင် ကြိုးစားရမှာ ဖြစ်သလို မကြောက်စေချင်သူဘက်လည်း ကြိုးစားရမယ်လို့ ဒေါ်အောင်ဆန်းစုကြည်က တိုက်တွန်းပါတယ်။ လက်ရှိ နေပြည်တော်မှာ ကျင်းပနေတဲ့ လွှတ်တော်တွင်းကနေ ထွက်လာတဲ့ ဥပဒေတွေနဲ့ လူထုကို အသိပေး တင်ပြဖို့ ဆက်လက် ဆွေးနွေးသွားမယ်လို့လည်း ဦးဉာဏ်ဝင်းက ပြောပါတယ်။

“ပြည်သူလူထု သိသင့်သိထိုက်တဲ့ ကိစ္စတွေ ကျနော်တို့ နောက်ထပ် စာတွေ ထုတ်ဖို့လည်း စီစဉ်ပါတယ်။ ဒါ ပြည်သူတွေကို အသိပေးမှာ။ လက်ရှိ လွှတ်တော်ကြီးလည်း ခေါ်နေတယ်၊ ဥပဒေတွေကလည်း ထုတ်နေတယ်၊ ဒါတွေနဲ့ ပတ်သက်ပြီး အသိပေးဖို့ အစီအစဉ် ရှိပါတယ်။ ပါတီတရပ်က အမြဲတမ်း သိရှိနေရမယ်၊ သိရှိအောင်လည်း လုပ်ဖို့ တာဝန်ရှိတယ်၊ ဒီတာဝန်ကို ကျေပွန်အောင် ဆောင်ရွက်ကြဖို့ ပြောတာပါ။”

NLD ပါတီ ဗဟိုအလုပ်အမှုဆောင် အဖွဲ့ဝင် ဦးဉာဏ်ဝင်း ပြောပြသွားတာ ဖြစ်ပါတယ်။

မတ်လ ၁၈ ရက်နေ့ထိ ကျင်းပသွားမယ့် NLD ပါတီရဲ့ ဆွေးနွေးပွဲမှာ နိုင်ငံရေး အခြေအနေတွေအပြင် လူမှုရေးနဲ့ စီးပွားရေး ကိစ္စတွေကိုပါ အပြန်အလှန် ဆွေးနွေးကြပြီး လူထုကို တင်ပြဖို့ စီစဉ်ထားတယ်လို့လည်း NLD ပါတီက ပြောပါတယ်။


နားဆင်ရန်

source by : http://www.voanews.com

အပြည့်အစုံ ဖတ်ရန် ...

Monday, February 28, 2011

မြန်မာ့တော်လှန်ရေးနှင့် ပြည်ပရောက် မြန်မာများ၏ အခန်းကဏ္ဍ


နိဒါန်း


(၂၀၁၁) ခုနှစ်သည် မြန်မာ့နိုင်ငံရေးအတွက် ထူးခြားသော နှစ်တနှစ် ဖြစ်ပါသည်။ လက်ရှိ အချိန်ကာလသည်လည်း နအဖ စစ်အုပ်စုက ကျင်းပသော (၂၀၁၀) အတုအယောင် ရွေးကောက်ပွဲ ရလဒ်အဖြစ် စစ်အုပ်စုကြိုးဆွဲ ရုပ်သေးအစိုးရ ပေါ်ထွက်လာစေရန် လွှတ်တော်ခေါ်ယူနေဆဲ ကာလဖြစ်ပါသည်။ တပြိုင်နက်တည်းမှာပင် နအဖစစ်ဝါဒီစနစ်ကို ထောက်ခံ အားပေးနေကြသည့် ပညာရှင်ဆိုသူများကလဲ (၂၀၁၁) သည် တော်လှန်ရေး အင်အားစုများ အတွက် လမ်းဆုံးဖြစ်တော့ မယောင် အသံလွှင့်နေကြပါသည်။

လက်တွေ့တွင်ကား (၂၀၁၁) သည် တော်လှန်ရေးအင်အားစုများအတွက် လမ်းဆုံတခုသာ ဖြစ်သည်။ ရွေးကောက်ပွဲနှင့် တရားဝင်တက်လာသည့် အစိုးရဖြစ်ဖြစ်၊ လက်နက်အင်အားသုံး၍ တရားမ၀င် တက်လာသည့် အာဏာသိမ်း စစ်အုပ်စုဖြစ်ဖြစ် ပြည်သူ့အာဏာကို ဖယ်ရှား၍ မရပါ။ အာဏာသည် ပြည်သူ့ထံမှသာ သက်ဆင်းပါသည်။ သေနတ်ပြောင်းဝမှ ဆင်းသက်သည် မဟုတ်။ သေနတ်ချိန်၍ ကျင်းပသည့် အာဏာရှင်ရွေးကောက်ပွဲမှ ဆင်းသက်သည် မဟုတ်။ သို့ဖြစ်၍ ပြည်သူ့အာဏာကို ပြည်သူဆီမှ ဆင်းသက်ရန် ကြိုးပမ်းသော တော်လှန်ရေးသမားများအတွက် လမ်းဆုံးဖြစ်လာမည် မဟုတ်။ လမ်းဆုံးဖြစ်လာမည် မဟုတ်သော်လဲ လမ်းဆုံမှသည် ပန်းတိုင်သို့ ရောက်အောင်ကား ရှေ့ဆက် ချီတက်ကြရပေမည်။

ယင်းသို့ ချီတက်ကြရာတွင် အာဏာရှင်ဆန့်ကျင်ရေး လှုပ်ရှားမှု အဆင့်များကို စနစ်တကျ အကောင်အထည် ဖော်ကြရန် လိုအပ်လှသည်ဖြစ်ရာ မြန်မာ့စစ်အာဏာရှင်စနစ် ဆန့်ကျင်ရေးတွင် ပြည်ပရောက် မြန်မာများမှ ပါဝင်ဆောင်ရွက်နိုင်သည့် စည်းရုံးရေးနှင့် ၀ါဒဖြန့်ချိရေး လုပ်ငန်းစဉ်များ၊ ထောက်ပံ့ရေးနှင့် သတင်းရယူရေး လုပ်ငန်းတာဝန်များ၊ ကွန်ယက်ချိတ်ဆက် လှုပ်ရှားရေးနှင့် နိုင်ငံခြားဆက်ဆံရေး လုပ်ငန်းတာဝန် စသည်များကို တော်လှန်ရေးအောင်မြင်မှု သော့ချက် ခြောက်ချက်ပေါ်တွင် အခြေပြု၍ ဤစာတမ်းအား ရေးသားပါသည်။

(၁) လူထုထောက်ခံမှု ရယူခြင်း

(၁.၁) ပြည်ပရောက် မြန်မာ့လူ့အဖွဲ့အစည်း


ပြည်ပရောက် မြန်မာ့လူ့အဖွဲ့အစည်းတွင် လူဦးရေ သိန်းချီ ပါဝင်၍၊ လူ့အဖွဲ့အစည်း၏ ဖြစ်တည်မှုသဏ္ဍာန်တွင် ဒေါင်လိုက်စုဖွဲ့မှုနှင့် အလျားလိုက် စုဖွဲ့မှု သဏ္ဍာန် နှစ်မျိုး ကွဲပြားခြားနားသည်။ ဒေါင်လိုက်စုဖွဲ့မှုတွင် လူမျိုးစုနှင့် ဘာသာရေး ကွဲပြားမှုများ ပါဝင်ပြီး၊ အလျားလိုက်စုဖွဲ့မှုတွင် လူတန်းစားအလွှာ ကွဲပြားမှုများ ပါဝင်သည်။


ဒေါင်လိုက်စုဖွဲ့မှုဆိုင်ရာ ကွဲပြားမှုသဏ္ဍာန်အရ
(၁) လူမျိုးစု အဖွဲ့အစည်းများဖြစ်သော ကရင်အဖွဲ့၊ ချင်းအဖွဲ့၊ မွန်အဖွဲ့၊ ရှမ်းအဖွဲ့၊ ကချင်အဖွဲ့၊ ကယန်းအဖွဲ့၊ ရခိုင်အဖွဲ့ စသည့် အစုအဖွဲ့များ နှင့်
(၂) ဘာသာရေး အဖွဲ့အစည်းများဖြစ်သော ဗုဒ္ဓဘာသာအဖွဲ့၊ ခရစ်ယာန်အဖွဲ့၊ မွတ်စလင်အဖွဲ့ စသည့် အစုအဖွဲ့များသည် နယ်မြေဒေသနှင့် လူဦးရေပေါ်တွင် မူတည်၍ တည်ရှိနေပြီး၊ အဖွဲ့အစည်းများအကြား ဆက်သွယ်မှုများနှင့် လူမှုရေး၊ ဘာသာရေးကဏ္ဍ ပူးပေါင်းလှုပ်ရှားမှုများ ရှိနေသည်။

အလျားလိုက်စုဖွဲ့မှုဆိုင်ရာ ကွဲပြားမှုသဏ္ဍာန်အရ
(၁) နိုင်ငံရေးခိုလှုံခွင့် ရရှိပြီး နိုင်ငံရေးရာတွင် စိတ်ပါဝင်စားသော အစုအဖွဲ့များ
(၂) နိုင်ငံရေး ခိုလှုံခွင့် ရရှိပြီး နိုင်ငံရေးရာများတွင် ပါဝင်မှုမရှိသော အစုအဖွဲ့များ
(၃) ပြည်ပတွင် အလုပ်အကိုင်အခွင့်အလမ်းပေါ်မူတည်၍ အခြေစိုက် နေထိုင်သူများ ပါဝင်သော အစုအဖွဲ့များ
(၄) ကျောင်းသား အစုအဖွဲ့များ
စသည့် အစုအဖွဲ့များသည် နိုင်ငံရေး၊ ပညာရေး၊ လူမှုရေး၊ ဘာသာရေး ကဏ္ဍအသီးသီးတွင် ပူးပေါင်းချိတ်ဆက် ပါဝင်မှုများရှိနေသည်။

(၁.၂) လက်ရှိနိုင်ငံရေး လှုပ်ရှားမှုများ

ပြည်ပရောက်မြန်မာများ၏ လက်ရှိနိုင်ငံရေး လှုပ်ရှားမှုများသည် နိုင်ငံရေးတက်ကြွလှုပ်ရှားမှု (Political activism) အကောင်အထည်ဖော်မှုများတွင် အခြေခံသည်။ နိုင်ငံရေးအဖွဲ့အစည်း ရာပေါင်းများစွာမှာ နိုင်ငံ အနှံ့အပြားတွင် ပျံ့နှံ့နေပြီး၊ တက်ကြွလှုပ်ရှားသူ အရေအတွက် ထောင်နှင့်ချီ၍ ရှိသည်။ ယင်း တက်ကြွလှုပ်ရှားသူများမှ နိုင်ငံအလိုက်၊ အဖွဲ့အစည်းအလိုက် နိုင်ငံရေးလှုပ်ရှားမှုများကို ပြုလုပ်ကြသည်။

လှုပ်ရှားမှုများ ပြုလုပ်ရာတွင်


(၁) ဆန္ဒပြပွဲများ ပြုလုပ်ခြင်း

(၂) အထိမ်းအမှတ်နေ့များတွင် အခမ်းအနားများ ပြုလုပ်ခြင်း
(၃) သက်ဆိုင်ရာနိုင်ငံအလိုက် နိုင်ငံခြားရေးဌာနများနှင့် နိုင်ငံတကာ အဖွဲ့အစည်းများသို့ ကင်ပိန်းများ ပြုလုပ်ခြင်း
(၄) အစည်းအဝေးများ၊ ကွန်ဖရင့်များနှင့် ဖိုရမ်များ ကျင်းပခြင်း
စသည်တို့ ပါဝင်သည်။

(၁.၃) လူထုထောက်ခံမှု အခြေအနေ သုံးသပ်ချက်

လူထုထောက်ခံမှုအပိုင်းတွင် နိုင်ငံရေးလှုပ်ရှားမှုများကို တက်ကြွစွာ ပြုလုပ်နေသူများအား လူ့အဖွဲ့အစည်းမှ တိုက်ရိုက် ထောက်ခံမှုနှင့် သွယ်ဝိုက်ထောက်ခံမှု အခြေအနေ နှစ်ပိုင်းရှိရာ တိုက်ရိုက် ထောက်ခံမှုသဏ္ဍာန်ဖြစ်သော သတင်းအချက်အလက်များ ပေးပို့မှု၊ တော်လှန်ရေးသမားများနှင့် ဆက်သွယ်မှု ကဏ္ဍများတွင် အားနည်းချက်များ ရှိနေသကဲ့သို့၊ သွယ်ဝိုက်ထောက်ခံမှု သဏ္ဍာန်ဖြစ်သော အာဏာရှင်နှင့် ပူးပေါင်းဆောင်ရွက်မှုကို ငြင်းဆန်ခြင်းများတွင်လဲ အားနည်းချက်များ ရှိနေသည်။

အဓိက အားနည်းချက် အရှိဆုံးကဏ္ဍမှာ တော်လှန်ရေးသမားများနှင့် လူ့အဖွဲ့အစည်းကြားမှ ကွင်းဆက်ပြတ်မှု များပင်ဖြစ်သည်။ တော်လှန်ရေးသမားများသည် လူထုနှင့် တသားတည်းမရှိပဲ မိမိကိုယ်ကို တော်လှန်ရေးသမား ဖြစ်ရခြင်းကို ဂုဏ်ဖော်ကြွားဝါနေခြင်း၊ လူထု၏ အမြင်နှင့် တန်ဖိုးထားမှုများကို မဖော်ထုတ်ပဲ တော်လှန်ရေးတွင် ပူးပေါင်းပါဝင်လာခြင်း မရှိသေးသူများကို စွပ်စွဲပြောဆိုမှုများ ပြုလုပ်ခြင်း၊ ခွဲခြားဆက်ဆံခြင်း၊ လူတဦးချင်းစီ၏ နိုင်ငံရေး ရေချိန်နှင့် အသိကို တိုင်းတာခြင်း မပြုပဲ နိုင်ငံရေးအဖွဲ့အစည်း အတွင်းသို့ ၀င်ရန် အတင်းအကြပ် သိမ်းသွင်းခြင်း၊ အစည်းအဝေးများကို မဟာဗျူဟာ အစည်းအဝေး၊ လုပ်ငန်းဖော်ဆောင်ရေး အစည်းအဝေး စသည်ဖြင့် ကဏ္ဍခွဲခြား ပြုလုပ်ခြင်း မရှိပဲ ရောနှော ပြုလုပ်ခြင်းများကြောင့် မဟာဗျူဟာရေး၊ မူဝါဒရေးရာ အစည်းအဝေးများ၏ သဘောသဘာဝအရ ငြင်းခုံဝေဖန် ဆွေးနွေးမှုများဖြင့် လူသစ်များ၏ အတွေးအမြင်ကို ရှုပ်ထွေးစေခြင်း၊ အတွေ့အကြုံနှင့် ရာထူး အဆင့်အတန်းအပေါ် မာန်တက်၍ ပမာမခန့် ပြောဆိုပြုမူခြင်းများ ရှိနေခြင်း၊ နိုင်ငံရေးလှုပ်ရှားမှုများမှာ လူထုသို့ empowerment လုပ်ခြင်းဖြင့် လက်တွဲခေါ်ယူခြင်း မရှိပဲ နိုင်ငံရေးတက်ကြွသူများအကြားတွင်ပင် ပြန်၍ လည်ပတ်နေခြင်း စသည့် အားနည်းချက်များနှင့် လူထုနှင့် ကွင်းဆက်ပြတ်မှုများ ဖြစ်ပွားလျက်ရှိသည်။

(၁.၄) လူထုထောက်ခံမှုရယူခြင်း

မည်သည့် တော်လှန်ရေးမဆို လူထုနှင့် ကွင်းဆက်ပြတ်သည်နှင့် အောင်မြင်မှု နှောင့်နှေးမည်မှာ သေချာလှပေသည်။ ပြည်ပနိုင်ငံတွင် အခြေစိုက်နေသော လူထု၏ အင်အားကို ထည့်သွင်း မတွက်ချက်၍ မရပါ။ ပြည်ပတွင် အခြေစိုက်ထားသော သိန်းနှင့်ချီနေသည့် မြန်မာလူအဖွဲ့အစည်းသည် ပြည်တွင်းတွင် နေထိုင်နေသော သန်းနှင့် ချီသည့် မြန်မာလူ့အဖွဲ့အစည်းနှင့် တိုက်ရိုက်ဆက်သွယ်မှု ရှိနေသူများ ဖြစ်သည်။ ပြည်ပအခြေစိုက် မြန်မာလူ့အဖွဲ့အစည်း၏ အတွေးအမြင်၊ သုံးသပ်ချက်နှင့် သဘောထားများသည် ပြည်တွင်းလူ့အဖွဲ့အစည်းသို့ တစုံတရာသော အတိုင်းအတာတခုအထိ သက်ရောက်မှု ရှိနိုင်ပေသည်။ သို့ဖြစ်ရာ ပြည်ပရောက် မြန်မာလူ့အဖွဲ့အစည်း၏ အင်အားကို တော်လှန်ရေးလုပ်ငန်းစဉ်များတွင် အသုံးပြုနိုင်ပါက ပြည်တွင်း နိုင်ငံရေး လုပ်ငန်းဆောင်တာများတွင် တိုးတက်မှုများ ရရှိလာမည်မှာ မလွဲဧကန်ဖြစ်သည်။ သို့ဆိုလျှင် ထောက်ခံမှုကို မည်သို့ ရယူမည်နည်း။

(၁) Charismatic attraction

ပြည်ပအခြေစိုက် မြန်မာ့တော်လှန်ရေး အဖွဲ့အစည်းများတွင် အရည်အချင်းရှိသော မျိုးဆက်ဟောင်း ခေါင်းဆောင်များနှင့် မျိုးဆက်သစ်ခေါင်းဆောင်များ ပါဝင်မှုရှိနေသည်။ ယင်းခေါင်းဆောင်များ၏ ကိုယ်ရည်ကိုယ်သွေး၊ အသိပညာ၊ အတတ်ပညာများကို အသုံးပြုပြီး လူ့အဖွဲ့အစည်းတွင် အများလက်ခံနိုင်မည့် ခေါင်းဆောင်များကို မွေးထုတ်ရန် လိုအပ်သည်။ လူ့အဖွဲ့အစည်း အတွင်းရှိ လူမျိုးစု အစုအဖွဲ့များ၊ ဘာသာရေးအစုအဖွဲ့များ၊ လူထု လူတန်းစား အလွှာများသို့ ထိုးဖောက်ဝင်ရောက်ရန် လိုအပ်သည်။ လူထုအား လှေကားချ စည်းရုံးရန် လိုအပ်သည်။ နိုင်ငံရေးခေါင်းဆောင်အနေဖြင့် အသာစီးယူ၍ သွားရောက်ဟောပြောဆရာလုပ်ခြင်း မဟုတ်ပဲ တသားတည်းဆက်ဆံရေး လုပ်နိုင်သည့် ခေါင်းဆောင်များမှသာ
ဤနည်းလမ်းကို အကောင်အထည်ဖော်သင့်သည်။ “မင်းဘာလဲ၊ ငါဘာလဲ” လုပ်တတ်သည့် ခေါင်းဆောင်များမှ ဤတာဝန်ကို မယူသင့်ပါ။

(၂) Esoteric appeals

ပြည်ပနိုင်ငံများတွင် ပညာတတ် လူ့အလွှာ တရပ် သီးခြားရပ်တည်နေလျက်ရှိကြသည်။ ယင်းတို့သည် လူအများနှင့် ရောနှောနေထိုင်ခြင်း မရှိပဲ မိမိတို့၏ ကျွမ်းကျင်ရာ အသက်မွေးဝမ်းကျောင်း ပညာရပ်များကို လက်တွေ့အသုံးချနေသူများ ဖြစ်သည်။ ပညာတတ်လူတန်းစားတို့၏ ဖြစ်လေ့ဖြစ်ထရှိသော အားနည်းချက် ဥာဉ်တခုမှာ တော်ရုံတန်ရုံနှင့် တဘက်သားကို အထင်မကြီးတတ်ခြင်း ဖြစ်သည်။ တခါတရံတွင် စိတ်ပိုင်းဆိုင်ရာ ရင့်ကျက်မှု မပြည့်သူဖြစ်ပါက တဘက်သားကို အထင်သေးတတ်သည်။


သို့ရာတွင် အဆိုပါ ပညာတတ်တို့သည် အယူအဆ၊ အတွေးအခေါ်၊ ရပ်တည်ချက်တို့နှင့် ပတ်သက်၍ ရှင်းရှင်းလင်းလင်းနှင့် တိတိကျကျ ပြောဆိုစည်းရုံးနိုင်သူများနှင့် တွေ့ဆုံရပါက အမှန်တရားကို ပညာဥာဏ်ဖြင့် ဆင်ခြင်သုံးသပ်ပြီး တော်လှန်ရေး၏ အမာခံအင်အားစုများ အထိ ဖြစ်လာတတ်ပေသည်။ ဘဏ္ဍာရေးအရ ကူညီပံ့ပိုးပေးသည့် တက်ကြွစွာ ထောက်ခံသူများလည်း ဖြစ်လာတတ်ပေသည်။ ယင်းတို့ကို စည်းရုံးမည့် ခေါင်းဆောင်များသည် အပြန်အလှန်လေးစားမှုနှင့် တန်ဖိုးထားမှုကို အကောင်အထည် ဖော်နိုင်သူ ဖြစ်ရမည်။ အခြေအနေ၊ အချိန်အခါနှင့်အညီ ဆုံးဖြတ်လုပ်ကိုင်တတ်သူ ဖြစ်ရန် လိုအပ်သည်။ တဦးချင်းစီအလိုက်၊ လိုက်လျောညီထွေရှိမည့် တာဝန်များကို ခွဲဝေ ပေးနိုင်သူ ဖြစ်ရမည်။ ထိုသူများကို လူအင်အား များလာစေရန် ရည်ရွယ်ချက် တခုတည်းနှင့် အဖွဲ့အစည်းများအတွင်းသို့ သွတ်သွင်းရန် ကြိုးပမ်းမှုများကို ရှောင်ကြဉ် သင့်သည်။ နိုင်ငံတကာ အစည်းအဝေးပေါင်းများစွာကို တက်ဖူး၊ လုပ်ဖူးနေသူ တယောက်ကို အရေမရ၊ အဖတ်မရ ဆွေးနွေးငြင်းခုံနေကြမည့် အစည်းအဝေး တခုသို့ ခေါ်သွားမိပါက တကြိမ်တည်းနှင့် လှည့်ပြေးသွားပေလိမ့်မည်။ ထိုသူတို့၏ တော်လှန်ရေးအပေါ် အမြင်နှင့် နှုတ်ထွက်စကားတို့သည် လူအများအပေါ်တွင် သက်ရောက်မှုများစွာ ရှိနိုင်သည်ဖြစ်ရာ Esoteric appeals ကို လုပ်ငန်းစဉ် တရပ်အနေဖြင့် သီးခြား အကောင်အထည်ဖော်ရန် လိုအပ်သည်။

(၃) Exoteric appeals

ဤလုပ်ငန်းစဉ်မှာ လူထုထဲတွင် အမှန်တကယ် ခံစားနေရသော အခြေအနေကို ဖော်ထုတ်၍ လူထုနှင့် တော်လှန်ရေး နီးကပ်လာစေရန် စည်းရုံးလှုံ့ဆော်ခြင်းဖြစ်ရာ အရေးကြီးသည့် လုပ်ငန်းစဉ်တရပ်ဖြစ်သည်။ ပြည်ပရောက် မြန်မာ့ လူ့အဖွဲ့အစည်းတွင် ရေပေါ်ဆီ လူတန်းစား လက်တဆုပ်စာမှ လွဲလျှင် လူအများစုမှာ စစ်အာဏာရှင်စနစ်ဆိုး၏ စီးပွားရေး၊ ပညာရေး၊ လူမှုရေး ယုတ်လျော့မှုများကြောင့် ပြည်တွင်းတွင် မနေနိုင်ပဲ ပြည်ပသို့ ထွက်ခွာလာကြသူများ ဖြစ်သည်။ စိတ်ထဲတွင် အာဏာရှင်စနစ်၏ ဆိုးကျိုးများကိုကား အနည်းနှင့်အများ သိနေကြပြီး ဖြစ်သည်။ သို့ရာတွင် ထိုသူများသည် အဘယ်ကြောင့် တော်လှန်ရေးသမားများ၊ တော်လှန်ရေးကို ထောက်ခံသူများ မဖြစ်လာသေးသနည်း။ တော်လှန်ရေး သမားများ၏ ၀ါဒဖြန့်ချိရေးနှင့် စည်းရုံးရေးယန္တရားများ အားနည်းနေမှုကြောင့် ဖြစ်နိုင်သကဲ့သို့၊ တက်ကြွလွန်သူများ၏ အတင်းအကြပ် စည်းရုံးမှုများကြောင့်လဲ ဖြစ်နိုင်ပေသည်။ စည်းရုံးရေးပထမ အဆင့်တွင် စနစ်၏ ဆိုးကျိုးများကို မီးမောင်းထိုးပြခြင်းများ ပြုလုပ်ရသည် ဖြစ်လေရာ ပြည်ပအခြေစိုက် မြန်မာလူ့အဖွဲ့အစည်းအတွင်း စနစ်၏ ဆိုးကျိုးများကို လူအများက သိရှိလက်ခံလာစေရေးကို ဦးတည် လုပ်ဆောင်သင့်ပေသည်။ ယင်းမှတဆင့် ထောက်ခံသူဖြစ်လာစေရန် ဒုတိယအဆင့်ကို တက်ရောက်စည်းရုံးရပေမည်။ ထောက်ခံသူမှ တက်ကြွလှုပ်ရှားသူ ဖြစ်လာစေရန်မူ စည်းကျော်နိုင်မည့် အခြေအနေနှင့် အချိန်အခါကို ချိန်ကိုက်ဖော်ဆောင်ပေးရန် လိုအပ်ပါသည်။

လူတယောက်အနေဖြင့် ကြီးပြင်းအရွယ်ရောက်နေသည့် အချိန်တခုတွင် ကြီးမားသော လူထုတိုက်ပွဲများ၊ နိုင်ငံရေး လှုပ်ရှားမှုများကို မကြုံရပါက (သို့မဟုတ်) တော်လှန်ရေးမိသားစု အသိုင်းအ၀ိုင်းနှင့် မနီးစပ်သူ ဖြစ်ပါက ကောက်ခါငင်ခါ တော်လှန်ရေးသမား တယောက်ဖြစ်လာနိုင်ချေ အလွန်ရှားပါးပါသည်။ လူထုလှုပ်ရှားမှု အခြေပြု ဒီမိုကရေစီ ပြောင်းလဲမှုဖြစ်စဉ်တွင် လူထုတိုက်ပွဲများ စဉ်ဆက်မပြတ်ဖော်ဆောင်မှု လိုအပ်ချက်ကို ထည့်သွင်းဖော်ပြထားချက်မှာ အဆိုပါ လူထုတိုက်ပွဲများသည် အဆုံးသတ်အောင်ပွဲကို မဆောင်ကျဉ်းနိုင်စေကာမူ တော်လှန်ရေးမျိုးဆက်များကို မွေးဖွားပေးနိုင်စေ၍ ဖြစ်ပါသည်။ သို့ဖြစ်ရာ စည်းကျော်ရမည့် အခြေအနေ၊ အခင်းအကျင်း မရှိသေး၍ ငြိမ်နေသူများကို ကြောက်ရွံ့သူများဟူ၍ သုံးသပ်၊ စွပ်စွဲမှုများ မပြုမိစေရန် လိုအပ်ပါသည်။ လူ့အဖွဲ့အစည်း၏ သဘောသဘာဝ၊ အမြင်နှင့် တန်ဖိုးများကို လေ့လာပြီးမှသာ Exoteric appeals လုပ်ငန်းစဉ်ကို အကောင်အထည်ဖော်သင့်သည်။

(၄) လှုပ်ရှားမှုများ အကောင်အထည်ဖော်ခြင်း

လူအများ ပြုလုပ်နိုင်မည့် လှုပ်ရှားမှုများကို အကောင်အထည်ဖော်ဆောင်ပေးရန် လိုအပ်သည်။ လှုပ်ရှားမှုသဏ္ဍာန်များမှာလဲ အမျိုးအစား အမျိုးမျိုး ရှိရန် လိုအပ်သည်။ လူတယောက်၏ လှုပ်ရှားနိုင်မှု အခြေအနေကို မကန့်သတ်ရ။ တော်လှန်ရေးလှုပ်ရှားမှုများ အကောင်အထည်ဖော်ရာ၌ ပြည်ပတော်လှန်ရေးသမားအများစုသည် မိမိက ခေါင်းဆောင်လုပ်ပြီး တိုက်ပွဲခေါ်ခြင်းများကို အလွန်အားသန်ကြသည်။ ဖော်ဆောင်ထားသည့် လှုပ်ရှားမှုတွင် လာရောက်ပူးပေါင်းရန်ကိုသာ လှုံ့ဆော်ခြင်း၊ ဆွဲခေါ်ခြင်းများ လုပ်လေ့ရှိကြသည်။ မိမိ၏ လှုပ်ရှားမှုကိုသာ ဗဟိုပြု စဉ်းစားလေ့ရှိရာ မပါဝင်လာသူများကို အပြစ်တင်လေ့ရှိကြသည်။ သို့ရာတွင် အောင်ပွဲ၏ အသက်သွေးကြောမှာ လူထုဖြစ်ရာ လူထုဗဟိုပြု စဉ်းစားမှုကိုလဲ သီးခြား ပြုလုပ်သင့်ပေသည်။ ယင်းသို့ မလုပ်လျှင် လူထုနှင့် တော်လှန်ရေး ကွင်းဆက်ပြတ်၍ တော်လှန်ရေး ခါးဆက်ပြတ်မည်မှာ မလွဲဧကန်ပင်ဖြစ်သည်။


ပြည်ပတွင် လက်ရှိအကောင်အထည်ဖော်နေသော လှုပ်ရှားမှုများတွင် အခြေအနေအမျိုးမျိုးကြောင့် မပါဝင်နိုင်သူများကို မည်သည့် လုပ်ငန်းတာဝန်များ ပေးအပ်မည်နည်း။ ထိုသူတို့ ပါဝင်နိုင်သည့် မည်သို့သော လှုပ်ရှားမှုများကိုပါ တွဲဖက် အကောင်အထည်ဖော်မည်နည်း။ ယင်းအချက်မှာ အာဏာရှင်ဆန့်ကျင်ရေး လှုပ်ရှားမှုများတွင် လူအများ ပူးပေါင်းပါဝင်လာနိုင်ရေးအတွက် အခြေခံကျသော မေးခွန်းများပင်ဖြစ်သည်။

(၅) Demonstration of potency

တော်လှန်ရေးသမားများတွင် တိုင်းပြည်အနာဂတ်ကို ပုံဖော်ဖန်တီးနိုင်သော အရည်အချင်းနှင့် အလားအလာများ ရှိသည်ကိုလည်း လူထုကို ပြသရန် လိုအပ်ပေသည်။ လူ့အဖွဲ့အစည်းအတွင်းတွင် “အာဏာရှင်ကိုလဲ မကြိုက်ဘူး။ ဒါပေမယ့် တော်လှန်ရေးသမားဆိုတဲ့ လူတွေကိုလဲ အယုံအကြည်မရှိဘူး” ဆိုသော အတွေးအခေါ် တရပ် ပြန့်နှံ့သွားမှုသည် တော်လှန်ရေးတရပ်အတွက် မည်မျှ အန္တရာယ်ကြီးမားသည်ကို တော်လှန်ရေးသမားတိုင်း သတိပြုရန် လိုအပ်သည်။ လူထုနှင့် တော်လှန်ရေး တသားတည်းဖြစ်ရန် ကြိုးပမ်းနေချိန်တွင် လူထုကြီးမှ တော်လှန်ရေးသမားများကို အကဲဖြတ် လေ့လာနေသည်ကို စွဲမြဲစွာ မှတ်သားထားရန် လိုအပ်သည်။ မိမိ၏ အရည်အချင်းနှင့် အရည်အသွေးကို တောက်ပြောင်နေစေရန် ကြိုးပမ်းဆောင်ရွက်ခြင်း၊ လူအများအထင်လွဲစေမည့်၊ အထင်သေးစေမည့် လုပ်ငန်းဆောင်တာများကို ရှောင်ကြဉ်ခြင်းတို့ကို လူထုထောက်ခံမှု ရယူရေး နည်းလမ်းအဖြစ် အသုံးပြုနိုင်သည်။



(၂) ပတ်ဝန်းကျင်အနေအထား

(၂.၁) Physical aspect

ပြည်ပရောက် မြန်မာ့လူ့အဖွဲ့အစည်း၏ ကိုးဆယ်ရာခိုင်နှုန်းခန့်သည် အီးမေးလ်နှင့် တယ်လီဖုန်း ဆက်သွယ်ရေး စနစ်ကို အသုံးပြုနိုင်ကြသည်။ ဆက်သွယ်ရေး စနစ်များ ကောင်းမွန်သည်။ ပြည်ပမှ မြန်မာနိုင်ငံသို့ ခေါ်ဆိုသော ဖုန်းများ၊ မြန်မာပြည်သို့ ပေးပို့သော အီးမေးလ်နှင့် စာများမှာ နေ့စဉ် ထောင်နှင့်ချီ၍ ရှိနိုင်သည်။


(၂.၂) Human Dimension

စီးပွားရေး အခြေအနေမှာ အလုပ်အကိုင်အခွင့်အလမ်းပေါ် မူတည်၍ ကွဲပြားခြားနားမှုများ ရှိသည်။ မြန်မာပြည်တွင်းမှ သိန်းနှင့်
ချီသော လူဦးရေ၏ စားဝတ်နေရေးကို ထောက်ပံ့ပေးနေသော အလုပ်သမားအင်အားစု တခုအဖြစ် ယူဆ၍ ရသည်။ အနာဂတ်နိုင်ငံတော်သစ်ကို တည်ဆောက်နိုင်မည့် အသိပညာရှင်၊ အတတ်ပညာရှင် များစွာလည်း ပါဝင်သည်။ မြန်မာ့ပညာရေး အဆင့်မြင့်မြင့် ရှင်သန်ရပ်တည်နိုင်ရေးကို ပေါင်းကူးပေးမည့် ကျောင်းသားအင်အားစုများလဲ ပါဝင်သည်။ ဤ အလုပ်သမား၊ ကျောင်းသား အင်အားစုကြီးသည် တည်ငြိမ်နေသော အင်အားစုကြီး မဟုတ်။ ရွေ့လျားနေသော အင်အားစုကြီးဖြစ်သည်။ အ၀င်အထွက်၊ အသွားအပြန်များ ရှိနေသည်။

(၂.၃) တော်လှန်ရေး အခွင့်အလမ်းများ

တော်လှန်ရေးတခု၏ အရေးကြီး လုပ်ငန်းဆောင်တာများဖြစ်သော မြေအောက်လှုပ်ရှား ချိတ်ဆက်ရေး၊ ပြန်ကြားရေးနှင့် သတင်းဖြန့်ဖြူးရေး၊ ထောက်ပံ့ရေးနှင့် သယ်ယူပို့ဆောင်ရေး၊ ဘဏ္ဍာရေး၊ တည်ဆောက်စည်းရုံးရေး၊ ဆက်သားတာဝန် စသည်များကို ဤအင်အားစုကြီးပေါ်တွင် မူတည် ဖော်ဆောင်နိုင်သည့် အခြေအနေများ ရှိသည်။


(၃) အဖွဲ့အစည်း

(၃.၁) လက်ရှိအဖွဲ့အစည်းများ အခြေအနေ

ပြည်ပမှ မြန်မာ့အရေး လှုပ်ရှားမှု စစ်မျက်နှာတွင် အဖွဲ့အစည်း ရာပေါင်းများစွာ ပါဝင်နေသည်။ အဆိုပါအဖွဲ့အစည်းများသည် နိုင်ငံအလိုက် ဖွဲ့စည်းထားသော တပ်ပေါင်းစုများတွင် ထပ်မံ ပါဝင်နေကြပြီး၊ တကမ္ဘာလုံးကို ကိုယ်စားပြုချိတ်ဆက်နေသော ကွန်ယက် အဖွဲ့များနှင့် ဖိုရမ်အဖွဲ့များလည်း ရှိသည်။ အဖွဲ့အစည်းများ၏ ပင်မလှုပ်ရှားမှုများမှာ ဆန္ဒပြပွဲများ ပြုလုပ်ခြင်း၊ အခမ်းအနားများ ကျင်းပခြင်း၊ သက်ဆိုင်ရာ နိုင်ငံအစိုးရများအား ကင်ပိန်းများ ပြုလုပ်ခြင်း တို့ဖြစ်သည်။


(၃.၂) အားနည်းချက်များ

များပြားလှသော အဖွဲ့အစည်းများအကြားတွင် ခေါင်းဆောင်ပိုင်း အားပြိုင်မှုများ ရှိနေသည်။ တပ်ပေါင်းစု ချိတ်ဆက်ကွန်ယက်
လှုပ်ရှားမှုပေါ်တွင် အခြေမခံပဲ အဖွဲ့များ ပေါင်းစည်းလိုက်၊ တဖွဲ့ထပ်ပေါ်လာလိုက်၊ ကော်မတီများ ဖွဲ့စည်းပြီး သက်ဝင်လှုပ်ရှားမှုများ လျော့နည်းလိုက်၊ ခေါင်းဆောင်နေရာနှင့် တာဝန်ယူမှုပေါ် မူတည်၍ သဘောထား ကွဲလဲပြီး ပြိုကွဲလိုက်၊ အသစ်ပေါ်လာလိုက် စသည်များဖြင့် နှစ်ပေါင်းများစွာ သံသရာ လည်နေသည်။

အဖွဲ့အစည်းရေးရာကဏ္ဍတွင် scope နှင့် structure နှစ်မျိုးရှိရာ structure ထဲတွင် ပါဝင်မည့် ခေါင်းဆောင်နေရာများကို ဦးစားပေးမှု လွန်ကဲသွားခြင်းကြောင့်၊ scope တွင် အားနည်းသွားသည်။ လူအများ စုပေါင်းပြုလုပ်ခြင်းမှ ထွက်ပေါ်လာသည့် synergy ကို ထုတ်ဖော်နိုင်ခြင်း မရှိ ဖြစ်လာသည်။ တည်ဆောက်စည်းရုံးရေးနှင့် ၀ါဒဖြန့်ချိရေး လုပ်ငန်းများကို အကောင်အထည် မဖော်နိုင်ခြင်းကြောင့် လူ့အဖွဲ့အစည်းနှင့် ကင်းကွာလာသည်။ လူတဦးတယောက်က “နိုင်ငံရေး လုပ်ချင်တယ်၊ ဘာလုပ်ရမလဲ” ဟု မေးလာချိန်တွင် ဆန္ဒပြပွဲနှင့် အခမ်းအနားများ လာခိုင်းရုံမှ လွဲ၍ ဘာတာဝန်ပေးရမည် မသိ ဖြစ်နေတတ်ကြသည်။

အဖွဲ့အစည်းအများစုတွင် လက်ဆင့်ကမ်း ပညာပေးမှု မရှိသလောက် နည်းပါးသည်။ မျိုးဆက်ဟောင်းနှင့် မျိုးဆက်သစ်များ အကြား ပေါင်းကူးတံတားများ မရှိ။ လက်ဆင့်ကမ်းခေါင်းဆောင်မှုစနစ်ကို နေရာလုမှုဟု တလွဲတွေးထင်နေသူများ ရှိသည်။ တော်လှန်ရေး၏ လည်ပတ်မှု ယန္တရားကို အသက်ဆက်စေမည့် လေ့ကျင့်ပညာပေးရေးနှင့် ကေဒါကောင်းတယောက် ဖြစ်စေရန် ပြုစုပျိုးထောင်ပေးရေး စီမံချက်ကို အကောင်အထည်ဖော်မှု အလွန်နည်းသည်။ ဆွေးနွေးလိုက်၊ ဆုံးဖြတ်လိုက်၊ ပြန်ဆွေးနွေးလိုက်၊ ဆုံးဖြတ်လိုက်ဖြင့် အကောင်အထည်ဖော်မှုအဆင့်သို့ လုံးဝမတက်တော့သည့် မူများ ထွက်ပေါ်လျက်ရှိသည်။

(၃.၃) လိုအပ်ချက်များအား ဖြည့်ဆည်း ခြင်း

အဖွဲ့အစည်းအတွင်းတွင် ပါဝင်လာသူများ၏ တဦးချင်း ကိုယ်ရေးမှတ်တမ်းများကို လေ့လာဆန်းစစ်ပြီး မည်သို့သော လုပ်ငန်းတာဝန်များနှင့် သင့်လျော်မည်ကို ခေါင်းဆောင်များမှ ဆုံးဖြတ် တာဝန်ပေးခြင်း ပြုလုပ်ခြင်းဖြင့် လူနှင့် တာဝန် သတ်သတ်မှတ်မှတ် ဖြစ်လာစေနိုင်သည်။


စုပေါင်းခေါင်းဆောင်မှုနှင့် အလှည့်ကျခေါင်းဆောင်မှုစနစ်များ ကျင့်သုံးခြင်းဖြင့် ထိရောက်မှု မရှိသော ခေါင်းဆောင်မှုကို အစားထိုးနိုင်သည်။ ရာထူးနှင့် တာဝန်ယူမှုကို ပြန်လည်ဆန်းစစ် ဝေဖန်ချက် ပြုခြင်း၊ စီမံချက်များ၏ ထိရောက်မှုကို ပြန်လည်ဆန်းစစ်ခြင်း တို့ဖြင့် အရည်အသွေး ထိန်းချုပ်မှု လုပ်နိုင်သည်။

အစည်းအဝေးတိုင်းတွင် ယခင်အစည်းအဝေးများက ချမှတ်ခဲ့သော ရှေ့လုပ်ငန်းစဉ်များကို မည်မျှအထိ အကောင်အထည်ဖော် ပြီးစီးခဲ့သနည်း၊ မည်သူက တာဝန်ယူခဲ့ပြီး မည်မျှအတိုင်းအတာအထိ တာဝန်ယူပြီးမြောက်ခဲ့သနည်း ဆိုသည်ကို ပြန်လည်ဆန်းစစ်ပြီး မှသာ ရှေ့လုပ်ငန်းစဉ်များ ဆက်လက်ချမှတ်သင့်သည်။ လုပ်ငန်းစဉ်တခု ချမှတ်ပြီးပါက အလုပ်အဖွဲ့တခုကို ထိုလုပ်ငန်းစဉ်နှင့် တွဲဖက်၍ ချမှတ်သင့်သည်။ ထိုအလုပ်အဖွဲ့၏ လုပ်ငန်းဆောင်တာများကို စဉ်ဆက်မပြတ် စောင့်ကြည့်လေ့လာမှုများ ပြုလုပ်၍ တိုးတက်မှုမရှိပါက အစားထိုးသင့်သည်။

နိုင်ငံရေးအစည်းအဝေးများကို အလုပ်အဖွဲ့အစည်းအဝေးများနှင့် လေ့လာဆွေးနွေးရေး အစည်းအဝေးများ အနေဖြင့် သီးခြားခွဲကျင်းပသင့်သည်။ နိုင်ငံရေး ရေချိန် မတူသည့်လူများကို လုပ်ငန်းစဉ်ချမှတ်ရေး အစည်းအဝေးများသို့ ခေါ်ဆောင်သွားပါက အစည်းအဝေးများတွင် ကြန့်ကြာမှုများ ဖြစ်ခြင်း၊ အရေမရ အဖတ်မရ ငြင်းခုံနေရခြင်းများဖြင့်သာ အချိန်ကုန်လိမ့်မည်ဖြစ်ရာ မည်သည့်နေ့တွင်၊ မည်မျှ လူအင်အားဖြင့် မည်သို့သော အစည်းအဝေးကို လုပ်လိုက်သည်ဟူ၍ မီဒီယာများပေါ်တွင် ကြွားဝါရန် မဟုတ်ပဲ ထိရောက်စွာ အမှန်တကယ် အကောင်အထည်ဖော်ရမည့် လုပ်ငန်းစဉ်မျာ ချမှတ်ရသော အစည်းအဝေးဖြစ်ပါက သီးခြားခွဲ ကျင်းပသင့်သည်။

သက်ဆိုင်ရာ နိုင်ငံအလိုက် နိုင်ငံရေးသင်တန်းများ၊ ခေါင်းဆောင်သင်တန်းများ၊ စီမံခန့်ခွဲရေးသင်တန်းများနှင့် capacity building သင်တန်းများ ဖွင့်လှစ်၍ တော်လှန်ရေး ခါးဆက်မပြတ်စေရန် ကြိုးပမ်းဆောင်ရွက်သင့်သည်။

(၄) ကွင်းဆက်ပြတ်မှု

(၄.၁) ကွင်းဆက်ပြတ်မှုများ

ပြည်ပ အခြေစိုက် နိုင်ငံရေး လှုပ်ရှားမှုများတွင် ကွင်းဆက်ပြတ်မှု သဏ္ဍာန်သုံးမျိုး ဖြစ်ပွားတတ်သည်။

(၁) ခေါင်းဆောင်များနှင့် အဖွဲ့ဝင်များ အကြားမှ ကွင်းဆက်ပြတ်မှု

ခေါင်းဆောင်နှင့် အဖွဲ့ဝင်များ အကြားမှ ကွင်းဆက်ပြတ်မှုသည် စဉ်ဆက်မပြတ် လှုပ်ရှားမှုများကို ပြတ်တောင်းပြတ်တောင်း လှုပ်ရှားမှုအဖြစ်သို့ ကျဆင်းသွားစေနိုင်သည်။ ခေါင်းဆောင်မှုဆိုသည်မှာ အခမ်းအနားများ၊ လှုပ်ရှားမှုများ ရှိမှ ခေါင်းဆောင်ရောက် လာခြင်းကို ဆိုလိုသည်မဟုတ်။ အတူတကွ နီးနီးစပ်စပ် နေထိုင်နေခြင်းကို ဆိုလိုသည်မဟုတ်။ ရုံးခန်း တခန်းတွင် ထိုင်နေပြီး တကမ္ဘာလုံးမှ စီးပွားရေး လုပ်ငန်းများကို ဦးဆောင်နေသည့် စီးပွားရေး ခေါင်းဆောင်များ၊ ကွန်ပျူတာတလုံးရှေ့တွင် ထိုင်နေပြီး မိုင်ပေါင်းများစွာ ဝေးကွာနေသော နေရာမှ ဖြစ်ရပ်များကို အပ်ကျတာကအစ သိရှိဆုံးဖြတ် ပေးနေရသော နိုင်ငံရေး၊ စစ်ရေးခေါင်းဆောင်များ ယနေ့ကမ္ဘာတွင် များစွာရှိသည်။ အရေးကြီးသည်က ဆက်သွယ်ရေး စနစ်နှင့် ဆက်သွယ်ရေး လမ်းကြောင်း ဖြစ်သည်။ အဖွဲ့ဝင်တယောက်၏ ဆက်သွယ်မှုတွင် အကြောင်းအရာ၊ အချက်အလက် အရေးကြီးမှုပေါ်တွင် အခြေခံ၍ လိုအပ်သော ဆုံးဖြတ်ချက်များကို ခေါင်းဆောင်များမှ ဆုံးဖြတ်ချက် ပေးကြရမည်ဖြစ်သည်။

(၂) တော်လှန်ရေးအဖွဲ့အစည်းများအကြားမှ ကွင်းဆက်ပြတ်မှု

တော်လှန်ရေးအဖွဲ့အစည်းများ အကြားတွင် ကွင်းဆက်ပြတ်လျှင် လှုပ်ရှားမှုများ ဟန်ချက် မညီပဲ ဖြစ်တတ်သည်။ ယင်းထက် ပိုဆိုးပါက လှုပ်ရှားမှုများ ထပ်နေခြင်းဖြစ်သည်။ လှုပ်ရှားမှုအတွက် အရေးပါသော ငွေအင်အား၊ လူအင်အားများကို အလဟဿ ဖြုန်းပစ်လိုက်သကဲ့သို့ ဖြစ်တတ်သည်။ ရေတွင်းတူးရာတွင် မည်မျှပင် အားစိုက်စိုက်၊ ရေကြောမရှိသည့် နေရာတွင်သာ ထပ်တလဲလဲ ၀ိုင်းတူးနေပါက တွင်းကြီးသာ ပိုနက်သွားမည်။ ရေတော့ ထွက်လာမည် မဟုတ်။ ကွင်းဆက်ပြတ်မှု မရှိမှသာ ချိတ်ဆက်လှုပ်ရှားမှု ပြုနိုင်ပြီး၊ အင်အားကို စနစ်တကျ သုံးနိုင်မည်ဖြစ်သည်။


(၃) တော်လှန်ရေးသမားများနှင့် လူ့အဖွဲ့အစည်းအကြားမှ ကွင်းဆက်ပြတ်မှု

ဤသည်မှာ တော်လှန်ရေးကို ရှေ့တိုးမရအောင် နိုင်ငံရေး အကျပ်ဆိုက်မှု ဖြစ်စေနိုင်သော အဓိက အချက်ဖြစ်သည်။ အလွန်အရေးကြီးရုံမက အန္တရာယ် အလွန်ကြီးမားသည့် ကွင်းဆက်ပြတ်မှု ပြဿနာဖြစ်သည်။


(၄.၂) ကွင်းဆက်လိုအပ်ချက်များအား ဖြည့်ဆည်းခြင်း

သက်ဆိုင်ရာ အဖွဲ့အစည်း၊ သက်ဆိုင်ရာ တပ်ပေါင်းစု၊ သက်ဆိုင်ရာ ဖိုရမ်များ အလိုက် ခေါင်းဆောင်များနှင့် ဆက်သွယ်ရေး စနစ်၊ ဆက်သွယ်ရေး လမ်းကြောင်းများကို ပြန်လည်သုံးသပ်၍၊ ကွက်လပ်များ ရှိပါက ဖြည့်ဆည်းရန် လိုအပ်သည်။ အဖွဲ့အစည်းများအကြားတွင် ကွင်းဆက်မပြတ်စေရန် တပ်ပေါင်းစုသဏ္ဍာန် ချိတ်ဆက်လှုပ်ရှားမှုနှင့် စုပေါင်းခေါင်းဆောင်မှု လိုအပ်သည်။ တပ်ပေါင်းစုတွင် စုပေါင်းခေါင်းဆောင်မှု သဏ္ဍာန်မပါလျှင် အလုပ်များ ရှေ့ဆက်မတိုးပဲ ခေါင်းဆောင်စောင့်ခြင်း၊
မျှော်ခြင်းများဖြင့် အချိန်ကုန်မည် ဖြစ်သည်။ ပြည်တွင်း လူထုတိုက်ပွဲဖော်ဆောင်ရေး ဆိုသည်ကို အကြိမ်များစွာ ရေရွတ်ပြီး၊ ထိုလူထုတိုက်ပွဲဖော်ဆောင်ရေးကို တွန်းအားပေးရန် အနီးတွင် ရှိနေသည့် လူ့အဖွဲ့အစည်း အင်အားကို မေ့မကျန်ခဲ့စေရန် သတိပြုသင့်သည်။ ထို လူ့အဖွဲ့အစည်း၏ အင်အားသည် ပြည်တွင်း လှုပ်ရှားမှုများကို တစုံတရာ သက်ရောက်မှုရှိနေသော အင်အားဖြစ်ကြောင်းကို အမှန်အတိုင်း သိမြင်ရန် လိုအပ်သည်။

(၅) ပြည်ပထောက်ခံမှု

(၅.၁) ထောက်ခံမှုလေးရပ်

ပြည်ပထောက်ခံမှုဆိုရာတွင် စိတ်ပိုင်းဆိုင်ရာ ထောက်ခံမှု (Moral Support) ၊ နိုင်ငံရေးထောက်ခံမှု (Political Support)၊ ရုပ်ဝတ္ထုပစ္စည်းထောက်ပံ့မှု (Material Support) နဲ့ နယ်မြေဒေသ၊ အခြေစိုက် စခန်း ပံ့ပိုးပေးမှု (Sanctuary Support) များ ပါဝင်သည်ဖြစ်ရာ မိမိတို့ လုပ်နေသည့် လုပ်ငန်းဆောင်တာများက မည်သည့် ထောက်ခံမှုကို ဦးတည်ဆောင်ရွက်နေသနည်း ဆိုသည်ကို ပြန်လည်ဆန်းစစ်ရန် လိုအပ်သည်။ Moral support ဆိုရာတွင် နိုင်ငံခြားအစိုးရ(သို့မဟုတ်) နိုင်ငံတကာ အဖွဲ့အစည်းများမှ တော်လှန်ရေးကို ထောက်ခံမှုအား စတိတ်မင့်များနှင့် ကြေငြာချက်များ တရားဝင် ထုတ်ပြန်ကြေငြာခြင်း ဖြစ်သည်။


Political support ဆိုရာတွင် နိုင်ငံရပ်ခြား အစိုးရများမှ တော်လှန်ရေးအင်အားစုများ၏ နိုင်ငံတကာ ရည်မှန်းချက်များကို ပြည့်မှီလာအောင် အကူအညီ ပေးခြင်းဖြစ်သည်။ Material support ဆိုရာတွင် တော်လှန်ရေးအတွက် ငွေကြေး၊ လက်နက်ပစ္စည်းနဲ့ လေ့ကျင့်သင်ကြားပေးမှုတွေကို ပံ့ပိုးပေးခြင်းကို ဆိုလိုပြီး၊ Sanctuaries ဆိုသည်မှာ တော်လှန်ရေးသမားများအား လေ့ကျင့်သင်ကြားပေးရေး၊ လက်နက်များ သိုလှောင်သိမ်းဆည်းရေး၊ အော်ပရေးရှင်းများ စီမံရေးဆွဲရေးနဲ့ ခေတ္တဆုတ်ခွာလာနိုင်မှုများအတွက် လိုအပ်သည့် နယ်မြေဒေသ ပံ့ပိုးပေးထားခြင်းကို ဆိုလိုသည်။

(၅.၂) သုံးသပ်ချက်

ပြည်ပအခြေစိုက် မြန်မာ့အရေး လှုပ်ရှားမှုမှ အဖွဲ့အစည်းအားလုံးနီးပါးသည် သက်ဆိုင်ရာ နိုင်ငံ အစိုးရများနှင့် နိုင်ငံတကာ အဖွဲ့အစည်းတို့၏ ထောက်ခံမှုများ ရရှိစေရန် တစိုက်မတ်မတ် လှုပ်ရှားဆောင်ရွက်လျက်ရှိကြသည်။ ယင်းသို့ ဆောင်ရွက်ရာတွင် သက်ဆိုင်ရာ အစိုးရများနှင့် နိုင်ငံတကာအဖွဲ့အစည်းတို့မှ ၄င်းတို့၏ နိုင်ငံခြားရေး မူဝါဒများနှင့်အညီ ထောက်ခံနိုင်မှု မည်မျှ အဆင့်အထိရှိသည်၊ မည်မျှအဆင့်အထိ ထောက်ခံပေးထားပြီဆိုသည်ကို သုံးသပ်ဆန်းစစ်ဖို့ လိုသည်။ ၅၀ သာ တတ်နိုင်သူထံမှ ၁၀၀ တိုးတောင်းလဲ ထူးမည် မဟုတ်။ တောင်းဆိုနေရင်း အချိန်သာ ကုန်သွားမည်။ ၅၀ တတ်နိုင်ပြီး ၁၀ ပဲ ထုတ်ပေးထားလျှင်ကား တောင်းဆိုခြင်းသည် အကျိုး ရှိနိုင်ပေသည်။ ထုတ်ပေးနိုင်သမျှ အကုန်ထုတ်ပေးထားပြီး၊ မုန့်သွားဝယ်စားခိုင်းသည်ကို မုန့်စားဖို့ အားမထုတ်ပဲ ၁၀၀ ရအောင် တောင်းနေလျှင်တော့ မပေးနိုင်သည့်သူက စိတ်ရှုပ်လာပြီး ပေးထားသော ၅၀ ကိုပါ ပြန်သိမ်းသွားသည့် အခြေအနေ ဆိုက်လိမ့်မည်။




(၆) အာဏာရှင်တို့၏ ခြေလှမ်းများ

(၆.၁) စိန်ခေါ်မှုများ

စစ်ပွဲတခုတွင် တိုက်စစ်ကိုသာ အာရုံစိုက်ပါက အရှုံးနှင့် ရင်ဆိုင်ရတတ်သည်။ ရန်သူ့ခြေလှမ်းများ မိမိတို့ ထိန်းချုပ်ရာ နယ်မြေများအတွင်းသို့ မည်မျှအထိ ၀င်ရောက်နေသည်ကို သတိပြုကြည့်မိရန် လိုအပ်သည်။ လူအများက ရန်သူ့သတင်းပေးများကို ကြောက်လေ့ရှိကြသည်။ ပြည်ပနိုင်ငံရေး လှုပ်ရှားမှုသဏ္ဍာန်တွင်မူ မြေအောက် လှုပ်ရှားမှုနှင့် ဆက်စပ်နေသည့် ကိစ္စရပ်များနှင့် လူများမှ အပ ကျန်အဖွဲ့အစည်းများ၏ သတင်းအချက်အလက်နှင့် လှုပ်ရှားမှုများမှာ လူအများ မသိမှာ စိုး၍ မီဒီယာများ၊ အင်တာနက်များပေါ်သို့ ဓာတ်ပုံများ၊ သတင်းများ တွန်းတင်နေရသည့် အခြေအနေဖြစ်နေသည်။ ဆန္ဒပြပွဲ အချိန်၊ နေရာဆိုသည်ကလဲ မည်သည့်နေ့ရက်တွင် မည်သည့် အချိန်မျိုး၌ မည်သည့်နေရာမျိုးတွင် ဆန္ဒပြပွဲရှိနိုင်သည်ကို မသိသိအောင် ကြေငြာနေကြရသည်။ အခမ်းအနား ဆိုသည်မှာလဲ ထိုနည်း၎င်း။ ဓာတ်ပုံများ အင်တာနက်ပေါ် မပါလာခြင်းများ၊ လှုပ်ရှားမှုသတင်းများ မီဒီယာများပေါ်တွင် မပါလာခြင်းများကိုပင် ပြန်စိုးရိမ်ကြရမည့် နိုင်ငံရေးအသွင်သဏ္ဍာန်မှာ ရှိနေသည်။

သို့ဖြစ်ရာ ရန်သူ့ သတင်းပေးများ၏ အန္တရာယ်ကား သိပ်မကြီးလှ။ အမှန်တကယ် အန္တရာယ် ကြီးသည်က တော်လှန်ရေး၏ အောင်မြင်ရေး သော့ချက်တခုဖြစ်သော နိုင်ငံတကာ ထောက်ခံမှုကို ပုံပြောင်းသွားစေရန် ကြိုးပမ်းလှုပ်ရှားမှုများ ဖြစ်သည်။ လူ့အဖွဲ့အစည်းမှ တော်လှန်ရေးအပေါ် အမြင်မှားများ ဖြစ်လာစေရန် ဖော်ဆောင်သည့် ကြိုးပမ်းမှုများ ဖြစ်သည်။ တော်လှန်ရေးတွင် ဝေဖန်ဆန်းစစ်သူ နှစ်မျိုး ရှိသည်။ ပထမ တမျိုးမှာ အားနည်းချက်များကို ထောက်ပြဝေဖန်၍ လုပ်ငန်းဆောင်တာများကို မည်သို့ တိုးတက်ဆောင်ရွက်သင့်သည်ကို အကြံပေးသူများ ဖြစ်ပြီး၊ ဒုတိယ တမျိုးများ အားနည်းချက်များကို ရှုံ့ချဝေဖန်၍ “အာဏာရှင်လဲ မကောင်း၊ တော်လှန်ရေးသမားများလဲ ထိုနည်းလည်းကောင်း” ဆိုသော အမြင်မှားကို ဖြန့်ဝေသူများဖြစ်သည်။ တော်လှန်ရေးခေါင်းဆောင်များမှ ဤလူနှစ်မျိုးကို ကွဲကွဲပြားပြား မြင်တတ်ဖို့ လိုသည်။ အပြုလားမသိ၊ အဖျက်လား မကွဲပြားလျှင် တုန့်ပြန်မှုများ မှားတတ်သည်။ မလိုလားအပ်သော နောက်ဆက်တွဲပြဿနာများ ဖြစ်သွားတတ်သည်။ သတိပြုရန် လိုအပ်သည်။

မည်သို့ဆိုစေ ပြည်ပအခြေစိုက် မြန်မာ့နိုင်ငံရေး မျက်နှာစာတွင် ဤစိန်ခေါ်မှု နှစ်ရပ်မှာ အလွန်ပင် အရေးကြီးပါသည်။ တိုက်ပွဲချိန်ခွင်လျှာ အပြောင်းအလဲ ဖြစ်စေနိုင်ပါသည်။ သို့ဖြစ်ရာ ရန်သူ့လူများမှ နိုင်ငံတကာအစိုးရများနှင့် အဖွဲ့အစည်းကို ချဉ်းကပ်လှုပ်ရှားမှုများ၊ စစ်အာဏာရှင်စနစ်ကို သက်ဆိုးရှည်စေမည့် အယူအဆများအား လူ့အဖွဲ့အစည်းသို့ ဖြန့်ဖြူးခြင်းများကို သတိပြု လေ့လာစောင့်ကြည့်ကြရန်နှင့် ကန့်ကွက်မှုများ ပြုလုပ်ရန် လိုအပ်လှပေသည်။ လူနှင့် စနစ်ကို ခွဲခြားပြီး စည်းရုံးရေး လုပ်ငန်းများ ဖော်ဆောင်သင့်ပြီဖြစ်သည်။

နိဂုံး

ယခု တင်ပြထားသော အကြောင်းအရာများတွင် ရေတိုလုပ်ငန်းဆောင်တာများ ပါဝင်သကဲ့သို့ ရေရှည် လုပ်ငန်းဆောင်တာများလဲ ပါဝင်ပါသည်။ ပြည်ပရောက် မြန်မာ့လူ့အဖွဲ့အစည်းသဏ္ဍာန်၊ တည်နေရာအနေအထား၊ နိုင်ငံတကာထောက်ခံမှု ရရှိနိုင်မှု အခွင့်အလမ်း စသည်များသည် (၂၀၁၀) အလွန်ကာလ အာဏာရှင်ဆန့်ကျင်ရေး လှုပ်ရှားမှုများအတွက် အတိုင်းအတာ တခုအထိ အရေးကြီးပါသည်။

ရေရှည်လုပ်ငန်းများကိုပဲ ဖိနေစဉ် ရေတိုတွင် ပေါ်လာသော အခွင့်အလမ်းများကို မဆုပ်ကိုင်နိုင်သောကြောင့် အမှားအယွင်းများ ဖြစ်ခြင်း၊ ရေတိုအိပ်မက်များဖြင့် စိတ်ကူးယဉ်မှုများ မပြည့်ဝသောအခါ ရေရှည် တည်ဆောက်ပြင်ဆင်မှုများ မရှိထားခဲ့သောကြောင့် ခါးဆက်ပြတ်သွားခြင်း စသည့် အစွန်း နှစ်ဘက်ကို ရှောင်ကျဉ်နိုင်ရန် ရေတိုလုပ်ငန်းစဉ်၊ ရေရှည်လုပ်ငန်းစဉ်များ တပြိုင်တည်း ချမှတ် ဖော်ဆောင်သင့်ပါကြောင်း တင်ပြလိုက်ရပါသည်။



ခင်မမမျိုး (မြန်မာပြည် လွတ်မြောက်ရေးအဖွဲ့ချုပ်)

အပြည့်အစုံ ဖတ်ရန် ...

Sunday, February 27, 2011

အင်းစိန် ဗုံးကွဲမှု ထိခိုက် ဒဏ်ရာရ

ရန်ကုန်မြို့ အင်းစိန် ကမ်းနားလမ်းမှာ ဒီကနေ့ ညနေပိုင်းက ဗုံးပေါက်ကွဲမှုတခု ဖြစ်ပွားပြီး ထိခိုက်ဒဏ်ရာရတာတွေ ရှိတယ်လို့ သိရပါတယ်။ ဒီအကြောင်းနဲ့ ပတ်သက်လို့ မသိင်္ဂီထိုက်က စုံစမ်းမေးမြန်းပြီး တင်ပြပေးထားပါတယ်။

အင်းစိန်မြို့ ကမ်းနားလမ်းမှာရှိတဲ့ အောင်ဇေယျတံတား အနီးမှာ ဒီကနေ့ ည ၇ နာရီကျော်လောက်က ဗုံးပေါက်ကွဲမှုတခု ဖြစ်ခဲ့တာပါ။ ဒီဗုံးကွဲမှုနဲ့ ပတ်သက်ပြီး အနီးအနား ရပ်ကွက်မှာ နေထိုင်တဲ့ အခင်းဖြစ်ပွားရာကို သွားကြည့်သူ တဦးကို ဆက်သွယ်မေးမြန်းကြည့်ရာမှာ သူက အခုလိုပြောပါတယ်။

“၇ နာရီ မထိုးခင်လောက်တုန်းကပဲ ဗုံးပေါက်သွားလို့၊ တံတားနားလေးကလို့ ပြောတယ်။ အသံအကျယ်ကြီး ကြားတယ်။ ခွဲတဲ့လူတော့ အောက်ပိုင်းပြတ်သွားတယ်လို့ ပြောတယ်။ ဘေးက ၂ ယောက် ထိသွားတယ်။ ခွဲတဲ့သူနဲ့ဆိုရင် ၃ ယောက် ဒဏ်ရာရသွားတာပေါ့။ အသံကတော့ အကျယ်ကြီး ကြားရတယ်။ အဲဒီနားမှာ ထရန်စဖော်မာရှိတော့ ထရန်စဖော်မာ ပေါက်တယ်လို့ ထင်တာ။ ဒါပေမဲ့ မီးတွေလည်း မပြတ်ဘူးဆိုတော့ နောက်ပိုင်းကျမှ ဗုံးကွဲတာလို့ သိရတယ်။”

အခင်းဖြစ်ပြီးပြီးချင်းမှာပဲ အနီးတ၀ိုက်မှာ အာဏာပိုင်တွေက လုံခြုံရေးကို တိုးမြှင့် ချထားလိုက်တယ်လို့ အဲဒီဒေသခံက ပြောပါတယ်။

“အခုတော့ ဒီမှာ လုံခြုံရေးတွေ ရောက်လာပြီ။ သူတို့ ဒီဘက်ကို ညပိုင်း ဧည့်စာရင်းစစ်ဖို့ လုပ်နေကြတယ်။ ဒဏ်ရာရလို့ အခု အဲဒီလမ်းဘက်ကတောင် မသွားရဘူး၊ ပိတ်ထားတယ်။ လောလောဆယ် လုံခြုံရေးတော့ ပထမဆုံး စဖြစ်ဖြစ်ချင်းတော့ ရောက်လာပါတယ်။ လူတွေကလည်း အများကြီး ရောက်လာတယ်ဆိုတော့ လုံခြုံရေးတွေ၊ လူတွေ မခွဲတတ်ဘူး။ ခွဲလို့မရဘူး။ လူတွေအကုန်လုံးကလည်း အဲဒီမှာ စုပြုံပြီး ရောက်လာတော့ လမ်းက ပိတ်သွားရော။ လူတွေက ကြိတ်ကြိတ်တိုးပြီးတော့ကို ပိတ်သွားတာ။

“ကြောက်လည်းကြောက်၊ အံ့လည်း အံ့သြပြီး တိုက်ခန်းတွေမှာရှိတဲ့ လူတွေ အကုန်လုံးကလည်း ထွက်ကြည့်၊ အဲဒီလိုမျိုးဖြစ်တော့ ပိတ်သွားတာ။ နောက်ကျတော့ လုံခြုံရေးတွေက အန္တရာယ် ဖြစ်နိုင်တယ်ဆိုပြီး သူတို့တွေရောက်လာတော့ ဖယ်ဖယ်ဆိုပြီး လမ်းတွေ ပိတ်ပြီးတော့ ဒဏ်ရာရတဲ့သူတွေကိုတော့ လူနာတင်ကားနဲ့ ခေါ်သွားတယ်။”

အင်းစိန်မှာ ဒီနေ့ ဖြစ်ပွားခဲ့တဲ့ ဗုံးပေါက်ကွဲမှုနဲ့ ပတ်သက်ပြီး ဒေသခံတဦး ပြောပြသွားတာ ဖြစ်ပါတယ်။

ဒီကိစ္စနဲ့ ပတ်သက်ပြီး ဗွီအိုအေက အင်းစိန် မီးသတ်ဌာနကို ဆက်သွယ် မေးမြန်းကြည့်တဲ့ အခါမှာ အကြီးအကဲတချို့ အခင်းဖြစ်ပွားရာကို လိုက်သွားပြီး စုံစမ်းဆဲ ဖြစ်တယ်၊ သူတို့ဘက်က တစုံတရာ မပြောနိုင်သေးဘူးလို့ ဖြေကြားပါတယ်။


နားဆင်ရန်

source by : http://www.voanews.com

အပြည့်အစုံ ဖတ်ရန် ...